អន្តរជាតិ
រូបភាព AFP
×![]()
ដោយ: តន ចាន់រិទ្ធារ៉ា
ប្រធានាធិបតីអាមេរិក ដូណាល់ ត្រាំ នៅថ្ងៃទី១៦ ខែមិថុនា បានលើកឡើងពីលទ្ធភាពដែលលោកអាចកាន់តំណែងប្រធានាធិបតីលើសពីពីរអាណត្តិ។ តាមរយៈ Twitter របស់ខ្លួន លោក ត្រាំ អះអាងថា អ្នកគាំទ្ររបស់លោកអាចទាមទារឲ្យមានការធ្វើវិសោធនកម្មរដ្ឋធម្មនុញ្ញដើម្បីបើកផ្លូវឲ្យលោកអាចបន្តស្នាក់នៅសេតវិមានលើសពី៨ឆ្នាំ។ តើលោក ត្រាំ កំពុងនិយាយមែនទែន ឬលេងសើច ខណៈលោកធ្លាប់និយាយរឿងកាន់អំណាចយូរនេះញឹកញយហើយដែរ?
មិនទាន់ចប់អាណត្តិទីមួយឡើយ តែលោក ដូណាល់ ត្រាំ បានសម្លឹងឃើញអាណត្តិទីពីរទៅហើយ។ កាន់តែចាប់អារម្មណ៍នោះ ប្រធានាធិបតីអាមេរិករូបនេះ ទំនងមានកូនចិត្តចង់កាន់កាប់សេតវិមានហួសពីរអាណត្តិទៀតផង។ ម្ដងជាពីរដង លោក ត្រាំ និយាយបែបមែនបន្លំលេងសើចថា លោកអាចដឹកនាំអាមេរិកលើសដប់ឆ្នាំទៀតផង។
នៅថ្ងៃទី១៦ ខែមិថុនា ឆ្លៀតពេលរិះគន់កាសែតអាមេរិក New York Times និង Washington Post នោះ លោក ត្រាំ ក៏រំឭករឿងកាន់អំណាចលើសពីរអាណត្តិនេះជាថ្មី។ ជាទម្លាប់ប្រើប្រាស់បណ្ដាញសង្គម Twitter ដើម្បីបញ្ចេញសារនយោបាយ ប្រធានាធិបតីអាមេរិករូបនេះ បានបញ្ជាក់ថា អ្នកគាំទ្ររបស់លោកអាចស្នើឲ្យមានការកែរដ្ឋធម្មនុញ្ញដើម្បីឲ្យលោកបន្តធ្វើឲ្យអាមេរិកកាន់តែអស្ចារ្យ។
.....news is that at the end of 6 years, after America has been made GREAT again and I leave the beautiful White House (do you think the people would demand that I stay longer? KEEP AMERICA GREAT), both of these horrible papers will quickly go out of business & be forever gone!
— Donald J. Trump (@realDonaldTrump) June 16, 2019
លោក ត្រាំ សរសេរលើ Twitter ផ្ទាល់ខ្លួនថា៖ «ព័ត៌មានល្អគឺថា ៦ឆ្នាំរំលងផុតទៅបន្ទាប់ពីអាមេរិកត្រឡប់ទៅរកភាពអស្ចារ្យម្ដងទៀត ហើយខ្ញុំនឹងចាកចេញពីសេតវិមានដ៏ស្រស់ស្អាត។ តើអ្នកគិតថា ប្រជាជនអាមេរិកនឹងទាមទារឲ្យខ្ញុំបន្តនៅយូរទៅទៀតទេ? អាមេរិកនឹងនៅតែអស្ចារ្យ...។»
តាមរយៈសារខាងលើ លោក ត្រាំ ដែលនឹងប្រកាសពីយុទ្ធនាការសម្រាប់ការបោះឆ្នោតឆ្នាំ២០២០ ទំនងចង់និយាយថា ប្រជាប្រិយភាពរបស់លោកក្នុងចំណោមប្រជាជនអាមេរិកមានអត្រាខ្ពស់ដោយសារនយោបាយធ្វើឲ្យអាមេរិកអស្ចារ្យឡើងវិញ។ ប៉ុន្តែរដ្ឋធម្មនុញ្ញអាមេរិកដែលកើតក្រោយវិសោធនកម្មលើកទី២២ នោះ ចែងច្បាស់ហើយថា អាណត្តិប្រធានាធិបតីមានត្រឹមពីរអាណត្តិប៉ុណ្ណោះ។ ប៉ុន្តែលោក ត្រាំ ក៏ទំនងគិតដោយខ្លួនឯងថា ច្បាប់កំពូលនេះ អាចកែប្រែម្ដងទៀតក៏ថាបាន។
អ្វីគួរឲ្យកត់សម្គាល់នោះ តាមរយៈសារ Twitter លោក ត្រាំ មានទំនុកចិត្តខ្ពស់ក្នុងការបោះឆ្នោតឆ្នាំ២០២០ ហើយបន្តដឹកនាំអាមេរិកអាណត្តទីពីរ ប៉ុន្តែលោកបែរជាសរសេរថា ៦ឆ្នាំមិនមែន៨ឆ្នាំទៅវិញ ទោះជាអាណត្តិប្រធានាធិបតីអាមេរិមានបួនឆ្នាំក្ដី។ មិនរាប់៨ឆ្នាំ ព្រោះលោក ត្រាំ ដកពីរឆ្នាំដំបូងចេញ ព្រោះចោមរោមដោយសំណុំរឿងរុស្ស៊ីលូកលាន់ការបោះឆ្នោតឆ្នាំ២០១៦ ដែលោក ត្រាំ ផ្ដួលលោកស្រី ហ៊ីឡារី គ្លីនតុន បេក្ខជនបក្សប្រជាធិបតេយ្យ។
កាលពីខែមេសា លោក ត្រាំ ព្រលយពាក្យចង់ដឹកនាំអាមេរិកពីរឆ្នាំបន្ថែមទៀត ដើម្បីទូទាត់នឹងពេលវេលាដែលលោកខាតបង់ដោយសារការស៊ើបអង្កេតរបស់រដ្ឋអាជ្ញាពិសេស Robert Mueller ។ ចុងក្រោយ លោកបែរជាថា នេះជាសម្ដីកំប្លែងប៉ុណ្ណោះ។ ឆ្នាំ២០១៨ លោក ត្រាំ និយាយរឿងដូចគ្នានេះអំឡុងជំនួបជាមួយប្រធាធិបតីចិន ស៊ី ជិនភីង ដែលកែច្បាប់ដើម្បីកាន់អំណាចបានយូរនោះ។ កាលនោះ លោកថា អាមេរិកធ្វើតាមចិនដែរនៅថ្ងៃណាមួយ៕
Tag:
អាមេរិក
ដូណាល់ ត្រាំ
© រក្សាសិទ្ធិដោយ thmeythmey.com
