អន្តរជាតិ
ហេតុអ្វីបានជាអ្នកមើលឃើញផ្កាយផ្លេកៗនៅពេលយប់?
× នៅពេលមានមេឃស្រឡះ គ្មានពពក គ្មានភ្លៀង ទិដ្ឋភាពមេឃងងឹតជាមួយនឹងផ្កាយ គឺជាទិដ្ឋភាពមួយដែលមិនអាចរំលងបាន ជាពិសេសនៅតាមទីជនបទ នៅពេលដែលការបំពុលដោយពន្លឺភ្លើងអគ្គីសនីមានចំនួនតិច។ តែនៅពេលដែលអ្នកងាកមើលទៅរកផ្កាយ ចំណុចពន្លឺតូចៗទាំងនោះហាក់បីដូចជាមានពណ៌ផ្លេកៗ ដូចជាគ្រាប់ពេជ្រ។ តើពន្លឺផ្លេកៗទាំងនេះ កើតឡើងដោយសារបាតុភូតអ្វី?
បាតុភូតសាមញ្ញពេលយប់មួយនេះ កើតឡើងគ្មានអ្វីក្រៅពីស្រទាប់បរិយាកាសរបស់ភពផែនដីដែលយើងរស់នៅនោះទេ។ គេហទំព័រវិទ្យាសាស្ត្រ livescience.com បានពន្យល់ថា បរិយាកាសរបស់ផែនដីសម្បូរទៅដោយឧស្ម័នជាច្រើនខុសគ្នាៗ រសាត់ទៅវិញទៅមកទៅតាមរយៈចរន្តខ្យល់។ នៅក្នុងស្រទាប់នីមួយៗ សីតុណ្ហភាពក៏មានលក្ខណៈខុសគ្នាដែរ។ សីតុណ្ហភាពខុសៗទាំងនេះ ធ្វើឲ្យមាឌ និងដង់ស៊ីតេឧស្ម័នប្រែប្រួលទៅតាមនេះដែរ។
នៅពេលដែលពន្លឺរបស់ផ្កាយទាំងនោះឆ្លងកាត់ស្រទាប់បរិយាកាសផែនដី លក្ខណៈរបស់ឧស្ម័នផ្សេងៗគ្នាគឺជាអ្នកបត់បែនដំណាលរបស់ពន្លឺ ទៅវិញទៅមក។ ហេតុដូចនេះហើយ នៅពេលដែលអ្នកពិនិត្យមើលផ្កាយ អ្នកសង្កេតឃើញថា ពួកវាហាក់ដូចបីជាបញ្ចេញពន្លឺផ្លេកៗ។ ប៉ុន្តែ បើអ្នកអាចចេញផុតពីបរិយាកាសភពផែនដី នោះពន្លឺផ្លេកៗដែលអ្នកឃើញនឹងបាត់ទៅវិញ៕
© រក្សាសិទ្ធិដោយ thmeythmey.com