ជាតិ
សង្គមជាតិ
អាជ្ញាធរអប្សរា៖ បើមិនចង់ខកចិត្ត សូមកុំទិញដីនៅតំបន់រមណីយដ្ឋានអង្គរ!
× ភ្នំពេញ៖ អាជ្ញាធរជាតិអប្សរា ព្រមានអ្នកប្រកាសលក់ដីនៅតំបន់រមណីយដ្ឋានអង្គរឲ្យបញ្ឈប់សកម្មភាពខ្លួនជាបន្ត ជាពិសេសការផ្សព្វផ្សាយលក់តាមបណ្តាញសង្គម ព្រោះដីនៅតំបន់នោះ ជាបេតិកភណ្ឌពិភពលោកដែលអាជ្ញាធរបានហាមឃាត់។ បើករណីមិនគោរពតាមការណែនាំ អាជ្ញាធរជាតិអប្សរា នឹងចាត់វិធានការតាមច្បាប់។
កន្លងមកអាជ្ញាធរអប្សរាសង្កេតឃើញថា មានជនមិនគប្បីជាច្រើន បានប្រកាសលក់ដីធ្លីក្នុងតំបន់អង្គរ ដែលផ្ទុយពីច្បាប់ដែលបានចែងគ្រប់គ្រងតំបន់សៀមរាបអង្គរ និងសេចក្តីសម្រេច ចុះនៅថ្ងៃទី១៦ ខែវិច្ឆិកា ឆ្នាំ២០០៤ របស់រាជរដ្ឋាភិបាល ស្តីពីកំណត់បទដ្ឋាននៃការប្រើប្រាស់ដីធ្លីនៅតំបន់១ និងតំបន់២។
យោងតាមសេចក្តីជូនដំណឹងរបស់អាជ្ញាធរជាតិអប្សរា ការហាមប្រាម គឺដើម្បីអនុវត្តគោលការណ៍ច្បាប់ក្នុងកិច្ចការអភិរក្ស និងអភិវឌ្ឍន៍រមណីយដ្ឋានអង្គរប្រកបដោយចីរភាព ម្យ៉ាងដើម្បីបង្ការការខូចខាតផលប្រយោជន៍របស់សាធារណជនដែលកើតឡើងពីការបោកបញ្ឆោតរបស់ជនមួយចំនួន ពីទិញដីធ្លីក្នុងតំបន់អង្គរ។
ក្នុងករណីទប់ស្កាត់សកម្មភាពនេះ អាជ្ញាធរអប្សរា ឲ្យពលរដ្ឋដែលមានបំណងចង់ទិញដី នៅខេត្តសៀមរាប ត្រូវពិចារណា និងទាក់ទងទៅអាជ្ញាធរជាតិអំពីចម្ងល់ផ្សេងៗដែលទាក់ទងនឹងការទិញដី តាមរយៈលេខទូរសព្ទ ០៩២ ៨៩៩ ៩៦៦ ដើម្បីកុំឲ្យមានការខកចិត្តតាមក្រោយ៕
Tag:
អាជ្ញាធរអប្សរា
ដី
ប្រាសាទអង្គរ
© រក្សាសិទ្ធិដោយ thmeythmey.com