អន្តរជាតិ
×![]()
ដោយ: គី ចំណា
ប្រភេទសត្វមួយចំនួន មិនដែលចេញធ្វើដំណើរឆ្ងាយពីទីជម្រករបស់វាប៉ុន្មាននោះទេ។ សត្វខ្លះគ្រាន់តែចេញពីជម្រកដើម្បីទៅប្រមាញ់យកចំណី រួចត្រលប់មកកន្លែងរស់នៅវិញជាធម្មតា។ ប៉ុន្តែសម្រាប់បក្សីសមុទ្រមួយនេះ ការធ្វើដំណើរទៅមកក្បែរទីជម្រកមិនមែនជាអ្វីដែលពួកគេធ្វើនោះទេ។
បក្សីសមុទ្រ Arctic Tern ត្រូវបានគេឲ្យឈ្មោះថា ជាប្រភេទបក្សីដែលធ្វើដំណើរបានឆ្ងាយជាបក្សីណាៗទាំងអស់។ បក្សីដែលមានពណ៌ ស មួយប្រភេទនេះ បន្តពូជនៅតំបន់អាក់ទិចនៅឯទិសខាងជើង និងធ្វើដំណើរទៅកាន់ទិសខាងត្បូងជារៀងរាល់ឆ្នាំ។
ដោយយោងតាមគេហទំព័រមួយចំនួនដូចជា arctictern.info និង articternmigration.weebly.com បានពន្យល់ថា បក្សីសមុទ្រមួយនេះ ចំណាយពេលជាមធ្យមប្រមាណជា ៩៣ថ្ងៃ ដើម្បីធ្វើដំណើរពីទិសខាងជើងទៅទិសខាងត្បូងនៃផែនដី ដែលក្នុងមួយថ្ងៃពួកគេអាចហោះហើរបានទៅដល់ជាង៥០០គីឡូម៉ែត្រឯណោះ។ នៅពេលដែលពួកគេធ្វើការបង្កកំណើតរួចនារដូវរងាឯទិសខាងជើង ឬហៅថាតំបន់«រង្វង់អាកទិច» ពួកគេនឹងធ្វើដំណើរទៅទិសខាងត្បូងដើម្បីទៅរកអាកាសធាតុក្តៅសមរម្យ ក្នុងការរស់នៅ និងរកចំណី។
ក្នុងមួយឆ្នាំៗ បក្សីមួយប្រភេទនេះធ្វើដំណើរទៅវិញទៅមកក្នុងចម្ងាយជាមធ្យម៧ម៉ឺនគីឡូម៉ែត្រ ក្នុងរយៈពេលរស់នៅរបស់ពួកវាប្រមាណ២៥ឆ្នាំ។ ពេលខ្លះ ពួកវាធ្វើដំណើរជុំគ្នា ដោយក្នុងមួយក្រុមៗមានបក្សីប្រហែលជា១៥ក្បាល។ មូលហេតុដែលបក្សីទាំងនេះអាចរកផ្លូវដើម្បីធ្វើដំណើរយ៉ាងឆ្ងាយដូចច្នេះបានគឺដោយសារតែនៅក្នុងប្រព័ន្ធខួរក្បាលរបស់ពួកវា ត្រូវបានវិវត្តឡើងជាមួយនឹងរំញោចលើដែនម៉ាញេទិចនៃភពផែនដី ដែលមាននាទីដូចជាត្រីវិស័យដែលមនុស្សប្រើប្រាស់ដែរ។ ដូចនេះ ក្នុងមួយជីវិតរបស់ពួកវា បក្សីទាំងនេះធ្វើដំណើរក្នុងរង្វង់២លានគីឡូម៉ែត្រ ជាមួយនឹងស្លាបទាំងពីរ៕
Tag:
បក្សី
© រក្សាសិទ្ធិដោយ thmeythmey.com
