ហាងកាហ្វេ តូបលក់កាហ្វេ រីកដូចផ្សិតនៅកម្ពុជាសព្វថ្ងៃ។ ទិដ្ឋភាពនេះបង្ហាញថា ពលរដ្ឋខ្មែរកាន់តែច្រើន ពិសេសយុវជន កាន់តែនិយមកាហ្វេ។ អ្នកណាក៏មើលឃើញយ៉ាងដូច្នេះដែរ។ ក្នុងចំណោមហាងកាហ្វេម៉ាក និងទំនើបពីបរទេស ក៏មានក្រុមហ៊ុនថៃដែរ។
នៅកម្ពុជាអ្នកណាក៏ស្គាល់ហាងកាហ្វេ Amazon។ ប៉ុន្តែសារព័ត៌មានថ្មីៗ មិនអាចទាក់ទងសុំសម្ភាសតំណាងក្រុមហ៊ុន កាហ្វេអាម៉ាហ្សូន បានឡើយ។
រីឯ ហាងកាហ្វេ Inthanin Cambodia របស់ប្រទេសថៃ ហាងកាហ្វេម៉ាកមួយនេះបានពង្រីកសាខារបស់ខ្លួនបានចំនួន៤ ហើយក្នុងទីផ្សារកម្ពុជា ខណៈដែលក្រុមហ៊ុននេះ ទើបតែចូលមកទីផ្សារកម្ពុជា នាដើមឆ្នាំ២០១៨។
អ្នកស្រី ជីរ៉ានុន វង្សមង្គល (Juranun Wongmongkol) នាយិកាគ្រប់គ្រង នៃក្រុមហ៊ុន RCG Retail (Cambodia) ដែលជាក្រុមហ៊ុនទទួលបានសិទ្ធិផ្ដាច់មុខលើកានាំចូលហាងកាហ្វេ Inthanin Cambodia បានរៀបរាប់ឲ្យដឹងថា ការរីកចម្រើននៃសេដ្ឋកិច្ចកម្ពុជា និងទំនោរនៃការរស់នៅតាមបែបស៊ីវិល័យ នៃមនុស្សជំនាន់ក្រោយ ដែលចង់សាកល្បងកាហ្វេ ដែលមានស្តង់ដារជាលក្ខណៈអន្តរជាតិ និងជាពិសេសការកើនឡើងនៃចំនួនអ្នកដែលមានចំណូលមធ្យម ជាកត្តាដែលជំរុញឲ្យលោកស្រី សម្រេចចិត្ត នាំចូល ហាងកាហ្វេ Inthanin របស់ថៃចូលមកទីផ្សារកម្ពុជា។
លោកស្រី Juranun ដែលជាជនជាតិថៃ និងជាម្ចាស់ Inthanin Cambodia បានមករស់នៅក្នុងប្រទេសកម្ពុជា តាំងពីឆ្នាំ១៩៩៤។ ពេលនោះអ្នកស្រីមានតួនាទីជាមន្ត្រីជំនួយការផ្នែកពាណិជ្ជកម្ម នៃស្ថានទូតថៃប្រចាំនៅកម្ពុជា។ ដោយផ្អែកលើបទពិសោធការងារ និងការស់នៅក្នុងប្រទេសកម្ពុជា អ្នកស្រីបានអះអាងថា អ្នកស្រីបានស្គាល់ និងយល់ដឹងច្បាស់ពីស្ថានភាពនៃការវិវឌ្ឍន៍នៃសេដ្ឋកិច្ចកម្ពុជា។ ដូច្នេះក្រោយចូលនិវត្តន៍ក្នុងឆ្នាំ២០១៨នេះ អ្នកស្រីក៏សម្រេចចិត្តទិញសិទ្ធិអាជីវកម្ម ពីហាងកាហ្វេ Inthanin Thailan នៃក្រុមហ៊ុនប្រេងឥន្ធនៈ Bangchak Corp របស់ប្រទេសថៃ។
អ្នកស្រី Juranun Wongmongkol ម្ចាស់ហាងកាហ្វេ Inthanin Cambodia
នាយិកាគ្រប់គ្រងនៃក្រុមហ៊ុន RCG Retail (Cambodia) ដែលនិយាយភាសារខ្មែរមិនសូវច្បាស់ល្អ បានរៀបរាប់ឲ្យដឹងថា ការទិញសិទ្ធិអាជីវកម្មក៏មិនមែនជារឿងងាយស្រួលនោះទេ អ្នកស្រីត្រូវត្រួតពិនិត្យប្រវត្តិក្រុមហ៊ុនយ៉ាងល្អិតល្អន់ ព្រោះមានហាងកាហ្វេជាច្រើន ដែលកំពុងប្រតិបត្តិការលើផ្នែកនេះ នៅក្នុងប្រទេសថៃ។ អ្នកស្រីបន្តថា ហាងកាហ្វេ Inthanin Thailan មានអាយុកាល ១២ឆ្នាំមកហើយ ហើយបានវិវឌ្ឍន៍ខ្លួនពីហាងកាហ្វេតូចៗ សម្រាប់អ្នកធ្វើដំណើរដែលចូលចាក់សាំងនៅតាមស្ថានីយ៍របស់ខ្លួន។ ហើយបច្ចុប្បន្ន Inthanin មានប្រមាណ ៥០០ហាង ក្នុងប្រទេសថៃ។
ព្រោះមិនចង់ឈឺក្បាលនឹងការរករូបមន្តកាហ្វេសម្រាប់អតិថិជនខ្លួន ម្ខាស់ហាងកាហ្វេ Inthanin Cambodia បានពន្យល់ថា ការទិញសិទ្ធិអាជីវកម្មពីក្រុមហ៊ុនមួយ នឹងតម្រូវឲ្យក្រុមហ៊ុននោះ បង្រៀនបុគ្គលិកពីរបៀបឆុងកាហ្វេតាមរូបមន្តក្រុមហ៊ុន, ការងារបច្ចេកទេសនានា, ការផ្គត់ផ្គងគ្រាប់កាហ្វេ, ការផ្សព្វផ្សាយ និងការងារជាច្រើនទៀត។ អ្នកស្រីបន្តថា ប្រសិនបើអ្នកស្រីបើកហាងថ្មីៗមួយដោយខ្លួនឯង អ្នកស្រីត្រូវចំណាយដើមទុនច្រើន និងត្រូវការពេលវេលាយូរ ដើម្បីអាចធ្វើឲ្យម៉ាក និងរសជាតិកាហ្វេត្រូវបានសាធារណជនទទួលស្គាល់។
អ្នកស្រីអត្ថាធិប្បាយយ៉ាងដូច្នេះថា៖ «ការបង្កើតនិមិត្តសញ្ញាសម្រាប់ខ្លួនឯង មិនមែនជារឿងស្រួលនោះទេ ទីមួយត្រូវចំណាយលុយច្រើនទៅលើការផ្សព្វផ្សាយ និងការទ្រទ្រង់ផ្សេងៗច្រើនទៀត។ ជាពិសេសកំណត់រូបមន្តស្តង់ដារមួយ ដែលអតិថិជនទទួលស្គាល់ មិនមែនដូចគេថាឆុងទឹកបាននោះទេ, បើកហាងខ្លួនឯងជារឿងឈឺក្បាលណា់ស»។
លោក Surachet Maneepong មន្ត្រីផ្នែកធុរកិច្ចនៃស្ថានទូតថៃប្រចាំនៅកម្ពុជា បានឲ្យដឹងថា ហាងកាហ្វេថៃដែលមានវត្តមាននៅក្នុងប្រទេសកម្ពុជា ភាគច្រើនជាហគ្រិនកម្ពុជា។ ដោយសហគ្រិនកម្ពុជាបានសហការជាមួយម្ខាស់ក្រុមហ៊ុននៃប្រទេសថៃ តាមទម្រង់ទិញសិទ្ធិអាជិវកម្ម ឬជាការសហការគ្នា។
លោកបន្តថា មានហេតុផលជាច្រើនដែលសហគ្រិនកម្ពុជាចាប់អារម្មណ៍ និងសហការជាមួយវិនិយោគិនថៃ ក្នុងនោះមានដូចជា កាហ្វេថៃមួយចំនួនធំត្រូវបានស្គាល់ដោយប្រជាពលរដ្ឋកម្ពុជា, កាហ្វេថៃមានស្ដង់ដារ និងគុណភាពល្អ ហើយតម្លៃសមរម្យ។
មន្ត្រីផ្នែកធុរកិច្ចនៃស្ថានទូតថៃប្រចាំនៅកម្ពុជារូបនេះបន្ថែមថា ក្នុងនោះក៏មានក្រុមហ៊ុនថៃមួយចំនួន បានមកវិនិយោគដោយផ្ទាល់នៅក្នុងប្រទេសកម្ពុជាផងដែរ។ ពួកគេបានមើលឃើញពីសក្តានុពលនៃកំណើនសេដ្ខកិច្ចរបស់កម្ពុជា និងកំណើននៃវិនិយោគិនបរទេស និងភ្ញៀវទេសចរបរទេស។ នេះជាការអះអាងបន្ថែមរបស់មន្ត្រីស្ថានទូតថៃ ដែលបានបញ្ជាក់អំពីចំនួនក្រុមហ៊ុនកាហ្វេថៃនៅកម្ពុជាយ៉ាងដូច្នេះ៖« បច្ចុប្បន្នេះមាន ហាងកាហ្វេថៃម្រមាណ១៥ និងភោជនីយដ្ឋានមួយចំនួន បានមកវិនិយោគនៅក្នុងប្រទេសកម្ពុជា»។
ក្នុងត្រីមាសទី១ ឆ្នាំ២០១៩នេះ ទំហំពាណិជ្ជកម្មរវាងកម្ពុជា និងថៃ មានចំនួន ១៩៤០ លានដុល្លា កើនឡើង ០,៧ ភាគរយ បើធៀបទៅនឹងរយៈពេលដូចគ្នាកាលពីឆ្នាំ២០១៨។ នេះជាការឲ្យដឹងរបស់លោក Surachet Maneepong។
លោក សុនឆៃ អង្សាទីតាណាន (Sonchai Aungsatitanan) ជាតំណាងក្រុមហ៊ុន ឆាវដយ កម្ពុជា (CHAO DOI Cambodia) បានឆ្លើយតបនឹងសំណួរមួយចំនួនរបស់អ្នកសារព័ត៌មានថ្មីៗថា ក្រុមហ៊ុន CHAO DOI Thai បានសម្រេចចិត្តមកវិនិយោគនៅប្រទេសកម្ពុជាព្រោះ ហាងកាហ្វេបរទេសកំពុងមានការពេញនិយមខ្លាំងក្នុងប្រទេសកម្ពុជានាពេលបច្ចុប្បន្ន។ លោកបានសង្កត់ធ្ងន់ថា ប្រជាពលរដ្ឋកម្ពុជា និងប្រជាពលរដ្ឋថៃ មានរសនិយមដូចគ្នា។ លើសពីនេះប្រជាពលរដ្ឋកម្ពុជាសព្វថ្ងៃ ចូលចិត្តញាំកាហ្វេដែលមានស្តង់ដា និងធម្មជាតិ។ ដូច្នេះទើបធុរជនថៃរូបនេះ និងក្រុមការងារ សម្រេចចិត្តនាំចូល ឆាវដយ មកប្រទេសកម្ពុជា។
ហាងកាហ្វេ ឆាវដយ បានចូលមកទីផ្សារកម្ពុជាក្នុងអំឡុងដើមឆ្នាំ២០១៧ បានពង្រីកសាខារបស់ខ្លួនបានចំនួន ៧ សាខាហើយ ក្នុងនោះ ៣សាខានៅភ្នំពេញ និង៤ សាខាទៀតនៅតាមបណ្ដាខេត្តដូចជា បាត់ដំបង សៀមរាប ប៉ោយប៉ែត និងនៅស្វាយស៊ីសុផុន។
តំណាងឆាវដយកម្ពុជារូនេះ បានឲ្យដឹងថា ឆាវដយថៃ មានអាយុកាល១៥ ឆ្នាំហើយ ក្នុងទីផ្សារប្រទេសថៃ។
ក្រុមហ៊ុន RCG Retail (Cambodia) ទទួលបានសិទ្ធិផ្ដាច់មុខលើការលក់សិទ្ធិអាជីវកម្មក្នុងប្រទេសកម្ពុជា និងប្រទេសឡាវ ពីក្រុមហ៊ុន Bangchak Corp។ អ្នកស្រីបានឲ្យដឹងថា តម្លៃលក់សិទ្ធិអាជីវកម្ម ក្នុងមួយហាងមានតម្លៃ ១២៥០០ ដុល្លារ។ ចំពោះឆាវដយកម្ពុជា លោក Sonchai បានឲ្យដឹងថា តម្លៃលក់សិទ្ធិអាជីវកម្មមានតម្លៃចាប់ពី ៤៥,០០០ ដុល្លារ ក្នុងមួយហាង។
ក្រៅពីវត្តមានហាងកាហ្វេថៃ ដែលកំពុងប្រតិបត្តិការក្នុងទីផ្សារកម្ពុជា ក៏មានហាងកាហ្វេបរទេសជាច្រើនទៀតផងដែរ ខណៈកាហ្វេក្នុងស្រុកមានចំនួនតិច និងភាគច្រើនជាលក្ខណៈគ្រួសារ។
គួររម្លឹកថា ក្នុងឆ្នាំ២០១៨ ទំហំពាណិជ្ជកម្ម រវាងកម្ពុជា និងថៃ មានទំហំ ៨,៤ ពាន់លានដុល្លារ ហើយរដ្ឋាភិបាលនៃប្រទេសទាំងពីរ គ្រោងបង្កើនទំហំពាណិជ្ជកម្មឲ្យដល់ ១៥ ពាន់លានដុល្លារក្នុងឆ្នាំ២០២០។ ក្នុងរយៈពេល៥ ឆ្នាំចុងក្រោយនេះ ការវិនិយោគរបស់ថៃនៅក្នុងប្រទេសកម្ពុជា មានទំហំ ៧ ពាន់លានដុល្លារ ដែលធ្វើឲ្យប្រទេសថៃ ក្លាយជាវិនិយោគទុនផ្ទាល់បរទេស លំដាប់លេខ៤ ក្នុងប្រទេសកម្ពុជា។ នេះបើយោងតាមការលើកឡើងរបស់រដ្ឋមន្ត្រីក្រសួងហិរញ្ញវត្ថុថៃ លោក Apisak Tantivorawong កាលពីខែមីនា ឆ្នាំ២០១៩៕