ជាតិ
សង្គមជាតិ
មន្ត្រីនគរបាលម្នាក់ ត្រូវបានចាប់ខ្លួន ដោយសារជាប់ពាក់ព័ន្ធនឹងករណីគ្រឿងញៀន នៅRock
× ភ្នំពេញ៖ មន្ត្រីនគរបាលម្នាក់ ត្រូវបានសមត្ថកិច្ចចាប់ខ្លួន ដោយសារពាក់ព័ន្ធនឹងករណីគ្រឿងញៀន នៅមជ្ឈមណ្ឌល រ៉ក (Rock) ដែលអាជ្ញាធរបានបង្ក្រាប កាលពីថ្ងៃទីចុងខែកុម្ភៈ កន្លងមក។ មន្ត្រីនគរបាលរូបនេះ ត្រូវបានសមត្ថកិច្ច បញ្ជូនទៅតុលាការក្រុងភ្នំពេញ ចាត់វិធានការតាមផ្លូវច្បាប់ហើយ កាលពីថ្ងៃទី១៧ មិថុនា។ នេះបើតាមអគ្គស្នងការដ្ឋាននគរបាលជាតិ ដែលទើបចុះផ្សាយព័ត៌មាននេះ។
អគ្គស្នងការដ្ឋាននគរបាលជាតិ បានបញ្ជាក់ថា ជនសង្ស័យដែលសមត្ថកិច្ចចាប់ខ្លួននេះ មានឈ្មោះ ឡេង សុខគង់ ដែលជាមន្ត្រីនគរបាលពាក់ស័ក្តិ២ នៃឋានៈប្រធានផ្នែកអន្តរាគមន៍ នៅការិយាល័យប្រឆាំងគ្រឿងញៀន នៃស្នងការដ្ឋាននគរបាលរាជធានីភ្នំពេញ។ ការចាប់ខ្លួននេះ គឺសមត្ថកិច្ចអនុលោមតាមដីកាបង្គាប់ របស់លោក សេង លាង ចៅក្រមស៊ើបសួរសាលាដំបូងរាជធានីភ្នំពេញ។
ការឈានទៅដល់ការចាប់ខ្លួនមន្ត្រីនគរបាលខាងលើនេះ ធ្វើឡើងក្រោយពីសម្ដេច ស ខេង រដ្ឋមន្ត្រីក្រសួងមហាផ្ទៃ បានប្រកាសថា ករណីគ្រឿងញៀននៅមជ្ឈមណ្ឌលកម្សាន្ត Rock នេះ ក៏មានពាក់ព័ន្ធនឹងមន្ត្រីប៉ូលិសដែរ។ ជាពិសេសការចេញបញ្ជាពីនាយករដ្ឋមន្ត្រី ហ៊ុន សែន ដែលដាក់កំហិតឲ្យសមត្ថកិច្ច តាមចាប់ខ្លួនមេខ្លោង និងអ្នកពាក់ព័ន្ធករណីគ្រឿងញៀន នៅទីតាំងកម្សាន្ត ក្នុងកណ្ដាលទីក្រុងមួយនេះ។
កាលពីចុងខែកុម្ភៈ ឆ្នាំ២០១៩ សមត្ថកិច្ច បានឃាត់ខ្លួនមនុស្សប្រមាណ៣០០នាក់ នៅក្លិប Rock តែក្រោយមក ត្រូវបានដោះលែងវិញ ដោយសល់តែជិត២០នាក់ប៉ុណ្ណោះ ដែលត្រូវបានកសាងសំណុំរឿងទៅតុលាការ។ ក្រោយបិទក្លិបកម្សាន្តនេះហើយ សមត្ថកិច្ចក៏បានចាប់ខ្លួនលោកឧកញ៉ា គិត ធាង ដែលជាម្ចាស់ក្លិបទៀតផង៕
© រក្សាសិទ្ធិដោយ thmeythmey.com