ពីនេះ ពីនោះ
ព័ត៍មានសុខភាព
ចូលចិត្តកេះអាចម៍ច្រមុះ មិនត្រឹមតែជាទម្លាប់អាក្រក់ទេ តែក៏គ្រោះថ្នាក់ចំពោះសុខភាពដែរ
× មនុស្សយើងគ្រប់គ្នាតែងតែមានហើយនូវទម្លាប់អាក្រក់ជាច្រើន។ អ្នកខ្លះចូលចិត្តកន្ទ្រាំជើងពេលកំពុងតែអង្គុយញ៉ាំអី ខណៈពេលដែលអ្នកខ្លះទៀតចូលចិត្តមើលទូរទស្សន៍យូរៗ និងច្រើនម៉ោង។ អ្នកខ្លះទៀតចូលចិត្តញ៉ាំគ្រឿងស្រវឹងច្រើនៗ ខណៈពេលដែលខ្លះទៀតចូលចិត្តហាលថ្ងៃយូរៗ។ ប៉ុន្តែចំពោះប្រធានបទរបស់យើងនៅពេលនេះគឺចង់និយាយថា ការដែលចូលចិត្តកេះអាចម៍ច្រមុះមិនត្រឹមតែជាទម្លាប់អាក្រក់ទេ តែក៏ផ្តល់គ្រោះថ្នាក់ចំពោះសុខភាពដែរ ដោយមិនខ្វល់ថាធ្វើវាពេលនៅតែឯង ឬនៅពេលមានមនុស្សជុំវិញខ្លួនឡើយ។ បើសិនជាអ្នកកំពុងតែរអៀសខ្លួនហើយគួរតែអានបន្តទៀត!!
អ្នកជំនាញនិយាយថា ការកេះអាចម៍ច្រមុះមិនត្រឹមតែជាទម្លាប់អាក្រក់ទេ តែក៏ធ្វើឲ្យសុខភាពរងការប៉ះពាល់ដែរ។ រឿងនេះកើតឡើងជាពិសេសបើសិនជាអ្នកមានទម្លាប់អាក្រក់មួយផ្សេងទៀតជាមួយផងដូចជា ការខាំក្រចកដៃលេងជាដើម។ មែនហើយ មនុស្សគ្រប់គ្នាដឹងហើយថា ពួកគេកេះអាចម៍ច្រមុះហើយគឺមិនយកមកញ៉ាំឡើយ តែអ្នកខ្លះក៏បានញ៉ាំវារួចទៅហើយ។
អ្វីដែលធ្វើឲ្យមានគ្រោះថ្នាក់ខ្លាំងបំផុតនោះគឺថា នៅលើស្បែករបស់មនុស្សយើងមានមេរោគទំនៅច្រើនណាស់។ ថ្វីបើវាគឺជារឿងធម្មតាដែលយើងមើលមេរោគនោះមិនឃើញក៏ដោយ តែវាពិតជាអាចធ្វើឲ្យមានជំងឺបានបើសិនជាមិនមានការប្រុងប្រយ័ត្ន។ បើសិនជាមេរោគទាំងនោះបំបែកកូនចៅរបស់វាច្រើនរហូតដល់មិនអាចគ្រប់គ្រងបាន និងចូលក្នុងខ្លួនរបស់យើងតាមរយៈស្បែកដែលរហែក នោះអ្នកអាចនឹងមានជំងឺបាន។
នៅលើស្បែកមានមេរោគខ្លាំងមួយឈ្មោះថា Staphylococcus Aureus ដែលវាអាចបង្កជាជំងឺឆ្លងលើរាងកាយបាន ជាពិសេសបង្កជាការរលាកស្បែក ករខ្ទុះក្រោមស្បែក និងពុលអាហារជាដើម។ រឿងនេះមិនមែនមានន័យថា មេរោគនេះអាចបង្កជំងឺខាងលើតាមរយៈការកេះអាចម៍ច្រមុះឡើយ។ ប៉ុន្តែអ្វីដែលជាការពិតនោះគឺថា បាក់តេរីមួយនេះអាចចូលក្នុងខ្លួនមនុស្សយើងយ៉ាងងាយនៅពេលមានទម្លាប់អាក្រក់មួយទៀតចូលជាមួយ នោះគឺការខាំក្រចកដៃលេងតែម្តង។
ទោះបីជាយ៉ាងណាក៏ដោយ នៅពេលអ្នកកេះអាចម៍ច្រមុះរហូតដល់មានឈាមតិចតួចចេញមកដោយមិនដឹងខ្លួន បាក់តេរីខាងលើនឹងសប្បាយចិត្ត ហើយចូលក្នុងចរន្តឈាមអ្នកបានយ៉ាងស្រួល និងបង្កកូនចៅកាន់តែច្រើន រហូតដល់កើតជាជំងឺបាន។
សរុបសេចក្តីមក ការបកស្រាយខាងលើមិនមែនមានន័យថា អ្នកត្រូវបញ្ឈប់ការកេះអាចម៍ច្រមុះទាំងស្រុងនោះទេ តែគួរមានដែនកំណត់ផង។ ការកេះអាចម៍ច្រមុះគួរតែជារឿងធម្មតាបើសិនជាមានការរមាស់ ឬយល់ថាច្រមុះមានអាចម៍ច្រើនពេក។ ប៉ុន្តែបើសិនជាគ្មានអ្វីកើតឡើងក្នុងច្រមុះទេ គួរតែកុំយកម្រាមដៃទៅកេះធ្វើអី៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com