កីឡាអន្តរជាតិ
អន្តរជាតិ
World Cup នារី៖ ជប៉ុនឡើងទៅវគ្គ១/៨ផ្តាច់ព្រ័ត្រ ខណៈ៦ក្រុមត្រូវប្រជែងយកលេខ៣ល្អបំផុត២កៅអី
× ក្រុមកីឡាបាល់ទាត់ជម្រើសជាតិជប៉ុននារីបានឈានទៅកាន់វគ្គ១/៨ផ្តាច់ព្រ័ត្រនៃពានរង្វាន់ FIFA Women's World Cup ឆ្នាំ២០១៩ បើទោះពួគគេចាញ់អង់គ្លេស ២-០ នាការប្រកួតជម្រុះតាមពូលចុងក្រោយក្តី។
ក្នុងជំនួបលើកទី៣ និងជាការប្រកួតកាត់សេចក្តីចុងក្រោយពូល D នាថ្ងៃទី១៩ ខែមិថុនា ក្រុមរងជើងឯកឆ្នាំ២០១៥ ជប៉ុនដែលមាន៤ពិន្ទុរួចស្រេចបានចាញ់ក្រុមកំពូលតារាងអង់គ្លេស ២-០ ខណៈអាហ្សង់ទីនបានត្រឹមស្មើជាមួយស្កុតឡែន ៣-៣។ បើទោះបរាជ័យក្តីប៉ុន្តែក្រុមរហស្សនាមសាម៉ូរ៉ៃនៅតែនាំមុខអាហ្សង់ទីនដែលឈរចំណាត់ថ្នាក់ទី៣ចំនួន២ពិន្ទុ។ ដូច្នេះក្រុមពីទ្វីបអាស៊ីមួយនេះបានកៅអីទៅវគ្គបន្ត ខណៈអាហ្សង់ទីនចាំអ៊ុតលេខ៣ល្អបំផុត ហើយស្កុតឡែនហាលអាវ។
ជប៉ុនជាក្រុម១៤ហើយបន្ទាប់ពីម្ចាស់ផ្ទះបារាំង អាល្លឺម៉ង់ អ៊ីតាលី អង់គ្លេស ហូឡង់ កាណាដា ស៊ុយអែត ម្ចាស់ជើងឯកចាស់អាមេរិក ន័រវែស អេស្ប៉ាញ និងចិនដែលបន្តទៅជួបគ្នានៅវគ្គខ្វែង។
ដោយឡែកក្រុមដែលត្រូវប្រជែងគ្នាយកចំណាត់ថ្នាក់ទី៣ល្អបំផុតចំនួន២កៅអីទៀតគឺមាន៦ក្រុម ក្នុងនោះរួមមាននីហ្សេរីយ៉ាដែលមាន៣ពិន្ទុពូល A អាហ្សង់ទីនមាន២ពិន្ទុពូល D កាមេរូននិងនូវែលសេឡង់ដែលមានសូន្យពិន្ទុដូចគ្នាត្រូវប៉ះគ្នានៅជំនួបចុងក្រោយពួល E ព្រមទាំងស៊ីលីនិងថៃ (សូន្យពិន្ទុ) ក៏ត្រូវប្រជែងគ្នាដណ្តើមយក៣ពិន្ទុនាការប្រកួតចុងក្រោយពូល F ផងដែរ។
ក្នុងចំណោមក្រុមទាំង៦ខាងលើក្រុមពីតំបន់អាហ្វ្រិកនីហ្សេរីយ៉ាមានប្រៀបជាងគេសម្រាប់កៅអីទៅវគ្គ១៦ក្រុមចុងក្រោយនៃព្រឹត្តិការណ៍កីឡាបាល់ទាត់ពិភពលោកលោកផ្នែកនារីដែលបារាំងទទួលសិទ្ធិធើ្វម្ចាស់ផ្ទះឆ្នាំ២០១៩នេះ៕
Tag:
បាល់ទាត់
World Cup Women
© រក្សាសិទ្ធិដោយ thmeythmey.com