ជាតិ
នយោបាយជាតិ
លោក ហ៊ុន ម៉ានិត បដិសេធថា ខ្លួនគ្មានប្រាក់១០០លានដុល្លារ នៅក្នុងធនាគារអាមេរិកទេ រូបពីហ្វេសប៊ុកលោក ហ៊ុន ម៉ានិត
× ភ្នំពេញ៖ អគ្គនាយកនៃអគ្គនាយកដ្ឋានស្រាវជ្រាវចារកិច្ចរបស់ក្រសួងការពារជាតិ លោក ហ៊ុន ម៉ានិត បដិសេធថា គ្មានប្រាក់១០០លានដុល្លារ នៅក្នុងធនាគារអាមេរិកឡើយ។ ការបដិសេធនេះ ធ្វើឡើងបន្ទាប់ពីលោក ម៉ានិត បានឃើញព័ត៌មាននិយាយពីទ្រព្យសម្បត្តិលោក នៅលើបណ្ដាញសង្គមហ្វេសប៊ុក។
លោក ហ៊ុន ម៉ានិត ដែលជាកូនប្រុសទីពីររបស់សម្តេចនាយករដ្ឋមន្ត្រី ហ៊ុន សែន ចាត់ទុកព័ត៌មានដែលបង្ហោះចែកចាយលើបណ្ដាញសង្គមនេះ គឺជារឿងមិនពិត ដែលបង្កើតឡើងដោយក្រុមប្រឆាំងរដ្ឋាភិបាល។ តាមរយៈហ្វេសប៊ុកផ្ទាល់ខ្លួននោះ អគ្គនាយកនៃអគ្គនាយកដ្ឋានស្រាវជ្រាវចារកិច្ច របស់ក្រសួងការពារជាតិរូបនេះ បានប្រតិកម្មតបយ៉ាងដូច្នេះថា៖« ថ្មីៗនេះ ខ្ញុំបានឃើញព័ត៌មានក្លែងក្លាយពាក់ព័ន្ធនឹងគណនីធនាគារមួយរបស់អាមេរិកដែលប្រើទាំងឈ្មោះខ្ញុំ ទាំងឈ្មោះប្អូនស្រីខ្ញុំ ថាមានទឹកប្រាក់នៅក្នុងនោះទៅដល់ ១០០លានដុល្លារសហរដ្ឋអាមេរិកក្នុងម្នាក់ៗ។ ព័ត៌មានមិនពិតនេះគឺបានបង្កើតឡើងដោយក្រុមប្រឆាំង ក្នុងគោលបំណងបង្ខូចឈ្មោះ លាបពណ៌ បង្កើតជាការសង្ស័យ ពីសារធារណជន។ អ្នកដែលចេញព័ត៌មានមិនពិតនេះមុនគេ គឺមកពីអតីតគណបក្សព្រះអាទិត្យលិចនិងតំណាង«ខ្ញុំខ្មែរ» ឈ្មោះ Tor Nimol»។
ក្រោយពីច្រានចោលព័ត៌មានខាងលើនេះហើយ កូនប្រុសរបស់នាយករដ្ឋមន្ត្រី ហ៊ុន សែនរូបនេះ ថែមទាងអះអាងទៀតថា ក្រុមប្រឆាំងរដ្ឋាភិបាល តែងតែបង្កើតព័ត៌មានក្លែងក្លាយ ដើម្បីសាធារណៈស្អប់គ្រួសារលោក ក្នុងគោលបំណងវាយប្រហារមកលើការដឹកនាំរដ្ឋាភិបាល។ លោក ហ៊ុន ម៉ានិត ក៏គ្រោងប្ដឹងផ្លូវច្បាប់លើអ្នកបង្ហោះព័ត៌មាន ពីទ្រព្យសម្បតិខ្លួនដែរ។
«ខ្ញុំកំពុងតែពិចារណាថាតើ គួរប្រើនីតិវិធីច្បាប់ជាមួយអង្គការ «ខ្ញុំខ្មែរ» នេះ ឬក៏ទុកចោល? ដោយសារករណីបែបនេះមិនមែនជាលើកទី ១ ទេ ដែលកន្លងមកក្រុមប្រឆាំងប្រើព័ត៌មានក្លែងក្លាយមកលើក្រុមគ្រួសារខ្ញុំជាបន្តបន្ទាប់ អស់ពីរឿងមួយទៅរឿងមួយទៀត ដែលខ្ញុំក៏មានការកោតសរសើរចំពោះក្រុមនេះថាពីមួយថ្ងៃទៅមួយថ្ងៃ ប្រហែលជាគិតថាចំណុចអ្វីខ្លះ គួរតែចាក់រុក»។ នេះជាការលើកឡើងរបស់លោក ហ៊ុន ម៉ានិត ។
កាលពីពេលថ្មីៗនេះ មានគណនីហ្វេសប៊ុកឈ្មោះថា Tor Nimol បានបង្ហោះទិន្នន័យទឹកប្រាក់នៅក្នុងធនាគារមួយ «TD Bank» ដោយអះអាងថា ទឹកប្រាក់១០០លានដុល្លារនោះ គឺជារបស់លោក ហ៊ុន ម៉ានិត។ គណនីហ្វេសប៊ុកនេះ ថែមទាំងបង្ហោះរូបលោក ហ៊ុន ម៉ានិត និងបងប្អូនលោក ដោយភ្ជាប់ឃ្លាថា «សប្បាយណាស់! លើគំនរដុល្លារ លើគំនរទឹកភ្នែកប្រជាជន»៕
Tag:
ហ៊ុន ម៉ានិត
ហ៊ុន សែន
ក្លែងក្លាយ
© រក្សាសិទ្ធិដោយ thmeythmey.com