អន្តរជាតិ
ទៅកូរ៉េខាងជើងលើកដំបូង លោក ស៊ី ជិនភីង ត្រូវបានស្វាគមន៍យ៉ាងអធិកអធម មេដឹកនាំចិន និងកូរ៉េខាងជើងនាជំនួបកន្លងមក។
× ប្រធានាធិបតីចិន ស៊ី ជិនភីង នៅថ្ងៃទី២០ ខែមិថុនា បានចាប់ផ្ដើមដំណើរទស្សនកិច្ចផ្លូវរដ្ឋនៅកូរ៉េខាងជើង ហើយត្រូវបានស្វាគមន៍យ៉ាងអធិកអធមបំផុត។ លោក ស៊ី ជាប្រធានាធិបតីចិនទីមួយដែលដាក់ជើងជាន់លើទឹកដីកូរ៉េខាងជើងចាប់តាំងពីឆ្នាំ២០០៥ មក។ ដំណើរទស្សនកិច្ចរបស់លោក ស៊ី ពេលនេះ មានគោលដៅពង្រឹងទំនាក់ទំនងប្រពៃណីទ្វេភាគីផង និងជំរុញការស្វែងរកដំណោះស្រាយសម្រាប់វិបត្តិនៅឧបទ្វីបកូរ៉េផង។
នៅព្រលានយន្តហោះអន្តរជាតិ Sunan ក្នុងរដ្ឋធានីព្យុងយ៉ាង ប្រធានាធិបតីចិន ស៊ី ជិនភីង និងភរិយា ផឹង លីយ័ន ត្រូវបានស្វាគមន៍ដោយផ្ទាល់ពីសំណាក់មេដឹកនាំកំពូលកូរ៉េខាងជើង គីម ជុងអ៊ុន និងស្ត្រីទីមួយ រី ស៊ុលជូ ។ ប្រជាជនកូរ៉េខាងជើងប្រមាណមួយម៉ឺននាក់ ក៏បានប្រមូលផ្ដុំគ្នាដើម្បីស្វាគមន៍មេដឹកនាំចិន ជាមួយនឹងការស្រែកជ័យឃោសដែលបង្ហាញពីចំណងការទូតស្អិតល្មួតរវាងកូរ៉េខាងជើង និងចិន។ នេះបើតាមការផ្សាយរបស់ប្រព័ន្ធផ្សព្វផ្សាយរដ្ឋចិន។
ក្រោយពិធីបដិសណ្ឋារកិច្ចដ៏អធិកអធម មេដឹកនាំចិន និងកូរ៉េខាងជើងដែលអមដំណើរដោយស្ត្រីទីមួយទាំងពីរ ក៏ចាកចេញទៅកាន់វិមាន Kumsusan Palace of the Sun ជាទីរំឭកដល់មេដឹកនាំកូរ៉េខាងជើងជំនាន់។ ទីភ្នាក់ងារព័ត៌មានរដ្ឋចិន Xinhua ផ្សាយថា លោក ស៊ី ជាមេដឹកនាំបរទេសដំបូងគេដែលទទួលបានការស្វាគមន៍រាក់ទាក់ខ្លាំងពីសំណាក់កូរ៉េខាងជើង។
លោក ស៊ី និងលោក គីម ក៏ចាប់ផ្ដើមជំនួបចរចានៅរសៀលថ្ងៃដដែល។ ប៉ុន្តែមិនមានព័ត៌មានលម្អិតណាមួយទាក់ទងជំនួបនេះឡើយ។ អ្វីដែលគេដឹង គឺក្រៅពីការរឹតចំណងមេត្រីភាពទ្វេភាគី ជំនួបមេដឹកនាំចិន និងកូរ៉េខាងជើង ក៏នឹងមានការជជែកពីការរំសាយនុយក្លេអ៊ែរផងដែរ។ មុនទៅកូរ៉េខាងជើង លោក ស៊ី អះអាងថា ចិនគាំទ្រកូរ៉េខាងជើងដែលជ្រើសរើសផ្លូវត្រូវដើម្បីដោះស្រាយបញ្ហាតាមផ្លូវនយោបាយ និងការចរចា។
ចិន ជាសម្ព័ន្ធមិត្តរឹងមាំបំផុតរបស់កូរ៉េខាងជើងក្នុងរយៈពេល៧០ឆ្នាំនៃចំណងការទូត ដែលតែងជួយកូរ៉េខាងជើងក្នុងស្ថានភាពលំបាកជាច្រើន។ ដោយសារទំនាក់ទំនងចាក់ទឹកមិនលិចបែបនេះ អាមេរិក ក៏តែងទទូចម្ដងហើយម្ដងទៀតឲ្យចិនអនុវត្តឲ្យម៉ឺងម៉ាត់ដំណោះស្រាយដែលដាក់ទណ្ឌកម្មលើកូរ៉េខាងជើង ឬជួយបន្ទន់ចិត្តកូរ៉េខាងជើងឲ្យបោះបង់នុយក្លេអ៊ែរតាមសម្រួល មុននឹងមានការលើកលែងទណ្ឌកម្មរាប់ជាន់វិញ។
ដំណើរទស្សនកិច្ចលោក ស៊ី នៅកូរ៉េខាងជើង ក៏ជាទំនងជាសញ្ញាបង្ហាញទៅអាមេរិកថា ចិនកំពុងកាន់សន្លឹកបៀដ៏សំខាន់ក្នុងដៃរបស់ខ្លួន ហើយអាចប្រើប្រាស់គ្រប់ពេលវេលាដើម្បីកេងយកប្រយោជន៍ ខណៈអាមេរិក និងចិនកំពុងប្រជែងគ្នាកាន់តែខ្លាំងឡើង។ ជំនួបស៊ី-គីមនៅថ្ងៃទី២០ ខែមិថុនានេះ ធ្វើឡើងមួយសប្ដាហ៍មុនលោក ស៊ី ជួបលោក ត្រាំ នៅជប៉ុន។ ឯលោក គីម វិញក៏ប្រើជំនួបជាមួយលោក ស៊ី ដើម្បីធ្វើខ្នងបង្អែកតថ្លៃជាមួយអាមេរិកវិញដែរ៕
Tag:
ចិន
កូរ៉េខាងជើង
ស៊ី ជិនភីង
គីម ជុងអ៊ុន
© រក្សាសិទ្ធិដោយ thmeythmey.com