ក្រោយឆ្នាំ២០២១ ខណ្ឌ៧មករា ចំការមន ដូនពេញ ទួលគោក នឹងលែងលិចដោយសារជំនន់ទឹកភ្លៀងហើយ

ជាតិ

សង្គមជាតិ

ក្រោយឆ្នាំ២០២១ ខណ្ឌ៧មករា ចំការមន ដូនពេញ ទួលគោក នឹងលែងលិចដោយសារជំនន់ទឹកភ្លៀងហើយ

20, Jun 2019 , 9:39 pm

រូបភាព

ដោយ: ថ្មីៗ

ភ្នំពេញ៖ ខណ្ឌចំការមន ដូនពេញ ទួលគោក និងខណ្ឌ៧មករា នឹងលែងមានបញ្ហាជន់លិច ដោយសារជំនន់ទឹកភ្លៀងទៀតហើយ នៅក្រោយឆ្នាំ២០២១។ នេះជាការលើកឡើងរបស់លោក ស៊ុយ សេរិទ្ធ អភិបាលរង នៃគណៈអភិបាលរាជធានីភ្នំពេញ ក្នុងកិច្ចប្រជុំជំហានទី៤នៃការអនុវត្តផែនការមេកែលម្អប្រព័ន្ធលូ និងទឹកសម្អុយនៅរាជធានីភ្នំពេញឆ្នាំ២០១៨-២០២១។

ក្នុងសិក្ខាសាលាពិគ្រោះយោបល់ ស្តីពីផែនការមេកែលម្អប្រព័ន្ធលូ និងទឹកសម្អុយនៅរាជធានីភ្នំពេញ នាថ្ងៃទី២០មិថុនា នៅសាលារាជធានីភ្នំពេញ អភិបាលរងរូបនេះបានបន្តថា ទឹកជំនន់នៅភ្នំពេញបានរំដោះទៅកាន់បីតំបន់ផ្សេងគ្នា ដោយក្នុងនោះមានបឹងតាមោក បឹងទំពុន និងបឹងជើងឯកជាដើម។

«ពាក់ព័ន្ធទៅនឹងការរំដោះទឹកដែលសង្ឃឹមថាខណ្ឌទាំងបួននេះ លែងលិចដោយសារជំនន់ទឹកភ្លៀង យើងគិតថា ចាប់ពីផ្លូវរូស្សីទៅត្បូង យើងនឹងរំដោះទឹកទាំងនោះទៅបឹងទំពុន និងបឹងជើងឯក។ ចាប់ពីផ្លូវរូស្សីទៅជើង យើងរំដោះទឹកក្នុងរាជធានីភ្នំពេញទៅទម្លាក់នៅបឹងតាមោក។ រីឯចំណុចកណ្តាល យើងនឹងរៀបចំលក្ខណៈជាបច្ចេកទេសរបស់ជប៉ុន ដោយប្រើអាងរំដោះទឹកនៅតាមផ្ទះនីមួយៗ ឬក៏៣០ផ្ទះមានអាងនេះមួយ»។នេះជាការលើកឡើងរបស់លោក ស៊ុយ សេរិទ្ធ។

សិក្ខាសាលាពិគ្រោះយោបល់ ស្តីពីផែនការមេកែលម្អប្រព័ន្ធលូ និងទឹកសម្អុយនៅរាជធានីភ្នំពេញ ដែលដឹកនាំដោយលោក នួន ផារ័ត្ន អភិបាលរងរាជធានីភ្នំពេញ នាថ្ងៃទី២០មិថុនា នៅសាលារាជធានីភ្នំពេញ

បើតាម លោក ស៊ុយ សេរិទ្ធ កាលពីដើមនៅផ្សារកណ្តាល ផ្សារធំថ្មី នៅទីស្នាក់ការក្រុមប្រឹក្សាអភិវឌ្ឍន៍កម្ពុជា(CDC) នៅពេលដែលភ្លៀងខ្លាំង គឺតំបន់នេះលិចទឹកយ៉ាងហោចណាស់មួយព្រឹករហូតទៅ២ថ្ងៃ។ ប៉ុន្តែបច្ចុប្បន្នតំបន់ទាំងនេះ គឺលិចយ៉ាងយូរមិនដល់កន្លះម៉ោងទេ។ ដោយសារឃើញភាពវិជ្ជមានច្រើននេះ ទើបលោកសង្ឃឹមថា ក្រោយឆ្នាំ២០២១ តំបន់ទាំងនេះ និងតំបន់ផ្សេងៗទៀត នៅក្នុងចំណោម៤ខណ្ឌខាងលើនឹងលែងលិចទឹក ដោយសារជំនន់ទឹកភ្លៀងទៀតហើយ។ ចំណែកខណ្ឌបឹងកេងកង ដែលនៅជាប់ខណ្ឌចំការមននោះ ក៏អាចដោះស្រាយបញ្ហាទឹកលិចផងដែរ។

រដ្ឋបាលរាជធានីភ្នំពេញបានអនុវត្ត និងសម្រេចជាមួយទីភ្នាក់ងារសហប្រតិបត្តិការកម្ពុជា-ជប៉ុន (JICA) ក្នុងគម្រោងផែនការមេកែលម្អប្រព័ន្ធលូ និងទឹកសម្អុយនៅរាជធានីភ្នំពេញ នៅឆ្នាំ២០៣៥ខាងមុខ។ ក្នុងនោះភាគីទាំងពីរ បានអនុវត្ត និងសម្រេចនៅជំហានទីមួយ ក្នុងឆ្នាំ២០០១-២០០៤ ជំហានទីពីរឆ្នាំ២០០៧-២០១០ ជំហានទីបីឆ្នាំ២០១២-២០១៥។ ដោយឡែកជំហានទីបួន បាននិងកំពុងអនុវត្ត ចាប់ឆ្នាំ២០១៨-២០២១។

សិក្ខាសាលាពិគ្រោះយោបល់ ស្តីពីផែនការមេកែលម្អប្រព័ន្ធលូ និងទឹកសម្អុយនៅរាជធានីភ្នំពេញ នាថ្ងៃទី២០មិថុនា នៅសាលារាជធានីភ្នំពេញ

លោក ស៊ុយ សេរិទ្ធ បានបញ្ជាក់ថា ៖«សិក្ខាសាលាពិគ្រោះយោបល់ ស្តីពីផែនការមេកែលម្អប្រព័ន្ធលូ និងទឹកសម្អុយនៅរាជធានីភ្នំពេញនេះ គឺធ្វើបច្ចុប្បន្នភាព និងសិក្សាពីប្រព័ន្ធលូទឹកសម្អុយនានា ក្នុងការអនុវត្តជំហានទី៤នៃផែនការមេកែលម្អប្រព័ន្ធលូ និងទឹកសម្អុយនៅរាជធានីភ្នំពេញ ដែលទទួលបានការគាំទ្រថវិកា និងបច្ចេកទេសពីរដ្ឋាភិបាលជប៉ុន»។

ក្នុងផែនការមេដែលកំពុងអនុវត្ត និងសិក្សាបន្តនេះ បានបែកចែកជាបីតំបន់ គឺតំបន់ប្រព្រឹតិ្តកម្មជើងឯក តំបន់ប្រព្រឹត្តិកម្មតាមោក និងតំបន់ប្រព្រឹត្តិកម្មផ្សេងទៀត ដែលផ្អែកទៅដងស៊ីតេប្រជាជន និងការអភិវឌ្ឍនៅតំបន់ទាំងនោះ នៅក្នុងឆ្នាំ២០៣៥ ។ បើតាមការធ្វើបទបង្ហាញរបស់អ្នកជំនាញការJICA តំបន់ប្រព្រឹតិ្តកម្មជើងឯក មានទំហំ៤,៧០១ហិកតា ជាតំបន់មានប្រជាជនច្រើនជាង១លាននាក់។ តំបន់ប្រព្រឹត្តិកម្មបឹងតាមោក មានទំហំផ្ទៃដី ជាង៦ពាន់ហិកតា ដែលមានប្រជាជនជាង៤៨ម៉ឺននាក់៕