លោក ឡុង សាលវ័ន្ដ, ម៉ង់ ស៊ីថន និង រាម កុសល ត្រូវព្យួរការងារ៦សប្តាហ៍ ក្រោយដាក់ពិន្ទុមិនត្រឹមត្រូវ

កីឡាជាតិ

ជាតិ

លោក ឡុង សាលវ័ន្ដ, ម៉ង់ ស៊ីថន និង រាម កុសល ត្រូវព្យួរការងារ៦សប្តាហ៍ ក្រោយដាក់ពិន្ទុមិនត្រឹមត្រូវ

20, Jun 2019 , 4:53 pm

រូបភាព

(រាប់ពីឆ្វេងទៅស្តាំ)លោក រាម កុសល, លោក ឡុង សាលវ័ន្ត និងលោក ម៉ង់ ស៊ីថន

ដោយ:

ចៅក្រម៣រូបរួមមានលោក ឡុង សាលវ័ន្ត, លោក ម៉ង់ ស៊ីថន និងលោក រាម កុសល ត្រូវបានសហព័ន្ធកីឡាប្រដាល់គុនខ្មែរព្យួរការងារជាមន្ត្រីអាជ្ញាកណ្តាលចៅក្រមចំនួន៦សប្តាហ៍ បន្ទាប់ពីរកឃើញថា ចៅក្រមទាំង៣រូបនេះដាក់ពិន្ទុមិនត្រឹមត្រូវ។ ការពិន័យនេះធ្វើឡើងក្រោយការតវ៉ារបស់កីឡាករ ឃីម ឌីម៉ា បន្ទាប់ពីចៅក្រមកាត់ក្តីឲ្យប្អូនប្រុសរបស់គេ គឺកីឡាករ ឃីម បូរ៉ា ចាញ់កីឡាករថៃ ទួន ប៉េ(Toun Pe) នាជំនួបមិត្តភាពអន្តរជាតិលើសង្វៀនទូរទស្សន៍ CTN។

គណៈកម្មការវិន័យរបស់សហព័ន្ធកីឡាប្រដាល់គុនខ្មែរ កាលពីថ្ងៃទី១៧ មិថុនា ឆ្នាំ២០១៩ បានចេញសេចក្តីសម្រេចព្យួរការងារមន្ត្រីអាជ្ញាកណ្តលចៅក្រមទាំង៣រូបនេះ ក្រោយពីពិនិត្យវីដេអូការប្រកួតរវាងកីឡាករ ឃីម បូរ៉ា ជាមួយកីឡាករថៃ ទួន ប៉េ ឡើងវិញ ហើយរកឃើញថា ចៅក្រមទាំង៣នេះ ពិតជាបានបង្កកំហុសក្នុងការដាក់ពិន្ទុមែន។

ការពិនិត្យវីដេអូឡើងវិញរបស់គណៈកម្មការវិន័យ ធ្វើឡើងក្រោយកីឡាករ ឃីម ឌីម៉ា ដែលបងប្រុសបង្កើតរបស់កីឡាករ ឃីម បូរ៉ា បានដាក់ពាក្យប្តឹងតវ៉ាទៅកាន់គណៈកម្មការរៀបចំការប្រកួតប្រចាំសង្វៀនរបស់ស្ថានីយទូរទស្សន៍ CTN។ សម្រាប់ការប្រកួតនោះលោក ឡុង សាលវ័ន្ត លោក ម៉ង់ ស៊ីថន និងលោក រាម កុសល បានផ្តល់ពិន្ទុឲ្យកីឡាករ ទួន ប៉េ ឈ្នះកីឡាករ ឃីម បូរ៉ា ក្នុងលទ្ធផល ៣-២ ខណៈចៅក្រមពីររូបផ្សេងទៀត គឺលោក ទេស សារិន និងលោក ម៉ាត់ សារ៉ន ផ្តល់ពិន្ទុឲ្យ ឃីម បូរ៉ា ឈ្នះ។

ចៅក្រមដែលរងការពិន័យទាំង៣ខាងលើបានផ្តល់ពិន្ទុឲ្យកីឡាករ ឃីម បូរ៉ា ឈ្នះក្នុងទឹកទី១ និងទី២ តែឲ្យចាញ់នៅទឹកទី៣ ទី៤ និងទី៥។ ប៉ុន្តែក្រោយការពិនិត្យវីដេអូសកម្មភាពប្រកួតឡើងវិញ គណៈកម្មការវិន័យពិនិត្យឃើញថា នៅទឹកទី៤ ដែល ឃីម បូរ៉ា វាយ ទួន ប៉េ ឲ្យអាជ្ញាកណ្តាលរាប់ដល់៨ គឺ ឃីម បូរ៉ា ជាអ្នកឈ្នះ។ ក្រោយពិនិត្យឃើញបែបនេះហើយ ទើបគណៈវិន័យសម្រេចពិន័យអាជ្ញាកណ្តាលទាំងបីរូបខាងលើ រយៈពេល៦សប្តាហ៍ ដើម្បីទុកពេលឲ្យសិក្សាក្បួនច្បាប់ និងក្រមសីលធម៌នៃការដាក់ពិន្ទុឡើងវិញ៕