កីឡាករ៤៨រូបប្រជែងគ្នាដណ្តើមជើងឯកថ្នាក់ជាតិ ខណៈស្តេចអុកចត្រង្គ៣រូបអវត្តមាន

កីឡាជាតិ

ជាតិ

កីឡាករ៤៨រូបប្រជែងគ្នាដណ្តើមជើងឯកថ្នាក់ជាតិ ខណៈស្តេចអុកចត្រង្គ៣រូបអវត្តមាន

20, Jun 2019 , 5:34 pm

រូបភាព

ដោយ:

សហព័ន្ធកីឡាអុកចត្រង្គកម្ពុជានៅព្រឹកថ្ងៃទី២០ មិថុនា បានបើកការប្រកួតជើងឯកថ្នាក់ជាតិប្រចាំឆ្នាំ២០១៩ ដើម្បីស្វែងរកជើងខ្លាំងសម្រាប់ត្រៀមប្រមូលផ្តុំក្រុមជម្រើសជាតិ។ ក្នុងចំណោមកីឡាករ៤៨រូប ដែលចូលរួមការប្រកួតនេះ គេមិនឃើញមានវត្តមានស្តេចអុកចត្រង្គប្រចាំឆ្នាំ២០១៦, ២០១៧ និង ២០១៨ ឡើយ។ លោក វ៉ាត់ ចំរើន ជំរុញឲ្យកីឡាករនិងមន្ត្រីអាជ្ញាកណ្តាលចៅក្រម គោរពបទបញ្ជាការប្រកួត និងប្រកាន់ភ្ជាប់នូវគោលការណ៍ Fair Play។

វាជាការប្រកួតជើងឯកថ្នាក់ជាតិប្រចាំឆ្នាំ២០១៩ ក៏ពិតមែន តែក៏ដើម្បីចម្រាញ់រកធនធានកីឡាករជម្រើសជាតិ សម្រាប់ត្រៀមការប្រកួតលក្ខណៈអន្តរជាតិនានាផងដែរ។ ក្នុងន័យនេះ ម្ចាស់ជ័យលាភីក្នុងការប្រកួត នឹងទទួលបានឱកាសក្លាយជាកីឡាករជម្រើសជាតិប្រចាំសហព័ន្ធ ក្រោមគោលការណ៍កំណត់របស់ក្រសួងអប់រំយុវជននិងកីឡា។

សម្រាប់ការប្រកួតជើងឯកថ្នាក់ជាតិឆ្នាំនេះមានកីឡាករ៤៨រូបចូលរួម ដោយបែងចែកជា៨ពូលក្នុងមួយពូលមាន៦រូប។ ការប្រកួតធ្វើឡើងតាមរូបមន្តវិលជុំ ហើយអ្នកទទួលបានពិន្ទុខ្ពស់ជាងគេចំនួនពីររូបក្នុងពូលនីមួយៗ នឹងឡើងទៅប្រកួតវគ្គ១៦នាក់ចុងក្រោយ ដែលធ្វើតាមរូបមន្តចាញ់ធ្លាក់។ ការប្រកួតធ្វើឡើងរយៈពេល២ថ្ងៃ ចាប់ពីថ្ងៃទី២០-២១ ខែមិថុនា នៅទីស្នាក់ការគណៈកម្មាធិការជាតិអូឡាំពិកកម្ពុជា។

អ្វីដែលគួរឲ្យកត់សម្គាល់ក្នុងចំណោមកីឡាករទាំង៤៨រូប គេពុំឃើញមានវត្តមានស្តេចអុកចត្រង្គ ហូយ សូណា ហេង សៅឌី និង សុខ លឹមហេង នោះឡើយ។ ទោះបីគ្មានហេតុផលជាក់លាក់ តែការអវត្តមានជើងខ្លាំងទាំង៣ ត្រូវបានគណៈកម្មការរៀបចំការប្រកួតបញ្ជាក់ថា ដោយសារពួកគេជាប់បំពេញភារកិច្ចផ្ទាល់ខ្លួន។ ស្តេចអុកចត្រង្គពីរសម័យ ឈាវ បូរ៉ា ដែលទើបលាលែងពីអគ្គលេខាធិការសហព័ន្ធកីឡាអុកចត្រង្គ ក៏ស្ថិតក្នុងចំណោមកីឡាករទាំង៤៨រូបផងដែរ។

គួររំលឹកថា កីឡាករ ហូយ សូណា បានក្លាយជាស្តេចអុកចត្រង្គប្រចាំព្រឹត្តិការណ៍អង្គរសង្ក្រាន្តនៅឆ្នាំ២០១៦ រីឯកីឡាករ ហេង សៅឌី ស្តេចអុកឆ្នាំ២០១៧ និង សុខ លឹមហេង ស្តេចអុកឆ្នាំ២០១៨។ ចំណែកកីឡាករ ឈាវ បូរ៉ា បានគ្រងតំណែងស្តេចអុកចត្រង្គពីរឆ្នាំជាប់គ្នា គឺនៅឆ្នាំ២០១៤ និង ២០១៥។

លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា ក្រើនរំលឹកដល់មន្ត្រីអាជ្ញាកណ្តាលចៅក្រម ឲ្យគោរពបទបញ្ជាការប្រកួតឲ្យបានម៉ឺងម៉ាត់ និងវិនិច្ឆ័យដោយឈរលើគោលការណ៍ Fair Play។ ការជំរុញនេះ គឺដើម្បីផ្តល់ភាពកក់ក្តៅ ក៏ដូចជាទំនុកចិត្តដល់កីឡាករ ពិសេសឲ្យការប្រកួតដំណើរការដោយរលូន។

ជាមួយការជំរុញឲ្យកីឡាករប្រកួតអស់ពីសមត្ថភាព លោកក៏ជំរុញឲ្យកីឡាករគោរពក្រមសីលធម៌ និងច្បាប់នៃការប្រកួតផងដែរ។ «កីឡាអុកចត្រង្គមិនសូវមានក្រមសីលធម៌នោះទេ បើលេងខាងក្រៅ ថាចុះថាឡើងវ៉ៃគ្នាគិល។ ប៉ុន្តែនៅក្នុងកីឡាអត់ទេ គេមានក្រមសីលធម៌ ដូច្នេះអត់មានជេរគ្នា ឬថាឌឺដងដាក់គ្នាក្នុងពេលប្រកួតកីឡានោះទេ គឺត្រូវគោរពគ្នាទៅវិញទៅមក»។ ការបញ្ជាក់បែបនេះរបស់លោក វ៉ាត់ ចំរើន ធ្វើឡើងពេលលោកធ្វើជាអធិបតីក្នុងពិធីបើកការប្រកួតអុកចត្រង្គជ្រើសរើសជើងឯកថ្នាក់ជាតិ៕