ក្រោយដកលោក ញឹម វណ្ណដា សម្ដេច ហ៊ុន សែន ប្រកាសមិនទុកមន្ត្រីភូតកុហកនៅក្បែរខ្លួន

ជាតិ

នយោបាយជាតិ

ក្រោយដកលោក ញឹម វណ្ណដា សម្ដេច ហ៊ុន សែន ប្រកាសមិនទុកមន្ត្រីភូតកុហកនៅក្បែរខ្លួន

24, Jun 2019 , 8:19 pm

រូបភាព

លោក ញឹម វណ្ណដា (ស្តាំ) ចុះទៅតំបន់កើតហេតុជាមួយលោក យន្ត មីន។ ថតដោយ ជាវ សំណាង

ដោយ: រំដួល ចិត្រា (Romdoul Chetra)

ព្រះសីហនុ៖ ឧប្បទ្ទេវហេតុបាក់រលំអគារ បង្កឲ្យមានស្លាប់ និងរបួសនៅខេត្តព្រះសីហនុ គឺជារឿងថ្មីមូយ តែរឿងដកមន្ត្រីដែលភូតកុហក និងមិនទទួលខុសត្រូវ លើករណីអន្តរាយនេះ ក៏ជារឿងថ្មីមួយដែរ។ សម្ដេច ហ៊ុន សែន បានស្នើសុំដកលោក ញឹម វណ្ណដា ដែលជាទេសរដ្ឋមន្ត្រី និងជាអនុប្រធានទី១គណៈកម្មកាធិការជាតិគ្រប់គ្រងគ្រោះមហន្តរាយ ដោយសារការភូតកុហក។

ផ្ទុយពីអភិបាលខេត្តព្រះសីហនុ លោក យន្ត មីន ដែលស្នើសុំលាលែងចេញពីតំណែងនោះ លោក ញឹម វណ្ណដា ត្រូវបានចេញពីតំណែងតាមរយៈសំណើសុំដកពីនាយករដ្ឋមន្ត្រី ហ៊ុន សែន។ ការដកលោក ញឹម វណ្ណដា ចេញពីតំណែងនេះ គឺសម្ដេច ហ៊ុន សែន សំអាងលើហេតុផលពីរយ៉ាង ដោយទី១ លោក ញឹម វណ្ណដា ខ្វះទំនួលខុសត្រូវលើការងារដែលកើតឡើងនៅចំពោះមុខ ខណៈខ្លួនជាអនុប្រធានទី១គណៈកម្មកាធិការជាតិគ្រប់គ្រងគ្រោះមហន្តរាយ និងទី២ ទេសរដ្ឋមន្ត្រីរូបនេះ បានភូតភរសម្ដេច ។

ថ្លែងនៅក្នុងសន្និសីទកាសែត នៅក្នុងទីតាំងបាក់រលំអគារ៧ ជាន់ នៅក្នុងសង្កាត់លេខ៤ ក្រុងព្រះសីហនុ នៅម៉ោង៧យប់ ថ្ងៃទី២៤ មិថុនានេះ ប្រមុខរដ្ឋាភិបាល បានរៀបរាប់ដំណើររឿងថា សម្ដេច បានផ្ញើសារតាមបណ្ដាញសង្គម Watsapp និងទាក់ទងតាមទូរសព្ទ ទៅលោក ញឹម វណ្ណដា ដើម្បីចង់ដឹងពីរបាយការណ៍ និងស្ថានការណ៍នៃការបាក់រលំអគារ ប៉ុន្តែគ្មានការឆ្លើយតប។ ដោយសារគ្មានការឆ្លើយបែបនេះ សម្ដេច ហ៊ុន សែន ក៏បានទាក់ទងទៅលោក យន្ត មីន អតីតអភិបាលខេត្តដែលទើបលាលែងចេញតំណែង និងលោក សាយ សំអាល រដ្ឋមន្ត្រីក្រសួងបរិស្ថាន និងជាប្រធានក្រុមការងារថ្នាក់ជាតិចុះជួយខេត្តព្រះសីហនុ ដើម្បីចង់ថា តើលោក ញឹម វណ្ណដា បានចុះជួយអន្តរាគមន៍លើករណីឧប្បទ្ទេវហេតុនេះទេ ។ ប៉ុន្តែគ្មានអ្នកណាឃើញលោក វណ្ណដា មកជួយអន្តរាគមន៍លើករណីបាក់អគារនេះឡើយ។

ត្រង់មូលហេតុនេះហើយទើប សម្ដេច ហ៊ុន សែន ចាត់ទុកលោក ញឹម វណ្ណដា ជាមន្ត្រីដែលខ្វះការទទួលខុសត្រូវ និងភូតកុហក។ មិនតែប៉ុណ្ណោះនាយករដ្ឋមន្ត្រី ហ៊ុន សែន ក៏ប្រកាសកម្ចាត់រាល់មន្ត្រីដែលភូតកុហកសម្ដេចទៀតដែរ។

«ម្សិលមិញពេលដែលខ្ញុំមកដល់កន្លែងនេះ ខ្ញុំបានសួរគាត់ថា ឯកឧត្តម (ញឹម វណ្ណដា) នៅកន្លែងណាពិតប្រាកដ គាត់ថានៅកន្លែងហ្នឹង(កន្លែងកើតហេតុ)។ អ៊ីចឹងបានជានៅទីនោះ ខ្ញុំនិយាយពីការមិនទទួលខុសត្រូវ និងការភូតកុហក ខ្ញុំមិនអាចទុកឲ្យមន្ត្រីណាមួយក្នុងព្រះរាជាណាចក្រកម្ពុជាភូតកុហករបៀបនេះតទៅទៀតទេ។ ខ្ញុំសូមថ្កោលទោសដោយម៉ឺងម៉ាត»។ នេះជាការបញ្ជាក់របស់សម្ដេច ហ៊ុន សែន។

ប៉ុន្តែក្រោយដកតំណែងភ្លាមៗ ព្រះមហាក្សត្រ បានចេញព្រះរាជក្រឹត្យមួយទៀតនៅថ្ងៃទី២៤ មិថុនា ដោយ តែងតាំងលោក ញឹក វណ្ណដា ជាទីប្រឹក្សារដ្ឋាភិបាល ដែលមានឋានៈស្មើទេសរដ្ឋមន្ត្រីវិញ តាមរយៈសំណើរបស់សម្តេចនាយករដ្ឋមន្ត្រី ហ៊ុន សែន ។ សម្ដេច អះអាងថា ការស្នើតែងតាំងលោក វណ្ណដា ជាទីប្រឹក្សានេះ ដោយសារនៅមានការយោគយល់ ប៉ុន្តែបើសិនជាគាត់មិនពេញចិត្តធ្វើការងារនេះទេ នោះសម្ដេចនឹងសម្រេចដកចេញជាថ្មីម្ដងទៀត។