អត្ថបទពាណិជ្ជកម្ម
សន្និសីទនិស្សិតលើកទី៥នៅកម្ពុជាពិភាក្សាគ្នាអំពីបដិវត្តន៍ឧស្សាហកម្ម ៤.០
×![]()
ដោយ: ថ្មីៗ
សាកលវិទ្យាល័យអន្តរជាតិ ផារ៉ាហ្គន (Paragon International University) បានរៀបចំសន្និសីទនិស្សិតលើកទីប្រាំ ស្ដីពីបំលាស់ប្ដូរ បុគ្គល សង្គម និងធុរកិច្ច ក្នុងបរិបទបដិវត្តន៍ឧស្សាហកម្ម ៤.០ ដោយសន្និសីទនេះបានប្រព្រឹត្តនៅថ្ងៃសៅរិ៍ ទី២២ ខែមិថុនា ឆ្នាំ២០១៩។
សន្និសីទនិស្សិតសាកលវិទ្យាល័យផារ៉ាហ្គន បានស្វាគមន៍ ពីនិស្សិត និងអ្នកស្រាវជ្រាវខ្មែរ និងសាសន៍ដទៃទៀត ឲ្យធ្វើបទបង្ហាញសំណេរស្រាវជ្រាវខ្លួន ពាក់ព័ន្ធនឹងប្រធានបទដូចជា៖ “ការធ្វើឱ្យប្រសើរឡើងនូវប្រព័ន្ធផ្គត់ផ្គង់ទឹកក្នុងរាជធានីភ្នំពេញ” ដោយនិស្សិតខ្មែរ សាកលវិទ្យាល័យអន្តរជាតិផារ៉ាហ្គន, “រដ្ឋបាល និងប្រព័ន្ធព័ត៌មាន នៃភូមិជនបទឥណ្ឌូនេស៊ីមួយ សម្រាប់កំណែទម្រង់រដ្ឋបាល និងមនុស្សសាស្ត្រ” ពីនិស្សិតឥណ្ឌូនេស៊ី សាកលវិទ្យាល័យSyiah Kuala, “ស្វែងយល់ពីតួនាទីស្ថាប័នរដ្ឋ ទាក់ទងនឹងភារៈផ្សព្វផ្សាយ បច្ចេកវិទ្យាយន្តហោះគ្មានមនុស្សបើកដ្រូន នៃរដ្ឋាភិបាលសិង្ហបុរី” ពីនិស្សិតសិង្ហបុរី សាកលវិទ្យាល័យបច្ចេកវិទ្យាណាយ៉ាង, “អនាគត និងបញ្ហាប្រឈម របស់ឧស្សាហកម្មហ្វីនតិចកម្ពុជា” តាមរយៈនិស្សិតខ្មែរ សាកលវិទ្យាល័យភូមិន្ទភ្នំពេញ និងប្រធានបទដ៏ទៃទៀត។
លោកបណ្ឌិតដេត សុខឧត្តម សាកលវិទ្យាធិការ នៃសាកលវិទ្យាល័យអន្តរជាតិ ផារ៉ាហ្គន បានឱ្យដឹងថា៖“នេះជាសន្និសីទអន្តរជាតិប្រចាំឆ្នាំដែលអនុញ្ញាតិឲ្យនិស្សិត និងអ្នកស្រាវជ្រាវវ័យក្មេងក្នុងប្រទេសកម្ពុជា និងក្នុងតំបន់ ចែករំលែកការងារស្រាវជ្រាវរបស់ខ្លួនទៅសាធារណៈ ហើយទទួលបានរង្វាយតម្លៃពីអ្នកស្រាវជ្រាវដែលមានបទពិសោធន៍ និងអាចបង្កើតជាបណ្ដាញអ្នកស្រាវជ្រាវវ័យក្មេងដូចគ្នា។ ដោយឡែក ប្រធានបទនៃសន្និសីទឆ្នាំនេះ គឺផ្ដោតលើបដិវត្តន៍ឧស្សាហកម្ម៤.០, រីឯបួនឆ្នាំកន្លង អតីតសាកលវិទ្យាល័យហ្សាម៉ាន់តែងតែបានរៀបចំសន្និសីទពាក់ព័ន្ធនឹង វិទ្យាសាស្ត្រសង្គម និងមនុស្សសាស្ត្រដែលនិស្សិត និងអ្នកស្រាវជ្រាវច្រើនធ្វើបទបង្ហាញក្រោមប្រធានបទ នយោបាយ ទំនាក់ទំនងអន្តរជាតិ និងភូមិសាស្ត្រនយោបាយក្នុងតំបន់ជាដើម។”
លោកបណ្ឌិតកូរ៉ាដូ រីកាដ-ដូ (Riccardo Corrado) សាស្ត្រាចារ្យសញ្ជាតិអ៊ីតាលី ប្រធានដេប៉ាតឺម៉ង់កិច្ចគ្រប់គ្រងប្រព័ន្ធព័ត៌មានវិទ្យានៃសាកលវិទ្យាល័យអន្តរជាតិផារ៉ាហ្គន និងជាអ្នករៀបចំកម្មវិធីបានសម្ដែងក្ដីសោមនស្សន៍លើ គុណវឌ្ឍន៍កិច្ចស្រាវជ្រាវ និងបទបង្ហាញនិស្សិតស្រាវជ្រាវ, ភាពឃ្លាវខ្លា នៃនិស្សិតក្នុងការស្វះស្វែងរកចំណេះ និងការរាប់អានរវាងគ្នា និងគ្នា បើទោះនិស្សិតស្រាវជ្រាវទាំងអស់ មកពីប្រទេសផ្សេងៗ ឬសិក្សានៅសាកលវិទ្យាល័យឡែកពីគ្នាក្ដី។
ទន្ទឹមនឹងពាក្យសរសើរលើកទឹកចិត្តនិស្សិតស្រាវជ្រាវ បណ្ឌិតរីកាដ-ដូបានទទួលស្គាល់ដែរថា និស្សិតស្រាវជ្រាវទាំងនោះ មានចំណុចខ្វះខាតខ្លួនគួរពង្រឹង ដែលនេះជាវត្ថុបំណងនៃសន្និសីទនេះ ពោលគឺកិច្ចផ្ដល់ឱកាសដល់និស្សិត ដើម្បីចូលរួមសន្និសីទលក្ខណៈអន្តរជាតិដូចដែលផារ៉ាហ្គនបានរៀបចំ, ឱកាសផ្ដល់បទបង្ហាញចំពោះមុខសាស្ត្រាចារ្យ អ្នកជំនាញ និងនិស្សិតដូចគ្នា និងឱកាសទទួលដំបូន្មាន ចំណុចគួរកែតម្រូវពីបុគ្គលដែលមានបទពិសោធន៍ និងចំណេះដឹងទាំងនោះ។
លោកស៊ូ យូអានហាវ អ៊ីម៊ើសស្សុន (Xu YuanHao Emerson) និស្សិតបញ្ចប់ថ្នាក់បរិញាប័ត្រជាន់ខ្ពស់ រដ្ឋបាលសាធារណៈ ពីសាកលវិទ្យាល័យបច្ចេកវិទ្យាណាយ៉ាង (Nanyang Technological University) ជាវាគ្មិនមួយរូបក្នុងសន្និសីទនិស្សិត។ ក្រោមប្រធានបទ៖ “ស្វែងយល់ពីតួនាទីស្ថាប័នរដ្ឋ ទាក់ទងនឹងភារៈផ្សព្វផ្សាយ បច្ចេកវិទ្យាយន្តហោះគ្មានមនុស្សបើកដ្រូន នៃរដ្ឋាភិបាលសឹង្ហបុរី”, លោកអ៊ីម៊ើសស្សុន ដែលជាមន្ត្រីក្រុមការងារយន្តហោះដ្រូន នៃក្រសួងដឹកជញ្ជូនសឹង្ហបុរីដែរនោះលើកឡើងថា៖ “ខណៈសឹង្ហបុរីកំពុងធ្វើការសហការជាមួយ ក្រុមហ៊ុនឯកជនជាតិ-អន្តរជាតិទាញយកប្រយោជន៍បច្ចេកវិទ្យាដ្រូន បម្រើប្រយោជន៍សាធារណៈ លោកមើលឃើញថាច្បាប់បំរាមសាធារណៈប្រើប្រាស់ដ្រូន មានសារៈសំខាន់ ទម្រាំតែសាធារណៈជនដឹងនូវទំនួលខុសត្រូវរបស់ខ្លួនក្នុងការប្រើប្រាស់យន្តហោះគ្មានមនុស្សបើក មិនបំពានសិទ្ធឯកជន កិច្ចសម្ងាត់ប្រព្រឹត្តិការស្ថាប័នរដ្ឋ គោរពបេតិកភ័ណ្ឌវប្បធម៌-មនុស្សសាស្ត្រ និងមិនប៉ះពាល់សុវត្ថិភាពចរាចរណ៍យន្តហោះយោធា-ឯកជន។”
លោកដា ដូចបំណង និស្សិតឆ្នាំទីបី ជំនាញសិក្សាអន្តរជាតិ នៅសាកលវិទ្យាល័យភូមិន្ទភ្នំពេញ ជាវាគ្មិនមួយរូបធ្វើបទបង្ហាញសំណើស្រាវជ្រាវលើប្រធានបទ៖ “អនាគត និងបញ្ហាប្រឈម នៃវិស័យហ្វីនតិចកម្ពុជា” បានបញ្ជាក់ថា មូលហេតុដែលខ្លួនចូលរួមសន្និសីទនិស្សិតផារ៉ាហ្គនគឺដោយសារសន្និសីទនេះជាឱកាសដែលលោកអាចទទួលបទពិសោធន៍ស្រាវជ្រាវ បន្ថែមលើការសិក្សាម៉ោងស្រាវជ្រាវ ឯសាកលវិទ្យាល័យ ជាប្រយោជន៍ដែលលោកអាចនឹងប្រើប្រាស់ចំណេះស្រាវជ្រាវ ក្នុងការបំពេញកិច្ចការងារផ្សេងៗទៀតនាពេលអនាគត។
កញ្ញាធា ដាពេជ្រសម្បត្តិ និស្សិតឆ្នាំទីពីរ ជំនាញទំនាក់ទំនងអន្តរជាតិ និងវិទ្យាសាស្ត្រនយោបាយ នៅសាកលវិទ្យាល័យអន្តរជាតិផារ៉ាហ្គន បានចាប់អារម្មណ៍ខ្លាំងលើការស្រាវជ្រាវ ពាក់ព័ន្ធនឹងការចូលរួមចំណែករបស់ក្រុមហ៊ុនដឹកជញ្ជូនអ្នកដំណើរ Go-Jek នៅឥណ្ឌូណេស៊ី ដែលបាន និងកំពុងជម្រុញសេដ្ឋកិច្ចតំបន់ និងការស្រាវជ្រាវពីបច្ចេកវិទ្យាយន្តហោះដ្រូនសឹង្ហបុរី ដែលកំពុងអភិវឌ្ឍសង្គមសេដ្ឋកិច្ចសឹង្ហបុរី។ យ៉ាងណាម៉ិញ កញ្ញាចង់ឱ្យសាកលវិទ្យាល័យខ្លួនទទួលយកអត្ថបទស្រាវជ្រាវផ្ដោតទន្ទឹមគ្នា លើបញ្ហា និងដំណោះស្រាយ ត្បិតសំណេរស្រាវជ្រាវភាគច្រើនមិនទាន់បានផ្ដល់ដំណោះស្រាយក្បោះក្បាយ លើបញ្ហាវាគ្មិនបានសិក្សានោះទេ។
គួរបញ្ជាក់ថា សន្និសីទនិស្សិតសាកលវិទ្យាល័យផារ៉ាហ្គន គឺជាសន្និសីទប្រចាំឆ្នាំដែលជាទូទៅត្រូវបានរៀបចំឡើងក្នុងអំឡុងខែមិថុនា ឬខែកក្កដា ដោយមានការចូលរួមពីសំណាកនិស្សិតខ្មែរពីបណ្ដាសាកលវិទ្យាល័យនានាក្នុងប្រទេសកម្ពុជា និងពីតំបន់អាស៊ីអាគ្នេយ៍ដើម្បីលើកកម្ពស់សមត្ថភាពស្រាវជ្រាវរបស់និស្សិតវ័យក្មេង។
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com
