ជាតិ
សេដ្ឋកិច្ច
ផ្លូវជាតិលេខ២ ឈានដល់ការចុះកិច្ចព្រមព្រៀងសាងសង់ហើយ!
× ភ្នំពេញ៖ នារសៀលថ្ងៃទី២៥ខែមិថុនានេះ ក្រសួងសាធារណការ និងដឹកជញ្ជូន នឹងចុះហត្ថលេខាលើកិច្ចព្រមព្រៀង គម្រោងធ្វើឲ្យប្រសើរឡើងវិញផ្លូវជាតិលេខ២ ជាមួយក្រុមហ៊ុន Hanshin Engineering & Construction Co. Ltd ។
គម្រោងនេះនឹងស្ដារឡើងវិញផ្លូវជាតិលេខ២ ពីក្រុងតាខ្មៅ ខេត្តកណ្ដាល ដល់អូរចំបក់ ជិតទីរួមខេត្តតាកែវ ប្រវែង៥៧គីឡូម៉ែត្រ ព្រមទាំងសាងសង់ផ្លូវជាតិលេខ២២ ពីអូរចំបក់ ដល់អង្គតាសោម ប្រវែង៩គីឡូម៉ែត្រផងដែរ។ គម្រោងសាងសង់ផ្លូវជាតិលេខ២ ឡើងវិញនេះ គឺស្ថិតក្រោមកម្ចីសម្បទាន ពីរដ្ឋាភិបាលកូរ៉េខាងត្បួង។
បើតាមព័ត៌មានពីក្រសួងសាធារណការ ក្នុងពេលកន្លងមក គម្រោងនេះ អាចនឹងត្រូវចំណាយប្រមាណ ៥៦លានដុល្លារ ដែលជាថវិកាកម្ចីពីរដ្ឋាភិលបាលកូរ៉េ និងថវិកាបដិភាគរបស់រដ្ឋាភិបាលកម្ពុជា ជាង៨លានដុល្លារ។
ប្រជាពលរដ្ឋ ពិសេសអ្នករស់នៅ និងធ្វើដំណើរលើផ្លូវមួយខ្សែនេះ ទន្ទឹងរង់ចាំការសាងសង់ពង្រីកផ្លូវជាតិលេខ២នេះ ជាយូរហើយ ក្រោយពួកគាត់បានទទួលដំណឹងពីគម្រោងពង្រីកផ្លូវនេះច្រើនដងរួចមក។ ជាមួយគ្នានេះ ប្រមុខរដ្ឋាភិបាល ក្នុងពេលចុះសំណេះសំណាលកម្មករក្នុងស្រុកបាទី ខេត្តតាកែវ កន្លងមក ក៏បានជំរុញក្រសួងពាក់ព័ន្ធ ឲ្យខិតខំពន្លឿនគម្រោងនេះដែរ ព្រោះផ្លូវនេះហាក់យឺតជាងគេ ចំពោះការអភិវឌ្ឍស្ដារឡើងវិញ។
សូមរង់ចាំព័ត៌មានលម្អិតពីគម្រោងស្ថាបនាផ្លូវជាតិលេខ២ឡើងវិញនេះ ដោយក្រសួងសាធារណការនឹងឲ្យដឹងបន្ថែមពីគម្រោងនេះនៅរសៀលនេះក្នុងពិធីចុះហត្ថលេខាលើកិច្ចព្រមព្រៀង៕
© រក្សាសិទ្ធិដោយ thmeythmey.com