អន្តរជាតិ
រូបភាព៖ AFP
×![]()
ដោយ: VOA
មេដឹកនាំដែលត្រូវគេចោទប្រកាន់ថាប៉ុនប៉ងធ្វើរដ្ឋប្រហារមិនបានសម្រេចក្នុងរដ្ឋអាំហារ៉ា (Amhara) ស្ថិតនៅភាគខាងជើងប្រទេសអេត្យូពី (Ethiopia) ត្រូវគេបាញ់សម្លាប់។
អ្នកយកព័ត៌មានក្នុងរដ្ឋធានី នៃរដ្ឋ បាហឺបា បានថ្លែងប្រាប់តំណាង VOA ភាសាអាហ្វ្រិកថា ឧត្តម សេនីយ៍ Asamnew Tsige ត្រូវគេសម្លាប់នៅក្នុងរដ្ឋធានី កាលពីថ្ងៃចន្ទ នៅពេលលោកព្យាយាម គេចខ្លួនពីកងកម្លាំងសន្តិសុខ។
ជាមួយគ្នានេះដែរ មន្ត្រីរងរបួសម្នាក់ ក្នុងអំពើរដ្ឋប្រហារកាលពីថ្ងៃសៅរ៍ គឺលោក Migbaru Kebede ជារដ្ឋអាជ្ញាតំបន់ បានស្លាប់ដោយមុខរបួសធ្ងន់ធ្ងរពេក។នេះបើតាមរបាយការណ៍របស់បណ្តាញ ព័ត៌មានក្នុងស្រុក។
ក្រុមខ្មាន់កាំភ្លើងបានសម្រុកចូលទៅក្នុងកន្លែងប្រជុំកាលពីថ្ងៃសៅរ៍នៅក្នុងរដ្ឋធានីនៃរដ្ឋ អាំហារ៉ា ហើយបាន សម្លាប់ប្រធានតំបន់ លោក Ambachew Mekonnen និងទីប្រឹក្សាជាន់ខ្ពស់ម្នាក់របស់ លោកដែរ។ បណ្តាញព័ត៌មានក្នុងស្រុកបានផ្សព្វផ្សាយចំឈ្មោះលោក ឧត្តមសេនីយ៍ Asamnew ដែលជានាយកកម្លាំងសន្តិសុខរដ្ឋ អាំហារ៉ា ជាអ្នកមេគំនិតនៃការប៉ុនប៉ងធ្វើរដ្ឋប្រហារ។
ប៉ុន្មានម៉ោងក្រោយមក ក្រុមមន្ត្រីអេត្យូពីបាននិយាយថា អគ្គសេនាធិការកងទ័ព ឬជាមេបញ្ជាការ យោធាកំពូល ត្រូវអង្គរក្សរបស់លោកបាញ់ សម្លាប់កាលពីយប់ថ្ងៃសៅរ៍ នៅក្នុងផ្ទះរបស់លោកក្នុងរដ្ឋធានី អាឌីសអាបេបា។ ក្រុមមន្ត្រីបាននិយាយថាព្រឹត្តិការណ៍ទាំងពីរនេះមានការពាក់ព័ន្ធគ្នា។ នៅក្នុងសេចក្តីថ្លែងការណ៍របស់ស្ថានទូតអាមេរិកក្នុង រដ្ឋធានី អាឌីសអាបេបា បានបង្ហាញពីការរន្ធត់និងទុក្ខសោកចំពោះការវាយប្រហារ សម្លាប់មនុស្សកាលពីយប់ថ្ងៃសៅរ៍។
© រក្សាសិទ្ធិដោយ thmeythmey.com
