កីឡាអន្តរជាតិ
អន្តរជាតិ
អុីតាលី ប្រជែងឈ្នះស៊ុយអែត ដើម្បីធ្វើម្ចាស់ផ្ទះកីឡាអូឡាំពិករដូវរងាឆ្នាំ២០២៦
× ទីក្រុង Milan និង Cortina d’Ampezzo របស់អ៊ីតាលីបានឈ្នះការដេញថ្លៃធ្វើម្ចាស់ផ្ទះកីឡាអូឡាំពិករដូវរងា និងប៉ារ៉ាឡាំពិករដូវរងា ឆ្នាំ ២០២៦ ដោយផ្តួលគូប្រជែងពីទីក្រុង Stockholm និង Are របស់ប្រទេសស៊ុយអែត។ នេះបើតាមគណៈកម្មាធិការអូឡាំពិកអន្តរជាតិ (IOC) ប្រកាសនៅក្រុង Lausanne ប្រទេសស្វីស នាថ្ងៃទី២៤ ខែមិថុនា ឆ្នាំ២០១៩។
ភាពសប្បាយរីករាយពីសំណាក់ប្រជាជនអ៊ីតាលីបានកើតឡើងបន្ទាប់ពី IOC ប្រកាសថាទីក្រុងចំនួនពីរដែលស្ថិតក្នុងប្រទេសពួកគេទទួលបានសិទ្ធិធ្វើម្ចាស់ផ្ទះព្រឹត្តិការណ៍កីឡាលំដាប់ពិភពលោកមួយនេះជាលើកទី៣។ អ៊ីតាលីធ្លាប់រៀបចំកីឡាអូឡាំពិករដូវរងាពីរលើករួចមកហើយ ពោលគឺនៅឆ្នាំ១៩៥៦ ក្នុងក្រុង Cortina d’Ampezzo និងឆ្នាំ២០០៦ ក្រុង Turin។
បើតាមប្រធាន IOC លោ Thomas Bach អ៊ីតាលីទទួលបានសំឡេងឆ្នោតគាំទ្រ ៤៧សំឡេង នាំមុខស៊ុតអែតដែលទទួលបាន ៣៤សំឡេង។ ព្រឹត្តិការណ៍កីឡាអូឡាំពិកឆ្នាំ ២០២៦ ឬលើកទី២៥ នឹងដំណើរការការប្រកួតចាប់ពីថ្ងៃទី៦ ដល់ថ្ងៃទី២២ ខែកុម្ភៈ។ សម្រាប់ប៉ារ៉ាឡាំពិក នឹងចាប់ផ្តើមពីថ្ងៃទី៦ ដល់១៥ ខែមីនា។
ក្រោយឈ្នះការដេញថ្លៃ នាយករដ្ឋមន្ត្រីអ៊ីតាលី លោក Giuseppe Conte បានហៅការឈ្នះនេះថា ជាជ័យជម្នះរបស់ប្រទេសអ៊ីតាលីជាលើកទី៣ សម្រាប់ការរៀបចំកីឡាដ៏ធំនេះ ដែលវានឹងធ្វើឲ្យពិភពលោក រឹតតែស្គាល់ប្រទេសចំណាស់ក្នុងតំបន់អឺរ៉ុបនេះ មួយកម្រិតទៀត។
មុនព្រឹត្តិការណ៍កីឡាអូឡាំពិករដូវរងាឆ្នាំ ២០២៦ មហាយក្សចិន នឹងដឹកនាំធ្វើម្ចាស់ផ្ទះនៅឆ្នាំ ២០២២ ក្នុងក្រុងប៉េកាំង បន្ទាប់ពីកូរ៉េខាងត្បូង បានប្រើប្រាសទីក្រុង Pyeongchang នៅឆ្នាំ២០១៨ រួចមក៕
Tag:
បាល់ទាត់
កីឡាអូឡាំពិក
អ៊ីតាលី
© រក្សាសិទ្ធិដោយ thmeythmey.com