ជាតិ
សង្គមជាតិ
ត្រឹមរយៈពេលមួយថ្ងៃ គណៈកម្មការត្រួតពិនិត្យ បានរកឃើញសំណង់គ្មានច្បាប់ ៥កន្លែងនៅព្រះសីហនុ
× ភ្នំពេញ៖ គណៈកម្មការត្រួតពិនិត្យគុណភាព និងលក្ខណៈបច្ចេកទេសនៃសំណង់ បានរកឃើញសំណង់អគារគ្មានច្បាប់សាងសង់ចំនួន ៥ កន្លែងនៅព្រះសីហនុ គិតត្រឹមយប់ថ្ងៃទី២៥ មិថុនា។ នេះបើយោងតាមប្រសាសន៍សម្ដេច ស ខេង រដ្ឋមន្ត្រីក្រសួងមហាផ្ទៃ។
សម្ដេច ស ខេង បានបញ្ជាក់ថា តួនាទីរបស់គណៈកម្មការពិសេសនេះ គឺនឹងត្រួតពិនិត្យលើសំណង់អគារទាំងអស់ ទាំងសំណង់សង់រួច ហើយកំពុងធ្វើដំណើរការអាជីវកម្ម និងសំណង់ដែលមិនទាន់សង់រួច។
ប្រមុខក្រសួងមហាផ្ទៃ បានថ្លែងប្រាប់អ្នកសារព័ត៌មាន ក្នុងទិវាប្រឆាំងគ្រឿងញៀនអន្តរជាតិ នៅរាជធានីភ្នំពេញនាព្រឹកថ្ងៃទី២៦ ខែមិថុនា ឆ្នាំ២០១៩ ថា៖«គ្រាន់តែយប់មិញខ្ញុំទទួលបានព័ត៌មានពីឯកឧត្ដម ជា សុផារ៉ា មកថា ជាបឋមមានសំណង់ ៥កន្លែង ដែលកំពុងសាងសង់ តែអត់មានច្បាប់ទាំងអស់។ ដូច្នេះនេះជាហានិភ័យមួយធំ ហើយយើងត្រូវធ្វើអាហ្នឹងទាំងអស់ឡើងវិញ»។
សម្តេចបានបន្ថែមថា ជំហានដំបូងគណៈកម្មការនឹងត្រួតពិនិត្យសំណង់អាគារក្នុងខេត្តព្រះសីហនុ មុនឈានទៅដល់ការត្រួតពិនិត្យទូទាំងប្រទេស នៅជំហានបន្ទាប់។
គួរបញ្ជាក់ថា គណៈកម្មការត្រួតពិនិត្យគុណភាពសំណង់ ត្រូវបានបង្កើតឡើង បន្ទាប់ពីកើតមានករណីបាក់រលំអគារកម្ពស់៧ជាន់នៅក្រុងព្រះសីហនុ នៅព្រឹកព្រលឹមថ្ងៃទី២២ខែមិថុនា។ ករណីបាក់អគារនេះ បានបណ្ដាលឲ្យមនុស្ស២៨នាក់ស្លាប់ និងរងរបួស២៦នាក់៕
© រក្សាសិទ្ធិដោយ thmeythmey.com