កីឡាជាតិ
ជាតិ
វឌ្ឍនាកា រកបានបីគ្រាប់ពេលបឹងកេតឈ្នះសៀមរាប ៦-០ ខណៈអគ្គិសនីកម្ពុជា និងអង្គរថាយហ្គឺរ គ្មានគ្រាប់បញ្ចូលទី
× ខ្សែប្រយុទ្ធឆ្នើម ចាន់ វឌ្ឍនាកា សម្រេចបាន៣គ្រាប់ម្នាក់ឯងក្នុងជ័យជម្នះ ៦-០ របស់បឹងកេតលើក្រុមសៀមរាប សម្រាប់ជំនួបជើងទី១វគ្គ១៦ក្រុមចុងក្រោយពានរង្វាន់សម្តេច ហ៊ុន សែន ថ្នាក់ជាតិកាលពីរសៀលថ្ងៃទី២៦ មិថុនា នៅកីឡដ្ឋានខេត្តសៀមរាប។ ចំណែកក្រុមលេខ៣ឆ្នាំចាស់អគ្គិសនីកម្ពុជាបានបញ្ចប់ដោយគ្មានការស៊ុតបញ្ចូលទីជាមួយភ្ញៀវអង្គរថាយហ្គឺរលើទឹកដីខ្លួន។
ការប្រកួតដំណើរការបាន៣នាទីភាពរីករាយសម្រាប់បឹងកេតក៏បានកើតឡើង បន្ទាប់ពីខ្សែប្រយុទ្ធ ម៉ុន វ៉ាន់ដា រកគ្រាប់បាល់នាំមុខម្ចាស់ផ្ទះសៀមរាប ១-០ ក្រោយការលើកបាល់ពីចម្ងាយរបស់ខ្សែការពារ លី វ៉ាហេទ។ បន្ទាប់មកខ្សែប្រយុទ្ធ ចាន់ វឌ្ឍនាកា ដែលទើបចុះកិច្ចសន្យាលេងឲ្យបឹងកេត បានបង្ហាញភាពអស្ចារ្យ តាមរយៈសម្រេចបាន៣គ្រាប់ជាប់គ្នានៅនាទី៣៥ ៥៣ និង៥៧ ដើម្បីបង្កើនការនាំមុខ ៤-០ សម្រាប់ក្រុមភ្ញៀវ។
៤គ្រាប់មិនទាន់ស្កប់ស្កល់ឡើយសម្រាប់ក្រុមភ្ញៀវមួយនេះ ពោលគឺនៅនាទី៨៦ខ្សែប្រយុទ្ធជើងចាស់ ឃួន ឡាបូរ៉ាវី សម្រេចបាន១គ្រាប់បន្ថែម មុនកីឡាករវ័យក្មេង ឱ ភារុណ សម្រេចគ្រាប់ទី៦ ដែលគ្រាប់ជ័យជម្នះ ៦-០ របស់បឹងកេតនៅនាទីទី៩០។ ជ័យជម្នះនេះជួយឲ្យបឹងកេតមានភាគរយខ្ពស់ក្នុងការឈ្នះកៅអីឡើងទៅវគ្គ៨ក្រុមចុងក្រោយនៃពានរង្វាន់សម្តេច ហ៊ុន សែន ថ្នាក់ជាតិ។
ចំណែកការប្រកួតនៅកីឡដ្ឋានអគ្គិសនីកម្ពុជា ក្រុមលេខ៣ឆ្នាំចាស់អគ្គិសនីកម្ពុជាបានត្រឹមស្មើ ០-០ ជាមួយក្រុមអង្គរថាយហ្គឺរ ទោះបីក្រុមទាំងពីរបានព្យាយាមបកដាក់គ្នាទៅវិញទៅមកយ៉ាងណាក៏ដោយ។ សម្រាប់ជំនួបនេះដែរ យើងសង្កេតឃើញថា ក្រុមទាំងពីរសុទ្ធតែបានបង្កើតឱកាសមាសរៀងៗខ្លួន តែពួកគេធ្វើមិនបានសម្រេច៕
Tag:
បាល់ទាត់
Hun Sen Cup
ចាន់ វឌ្ឍនាកា
© រក្សាសិទ្ធិដោយ thmeythmey.com