ជាតិ
នយោបាយជាតិ
សម្ដេច ស ខេង ផ្ដាំលោក គួច ចំរើន ថា ការបែងចែកផលប្រកបដោយសមធម៌ និងយុត្តិធម៌ គឺជាគន្លឹះល្អ
× ភ្នំពេញ៖ ពីពិធីប្រកាសចូលកាន់តំណែងអភិបាលខេត្តព្រះសីហនុថ្មី នៅព្រឹកថ្ងៃទី២៩ មិថុនា សម្ដេច ស ខេង រដ្ឋមន្ត្រីក្រសួងមហាផ្ទៃ បានផ្ដាំឲ្យលោក គួច ចំរើន បន្តការដឹកនាំអភិវឌ្ឍន៍ខេត្តទេសចរណ៍ ឲ្យកាន់តែមានសក្ដានុពលខ្លាំងក្លាថែមទៀត ដោយធ្វើយ៉ាងផ្ដល់ផលប្រយោជន៍ដល់ប្រជាពលរដ្ឋ ហើយចៀសវាងផ្ដល់ផលផ្លែផ្កាទៅដល់មនុស្សមួយក្រុម។
ថ្លែងចំពោះមុខថ្នាក់ដឹកនាំរដ្ឋបាលខេត្ត និងមន្ត្រីអាជ្ញាធរនានា សម្ដេច ស ខេង បានលើកយកបញ្ហាដីធ្លី សំណង់ និងការវិនិយោគនៅខេត្តព្រះសីហនុ ជំរុញឲ្យលោក គួច ចំរើន ដែលត្រូវគ្រប់គ្រងខេត្តនេះ ជំនួសលោក យន្ត មីន យកចិត្តទុកដាក់ដោះស្រាយឲ្យបានល្អ ដើម្បីបញ្ចៀសហានិភ័យណាមួយ ដែលអាចកើតឡើងជាយថាហេតុ។ តាមរយៈការណែនាំនេះ សម្ដេច ស ខេង ក៏ផ្ដាំឲ្យលោក គួច ចំរើន បន្តអភិវឌ្ឍន៍ខេត្តព្រះសីហនុប្រកបដោយសមធម៌ ក្នុងការផ្ដល់ប្រយោជន៍ដល់ប្រជាពលរដ្ឋក្នុងមូលដ្ឋាន ពោលគឺមិនត្រូវឲ្យមានការរិះគន់ថា ការអភិវឌ្ឍផ្ដល់ផលទៅមនុស្សមួយក្រុមនោះទេ។
រដ្ឋមន្ត្រីក្រសួងមហាផ្ទៃ បានលើកឡើងដូច្នេះថា៖« ត្រូវធានាដល់ការបែងចែកផលប្រកបដោយសមធម៌ និងយុត្តិធម៌។ នេះគឺជាកត្តាគន្លឹះមួយ ព្រោះមានការអភិវឌ្ឍខ្លះ វាបានទៅតែមនុស្សមួយក្រុម វាមិនបានទៅដល់ប្រជាពលរដ្ឋទូទៅ។ សួរថាតើ ការអភិវឌ្ឍនោះវាល្អទេ ប្រជាជនសប្បាយទេ ប្រជាជនគាំទ្រទេ គាត់មិនគាំទ្រទេ។ អ៊ីចឹងហើយខិតខំរកវិធី និងចាត់វិធានការនានាជាច្រើនដើម្បីធានាឲ្យការអភិវឌ្ឍនេះ វាបានទៅដល់មនុស្សគ្រប់គ្នា ទោះបីតិចឬច្រើន ដែលគេហៅថា សមធម៌។ វាមិនអាចថា ម្នាក់ៗអាចបាន១០០ដុល្លារគ្រប់គ្នាទេ ព្រោះជួនអីអ្នកខ្លះបាន៥០ដុល្លារ អ្នកខ្លះបាន១០០ដុល្លារ អ្នកខ្លះបាន១០០០ដុល្លារ អ្នកខ្លះបាន១០០០០ដុល្លារ ប៉ុន្តែធ្វើម៉េចឲ្យវាសមធម៌ ហើយបានទៅលើមនុស្សទូទៅ មិនមែនសម្រាប់មនុស្សមួយក្រុមទេ។ អ្នកមាន មានកប់ពពក អ្នកក្រ ក្របាត់ដី។ បញ្ហានេះ វាបង្កើតឲ្យមានសង្គមមួយអយុត្តិធម៌»។
ក្រៅពីនេះសម្ដេច ស ខេង ក៏ជំរុញឲ្យថ្នាក់ដឹកនាំ និងអាជ្ញាធរខេត្តព្រះសីហនុ ជួយដោះស្រាយការរកស៊ីរបស់ប្រជាពលរដ្ឋផង ខណៈដែលការវិនិយោគ និងអាជីវកម្មបរទេសមួយចំនួននៅក្នុងខេត្តនេះ កំពុងប្រជែងមុខរបរពលរដ្ឋក្នុងស្រុកជាខ្លាំង។
«ខ្ញុំបានឮប្រតិកម្មរបស់ប្រជាពលរដ្ឋដែរ ទាក់ទងនឹងការប្រកបមុខរបរគាត់។ គាត់ថាពីមុនអាចរកស៊ីបាន (គាត់ប្រាប់ថា)ខ្ញុំកាត់ក្រចក ធ្វើមុខ ធ្វើមាត់ កែសម្ផស្សអីហ្នឹង ឬក៏ហាងតូចតាចអីរបស់ខ្ញុំលក់ដាច់ ប៉ុន្តែឥឡូវដល់មានគេមក(លក់ដែរ) លែងដាច់។ ហើយយើងក៏ពិចារណាដែរថា ត្រូវធ្វើយ៉ាងម៉េចឥឡូវហ្នឹង តើយើងអាចធ្វើច្បាប់មួយ ហាមឃាត់ជនបរទេស មិនឲ្យប្រកបរបរណាមួយទេ។ ពីសង្គមមុនមាន(កំណត់) ទុកមុខរបរងាយៗឲ្យខ្មែរអ្នកធ្វើ ។ប៉ុន្តែយើងក៏គិតកត្តាមួយទៀតថា បើ(ហាមជនបរទេសលក់ដូរ) វាហាក់ដូចជាមានការរើសអើង។ ទី២ វាអត់មានការប្រកួតប្រជែង វាមិនទៅមុខទេ។ អ៊ីចឹងហើយបានថា បើគាត់ចង់លក់ដាច់ យើងត្រូវជួយគាត់ ការពារគាត់ ធ្វើម៉េចឲ្យគាត់មានមុខរបរហ្នឹងតទៀត ហើយអាចប្រកួតប្រជែងជាមួយគេបាន ហើយស្រូបយកអតិថិជនបាន ឧទាហរណ៍ម្ហូបអាហារ ណែនាំគាត់ឲ្យមានអនាម័យ ធានាសុវត្ថិភាពអ្នកហូប»។ នេះជាការលើកឡើងរបស់ប្រមុខក្រសួងមហាផ្ទៃ។
ងាកមកបញ្ហាដីធ្លីវិញ សម្ដេច ស ខេង បានសម្គាល់ឃើញថា វាកើតឡើងដោយសារតែអ្នកមានអំណាច រំលោភអំណាច ឬមានការក្លែងបន្លំឯកសារទិញលក់ រួមទាំងការរត់ការឯកសារខុសច្បាប់ជាដើម។ ជាមួយគ្នានេះរដ្ឋមន្ត្រីក្រសួងមហាផ្ទៃ ក៏ជំរុញឲ្យមានការដោះស្រាយបញ្ហាដីធ្លី ដោយផ្អែកលើគោលការណ៍ច្បាប់ជាធំ ចៀសវាងការប្រើប្រាស់ហិង្សា និងអំណាចរំលោភច្បាប់។
ចំណែកបញ្ហាគុណភាពសំណង់ , ហេដ្ឋារចនាសម្ព័ន្ធផ្លូវគមនាគមន៍ , ប្រព័ន្ធប្រឡាយលូ ទឹកកខ្វក់ ជំនន់ទឹកភ្លៀង រួមទាំងសន្ដិសុខនៅកោះរ៉ុង និងបណ្ដាកោះដែលចំណុះក្រុងព្រះសីហនុ សុទ្ធតែជាគោលដៅដែលថ្នាក់ដឹកនាំខេត្ត ត្រូវដោះស្រាយឲ្យមានប្រសិទ្ធភាព ដើម្បីឲ្យស្របតាមគោលការណ៍រដ្ឋាភិបាល ដែល គ្រោងប្រែក្លាយខេត្តព្រះសីហនុ ទៅជាតំបន់សេដ្ឋកិច្ចពិសេសគំរូពហុបំណង។ នេះជាការបញ្ជាក់របស់រដ្ឋមន្ត្រីក្រសួងមហាផ្ទៃ៕
Tag:
ស ខេង
គួច ចំរើន
រលំអគារ
© រក្សាសិទ្ធិដោយ thmeythmey.com