សៀមរាប៖ បច្ចុប្បន្ននេះ ដោយសារការយល់ដឹងទាក់ទងនឹងការបរិច្ចាគឈាមហាក់ទូលំទូលាយ គេសង្កេតឃើញមានពលរដ្ឋខ្មែរកាន់តែច្រើន ចូលរួមបរិច្ចាគឈាមនៅតាមមន្ទីរពេទ្យនានា។ ការបរិច្ចាគឈាម គឺជាការជួយសង្គ្រោះជីវិតមនុស្សដែលត្រូវការឈាមបន្ទាន់ក្នុងគ្រាអាសន្នណាមួយ។ ក្រុមយុវជនយល់ថា ការបរិច្ចាគឈាមគឺជាការផ្នែកមួយក្នុងការជួយសង្គមបែបប្រយោល ហើយវាជាកាតព្វកិច្ចដែលពួកគេគួរតែចូលរួម។
ព័ត៌មានលម្អិត សូមស្ដាប់បទយកការណ៍ដែលរៀបរៀងដោយអ្នកនាង អ៊ីសា រ៉ហានី ពីខេត្តសៀមរាបដូចតទៅ
ការបរិច្ចាគឈាមហាក់ស្ថិតក្នុងផ្លូវអវិជ្ជមានសម្រាប់ពលរដ្ឋខ្មែរកាលពីជាង១០ឆ្នាំមុន ដ្បិតពួកគេយល់ថា វិធីនេះមានគ្រោះថ្នាក់ឬប៉ះពាល់ដល់សុខភាពរាងកាយក្រោយបរិច្ចាគរួច។ សព្វថ្ងៃ អ្វីៗហាក់មានការផ្លាស់ប្ដូរច្រើន ព្រោះថាពលរដ្ឋខ្មែរជាច្រើន ពិសេសក្រុមយុវជនតែម្ដងបានបង្ហាញវត្តមានដ៏សកម្មរបស់ខ្លួនក្នុងពិធីបរិច្ចាគឈាម។
នៅបរិវេណមន្ទីរពេទ្យបង្អែកខេត្តសៀមរាប កាលពីពាក់កណ្ដាលខែមិថុនាកន្លងទៅ មានយុទ្ធនាការបរិច្ចាគឈាមជាទ្រង់ទ្រាយធំ ដែលរៀបចំឡើងដោយសមាគមសហគ្រិនវ័យក្មេងខេត្តសៀមរាបនិងសហការចូលរួមដោយធនាគារព្រីនស៍។ តាមរបាយការណ៍នៃអ្នករៀបចំកម្មវិធី យុវជនប្រមាណ ១៥០០នាក់បានចូលរួមក្នុងកម្មវិធីបរិច្ចាឈាមនេះ ក្នុងនោះមាន ជាង៤០០នាក់ដែលចូលរួមបរិច្ចាគ។
លោក ឡាយ គឹមសួរ ប្រធានសមាគមសហគ្រិនវ័យក្មេងខេត្តសៀមរាបបានលើកឡើងថា នេះជាឆ្នាំទី៣ហើយដែលសមាគមរបស់លោកបានរៀបចំយុទ្ធនាការបរិច្ចាគឈាមសម្រាប់មន្ទីរពេទ្យបង្អែកខេត្តសៀមរាប។ ជាអ្នករកស៊ីមួយរូប លោក គឹមសួរ យល់ថា ការធ្វើជំនួញត្រូវផ្សារភ្ជាប់ទៅនឹងការងារសង្គម ដ្បិតថាយើងបានចំណេញពីសង្គមហើយក៏គួរធ្វើអ្វីសម្រាប់តបស្នងទៅសង្គមវិញដែរ។ យុទ្ធនាការត្រឹម២ថ្ងៃនេះ មិនអាចប្រមូលឈាមជួយសង្គ្រោះពលរដ្ឋខ្មែរបានច្រើនក៏ពិតមែន តែលោក គឹមសួរ យល់ថា វាក៏អាចបណ្ដុះគំនិតដល់យុវជនឱ្យយល់ពីសារសំខាន់នៃការងារមួយនេះផងដែរ។
ដ្បិតថា យុទ្ធនាការគៀងគរយុវជនចូលរួមបរិច្ចាគឈាមរបស់សមាគមសហគ្រិនវ័យក្មេងរបស់លោក គឹមសួរ មានភាពផុសផុលពីមួយឆ្នាំទៅមួយឆ្នាំមានការកើនឡើងក៏ពិតមែន តែវានៅតែមិនគ្រប់គ្រាន់ទៅនឹងតម្រូវការដែលត្រូវការប្រចាំថ្ងៃឡើយ។ សម្រាប់លោក គឹមសួរ លោកចង់ឱ្យផ្គត់គំនិតនេះជ្រាបដល់ប្រជាពលរដ្ឋក្នុងក្រុងសៀមរាបដែលមានចំនួនប្រមាណ ២៥ម៉ឺននាក់នោះ ដើម្បីធានាថាគ្មានកង្វះឈាមតទៅទៀត។ «បើស្មារតីចូលរួមបែបនេះទៀត សូមជួយរហូត៤ខែមកម្ដងៗ (បរិច្ចាគឈាម) យើងមិនខ្វះឈាមប្រើ ហើយសមាគមសហគ្រិនវ័យក្មេងមិនបាច់ធ្វើយុទ្ធនាការនេះទៀតដែរ ដោយសារគ្រប់គ្នាយល់ដឹង សង្គមយើងពោរពេញដោយក្ដីស្រឡាញ់ ពោរពេញដោយការចែករំលែក»។ នេះជាការបញ្ជាក់បន្ថែមរបស់លោក គឹមសួរ។
យុវជន តាន់ វិសាល ជាគរុសិស្សមួយរូបក៏បានចូលរួមក្នុងកម្មវិធីបរិច្ចាគឈាមនៅមជ្ឈមណ្ឌលផ្តល់ឈាមរបស់មន្ទីរពេទ្យខេត្តសៀមរាបដែរ។ ក្នុងនាមជាយុវជនមួយរូប វិសាល ចាត់ទុកការបរិច្ចាគឈាមនៅពេលនេះថាជាចំណែកមួយជួយជីវិតជនរងគ្រោះដែលមានតម្រូវការឈាមបន្ទាន់ ដែលធ្វើឱ្យពួកគេបានឃើញពន្លឺថ្ងៃឡើងវិញ។ វិសាល បានបង្ហាញអារម្មណ៍រីករាយក្រោយបរិច្ចាគឈាមរួច ហើយប្រាប់ថានឹងចូលរួមទៀតនៅលើកក្រោយៗ។ វិសាល ក៏ចង់ឱ្យយុវជនដទៃទៀតចូលរួមផងដែរ ដែលការងារនេះវិសាលយល់ថាជាកិច្ចការដែលយុវជនអាចធ្វើសម្រាប់ជួយសង្គមជាតិ។
ចំណែកឯយុវជន ម៉េក ម៉ាយ វិញក៏រីករាយក្រោយពេលបរិច្ចាគឈាមផងដែរ។ ម៉េក ម៉ាយ ថានេះជាលើកទី១សម្រាប់គេ ដែលបានបរិច្ចាគឈាមសម្រាប់ជួយសង្គម។ ម៉ាយថា ឈាមមួយប្លោករបស់ខ្លួនអាចជួយជីវិតមនុស្សបានម្នាក់។
ឱសថការី លឹម ហេង អនុប្រធានមន្ទីរពេទ្យបង្អែកខេត្តសៀមរាបទទួលបន្ទុកមជ្ឈមណ្ឌលផ្ដល់ឈាមបានឱ្យដឹងថា ការរៀបចំយុទ្ធនាការបរិច្ចាគឈាមនៅពេលនេះ គឺជារូបភាពដ៏ល្អដែលសហគ្រិនវ័យក្មេងបានធ្វើ។ លោកបន្ថែមថា សព្វថ្ងៃមានយុវជនជាច្រើនបានចូលរួមក្នុងយុទ្ធនាការនេះបើធៀបនឹងពេលមុនៗគឺខុសគ្នាឆ្ងាយ។ ពីមុន ពុំសូវមានអ្នកបរិច្ចាគទេព្រោះពួកគេយល់ថា ការបរិច្ចាគឈាមប៉ះពាល់ដល់សុខភាព។
នៅក្នុងមន្ទីរពេទ្យបង្អែកខេត្តសៀមរាបជំងឺដែលត្រូវការបញ្ចូលឈាមជាបន្ទាន់ រួមមានប្រភេទជំងឺវះកាត់ គ្រោះថ្នាក់ចរាចរណ៍ សម្រាលកូន លាងក្រពះពោះវៀនជាដើម។ តាមការបញ្ជាក់ពីឱសថការី លឹម ហេង តម្រូវការឈាមប្រចាំខែនៅក្នុងមន្ទីរពេទ្យនេះជាមធ្យមចន្លោះពី៤៥០ទៅ៥០០ប្លោក តែបរិមាណមានការកើនឡើងរហូត ព្រោះថាក្រៅពីទទួលព្យាបាលអ្នកជំងឺក្នុងខេត្តហើយ មន្ទីរពេទ្យនេះក៏មានអ្នកជំងឺមកពីបណ្ដាខេត្តជុំវិញផងដែរ។ ទាក់ទងនឹងតម្រូវការឈាមនេះ ក៏មានការផ្លាស់ប្ដូរសងពីគ្រួសារអ្នកជំងឺដែរ តែលោកគ្រូពេទ្យ លឹម ហេង បញ្ជាក់ថា ការប្ដូរផ្លាស់នេះមិនបានគ្រប់បរិមាណដែលបញ្ចូលនោះទេ ព្រោះតម្រូវការបញ្ចូលច្រើនជាងប្ដូរសង។
ក្រៅពីចាប់អារម្មណ៍ចំពោះការផ្លាស់ប្ដូរបរិបទនៃការយល់ដឹងពីការបរិច្ចាគឈាមហើយនោះ អនុប្រធានមន្ទីរពេទ្យបង្អែកខេត្តសៀមរាបក៏បានបកស្រាយចំពោះការលើកឡើងដែលថា ការបរិច្ចាគឈាមប៉ះពាល់សុខភាព។ តាមការពន្យល់របស់លោកគ្រូពេទ្យ បើទោះបីបូមឬមិនបានបូម ក៏ឈាមដែលកើតពីឆ្អឹងខ្នងមនុស្សរយៈពេល១២០ថ្ងៃនោះ នឹងបាត់បង់ទៅវិញតាមធម្មជាតិរបស់វា ហើយវានឹងកើតឡើងវិញដោយប្រព័ន្ធស្វ័យប្រវត្តិ និងគ្រប់បរិមាណដែលបាត់បង់នោះវិញ៕