រដ្ឋមន្ត្រីវប្បធម៌ ចង់រៀបចំច្បាប់កម្រិតការស្លៀកពាក់នៅក្រៅតំបន់ប្រាសាទ ក្រោយភ្ញៀវទេសចរខ្លះស្លៀកមិនសមរម្យ

ជាតិ

សង្គមជាតិ

រដ្ឋមន្ត្រីវប្បធម៌ ចង់រៀបចំច្បាប់កម្រិតការស្លៀកពាក់នៅក្រៅតំបន់ប្រាសាទ ក្រោយភ្ញៀវទេសចរខ្លះស្លៀកមិនសមរម្យ

30, Jun 2019 , 3:44 pm

រូបភាព

រូបពីហ្វេសប៊ុកលោក អ៊ឹម សុខរិទ្ធី បុរាណវិទូ ថតនៅម្ដុំផ្សារកណ្ដាល ក្រុងសៀមរាប

ដោយ: អុីសា រ៉ហានី (Isa Rohany)

សៀមរាប៖ រដ្ឋមន្ត្រីក្រសួងវប្បធម៌ និងវិចិត្រសិល្បៈ លោកស្រី ភឿង សកុណា ចង់រៀបចំច្បាប់កម្រិតការស្លៀកពាក់នៅក្រៅតំបន់ប្រាសាទ ដើម្បីការពារគុណតម្លៃវប្បធម៌ឲ្យកាន់តែរឺងមាំ។ ការបង្ហាញជំហររបស់រដ្ឋមន្ត្រីរូបនេះ ធ្វើឡើងក្រោយពីប្រជាពលរដ្ឋ រិះគន់លើភ្ញៀវទេសចរមួយក្រុម ដែលស្លៀកពាក់មិនសមរម្យ ក្នុងពេលដើរកម្សាន្តក្នុងក្រុងទេសចរណ៍វប្បធម៌សៀមរាប។

ភ្ញៀវទេសចរមួយក្រុម ដែលតាមការពិនិត្យភិនភាគទំនងជាក្រុមទេសចរប៉ែកអឺរ៉ុបនោះ បាននាំគ្នាស្លៀកពាក់មិនសមរម្យស្ទើរលេចលើលេចក្រោម ក្នុងពេលដើរកម្សាន្តក្នុងក្រុងទេសចរណ៍វប្បធម៌សៀមរាប កាលពីពេលថ្មីនេះ។ ដោយសារតែទង្វើរបែបនេះហើយ ទើបពលរដ្ឋខេត្តសៀមរាប បង្ហាញអារម្មណ៍មិនពេញចិត្ត ហើយស្នើឲ្យអាជ្ញាធររឹតបន្ដឹងការស្លៀកពាក់របស់ភ្ញៀវទេសចរទាំងនោះ។

លោក កៅ ហ្វលីព ប្រធានប្រតិបត្តិករទេសចរណ៍ខេត្តសៀមរាប បានប្រាប់សារព័ត៌មានតាមបណ្ដាញទំនាក់ទំនងសង្គមថា លោកមិនអាចទទួលយកបានទេចំពោះទង្វើភ្ញៀវទេសចរដែលស្លៀកពាក់មិនសមរម្យ ដើរពេញក្នុងក្រុងសៀមរាបឡើយ។ តាមការបញ្ជាក់ពីម្ចាស់សណ្ឋាគារមេម៉រមួយនេះ ទង្វើទាំងនោះគឺប្រាសចាកពីចក្ខុវិស័យរបស់រាជរដ្ឋាភិបាល ដោយចាត់ទុកខេត្តសៀមរាបជាគោលដៅទេសចរណ៍វប្បធម៌ អរិយធម៌ ហើយមានវប្បធម៌ដ៏រុងរឿង ។

ក្រៅពីថាទទួលយកមិនបានហើយ លោក ហ្វីលីព ក៏ចង់ឱ្យអាជ្ញាធរពាក់ព័ន្ធគួរមើលលើបញ្ហាទាំងនេះ និងគួរមានការផ្សព្វផ្សាយឱ្យបានទូលំទូលាយនៅតាមប្រាសាទ សណ្ឋាគារ ទីសាធារណ ព្រលានយន្តហោះ ឬតាមវេបសាយជាដើម។ លោកបន្ថែមថា៖« សូម្បីកាស៊ីណូ គេមិនអនុញ្ញាតឱ្យធ្វើនៅសៀមរាបផង ចុះទម្រាំស្លៀកពាក់ដូចអត់អីស្លៀកបែបនេះ ទទួលយកមិនបាន»។

ចំណែកលោក អ៊ឹម សុខរិទ្ធី បុរាណវិទូដ៏ល្បីឈ្មោះមួយរូបនៅកម្ពុជា បានបង្ហោះសារខ្លីអមដោយរូបភ្ញៀវទេសចរស្លៀកពាក់មិនសមរម្យ ដែលលោកថតបាននៅពេលកំពុងធ្វើដំណើរតាមរថយន្ត។ លោកបានសរសេរលើបណ្ដាញសង្គមហ្វេសប៊ុកដោយចោទជាសំណួរយ៉ាងខ្លីដូច្នេះថា៖«តើគួរកម្រិតការស្លៀកពាក់ទេនៅក្នុងក្រុងសៀមរាប»? ដោយលោកបានបញ្ជាក់នៅចុងឃ្លានេះថា ថតបាននៅរសៀលថ្ងៃទី២៨ មិថុនា ឆ្នាំ២០១៩។

ចំពោះបញ្ហានេះដែរ រដ្ឋមន្ត្រីក្រសួងវប្បធម៌ និងវិចិត្រសិល្បៈ លោកស្រី ភឿង សកុណា ក៏យល់ថាមិនសមភ្នែកដែរ។ តែយ៉ាងណារដ្ឋមន្ត្រីវប្បធម៌ ទទួលស្គាល់ថា បច្ចុប្បន្នអាជ្ញាធរមានសមត្ថកិច្ច អាចហាមឃាត់ភ្ញៀវទេសចរដែលស្លៀកពាក់មិនសមរម្យទាំងនោះ នៅត្រឹមតែបរិវេណតំបន់ប្រាសាទប៉ុណ្ណោះ តែមិនទាន់មានក្រិត្យក្រមណាមួយចំពោះករណីបែបនេះ នៅក្រៅពីតំបន់ប្រាសាទឡើយ។ បើតាមលោកស្រី សកុណា នៅតំបន់រមណីយដ្ឋានអង្គរ គឺមានក្រុមប្រតិបត្តិអង្គរ ដែលមិនអនុញ្ញាតឱ្យឲ្យភ្ញៀវទេសចរស្លៀកពាក់មិនសមរម្យចូលជាដាច់ខាត។ លោកស្រីពន្យល់ថា «អ្វីដែលខុសពីប្រពៃណីជាតិខ្មែរ គឺវាខុសហើយ»។

នៅពេលដែលសួរថាតើ អាចមានការគិតគួរពីការធ្វើច្បាប់នៅក្រៅតំបន់ប្រាសាទដែរឬទេ? រដ្ឋមន្ត្រីវប្បធម៌រូបនេះ មិនឆ្លើយឲ្យចំសំនួរឡើយ ដោយគ្រាន់តែបញ្ជាក់ថា ការរៀបចំច្បាប់នោះ គឺត្រូវការចូលរួមពីអន្តរក្រសួង និងភាគីពាក់ព័ន្ធ។

«ការងារនេះអាចធ្វើទៅបាន តែត្រូវមានអន្ដរក្រសួងចូលរួម ព្រោះវាស្មុគស្មាញបន្តិចហើយ ដើម្បីកំណត់ថាតើការអនុវត្តបានកម្រិតណា និងនៅតំបន់ណាខ្លះជាដើម ក្រៅពីខេត្តសៀមរាប»។ នេះជាការបញ្ជាក់របស់លោកស្រី ភឿង សកុណា ដែលចាត់ទុកថា រូបភាពភ្ញៀវទេសចរស្លៀកពាក់មិនសមរម្យនៅទីក្រុងសៀមរាប ជារឿងមិនគប្បីចំពោះភ្នែកមហាជន៕