Yudai Ogawa ចែកផ្លូវជាមួយអង្គរថាយហ្គឺរ ក្រោយជួយក្រុមឈរលេខ៣បណ្តោះអាសន្នក្នុងជើងទី១

កីឡាជាតិ

ជាតិ

Yudai Ogawa ចែកផ្លូវជាមួយអង្គរថាយហ្គឺរ ក្រោយជួយក្រុមឈរលេខ៣បណ្តោះអាសន្នក្នុងជើងទី១

02, Jul 2019 , 7:59 am

រូបភាព

ដោយ:

កីឡាករ Yudai Ogawa បានចែកផ្លូវជាមួយក្លិបអង្គរថាយហ្គឺរ ក្រោយរួមរស់បានពាក់កណ្តាលរដូវកាល។ ទោះបីរួមរស់រយៈពេលខ្លី ខ្សែបម្រើរូបនេះអះអាងថា គេមានអនុស្សាវរីយ៍ល្អៗជាច្រើននៅលើទឹកដីសៀមរាប ដែលត្រូវចងចាំ។

ក្លិបបាល់ទាត់អង្គរថាយហ្គឺរបានសរសេរសារលើទំព័រហ្វេសប៊ុកបង្ហាញអារម្មណ៍សោកស្តាយយ៉ាងខ្លាំងចំពោះការចាកចេញរបស់ខ្សែបម្រើ Yudai Ogwa។ តែយ៉ាងណាក្លិបនេះមិនបានបញ្ជាក់លម្អិតពីមូលហេតុនៃការចាកចេញនេះឡើយ។

ក្រោយជំនួបអង្គរថាយហ្គឺរយកឈ្នះអគ្គិសនីកម្ពុជា ៣-១ កាលពីថ្ងៃទី២៩ មិថុនា នៅកីឡដ្ឋានខេត្តសៀមរាប កីឡាករ Yudai Ogawa បាននិយាយក្នុងពិធីលាគ្នាថា ទោះបីរូបគេបានរួមរស់រយៈពេលខ្លីនៅលើទឹកដីខេត្តសៀមរាប តែគេមានអនុស្សាវរីយ៍ល្អៗជាច្រើនជាមួយក្លិបអង្គរថាយហ្គឺរ ដែលមិនអាចភ្លេចបាន។ ប៉ុន្តែកីឡាកររូបនេះ មិនបានលម្អិតពីអនុស្សាវរីយ៍ល្អៗទាំងនោះឡើយ។

សម្រាប់ខ្សែបម្រើវ័យ២៣ឆ្នាំរូបនេះ ការផ្ដល់ឱកាស និងលើកទឹកចិត្តពីសំណាក់ថ្នាក់ដឹកនាំក្លិប មិត្តរួមក្រុម និងអ្នកគាំទ្រ គឺជាកម្លាំងចិត្តយ៉ាងសំខាន់ចំពោះរូបគេ។ Yudai បន្ថែមថា ការចាកចេញរបស់គេ គឺមានការឯកភាពគ្នាតាំងពីមុនបើករដូវកាលមកម្ល៉េះ។

កីឡាករ Yudai Ogawa បានចុះកិច្ចសន្យារយៈពេល១ឆ្នាំលេងឲ្យក្លិបក្រសួងការពារជាតិក្នុងរដូវកាលឆ្នាំ២០១៨។ បន្ទាប់មករូបគេ ក៏បានផ្ទេរទៅលេងឲ្យក្លិបអង្គរថាយហ្គឺរនៅដើមរដូវកាលឆ្នាំ២០១៩ មុនចាកចេញនៅពេលនេះ។

Yudai បានជួយឲ្យក្លិបអង្គរថាយហ្គឺរបញ្ចប់ត្រឹមចំណាត់ថ្នាក់លេខ៣ក្នុងជើងទី១ នៃពានរង្វាន់ក្របខណ្ឌមិត្តហ្វូនខេមបូឌានលីគ ដោយមាន២៧ពិន្ទុ ក្រោយឈ្នះ៨ ស្មើ៣ និងចាញ់២។ ថាយហ្គឺរមានគម្លាត៦ពិន្ទុជាមួយក្រុមកំពូលតារាងព្រះខ័នរាជស្វាយរៀង៕