ក្រសួងរៀបចំដែនដី នគរូបនីយកម្ម និងសំណង់ ប្រកាសមិនដោះស្រាយបញ្ហាប្រជាពលរដ្ឋចំនួន ១៩៧គ្រួសារ ក្រោមហេតុផលថា មិនជាប់ពាក់ព័ន្ធនឹងករណីវិវាទដីធ្លីជាមួយក្រុមហ៊ុនដាំអំពៅផលិតស្ករសនោះទេ។ តែសង្គមស៊ីវិល ចាត់ទុកការសម្រេចរបស់ក្រសួងជារឿងមិនត្រឹមត្រូវ ដោយស្នើឲ្យស៊ើបអង្កេតលើករណីនេះម្ដងទៀត។
ក្នុងសេចក្តីប្រកាសព័ត៌មានរបស់ក្រសួងដែនដី បានឲ្យដឹងថា ក្រសួងបានដោះស្រាយករណីជម្លោះដីធ្លីរវាង ៩៨៧ គ្រួសារ និងក្រុមហ៊ុនដាំអំពៅផលិតស្ករសនាំចេញក្នុងភូមិសាស្ត្រខេត្តកោះកុង រួចរាល់ជាស្ថាពរហើយ។ ចំណែកពលរដ្ឋ១៩៧គ្រួសារ ដែលឡើងមកតវ៉ានៅព្រឹកថ្ងៃទី១ កក្កដានេះ ក្រសួង មិនដោះស្រាយបញ្ហានោះឡើយ ដោយសារតែមិនជាប់ពាក់ព័ន្ធនឹងករណីដីធ្លីនេះ។
សេចក្តីប្រកាសព័ត៌មានរបស់ក្រសួង បានស្នើឲ្យអាជ្ញាធរចាត់វិធានការតាមផ្លូវច្បាប់លើពលរដ្ឋទាំងនោះផងដែរ។
ជុំវិញបញ្ហាខាងលើនេះលោក ហួរ អ៊ីន មន្ត្រីនៃអង្គការលីកាដូប្រចាំខេត្តកោះកុង បាននិយាយថា ប្រជាពលរដ្ឋ១៩៧ គ្រួសារពិតជាមានជម្លោះជាមួយនឹង ឧកញ៉ា ហេង ហ៊ុយ ដែលទទួលបានដីសម្បទានសេដ្ឋកិច្ចពីរដ្ឋាភិបាលយកទៅដាំ និងផលិតស្ករអំពៅមែន ។ហើយមកដល់ពេលនេះមិនទាន់ទទួលបានសំណងនោះទេ។
ត្រង់ចំណុចនេះលោក អ៊ីន បានបញ្ជាក់ថា ការដោះស្រាយរបស់ក្រសួងលើករណីប្រជាពលរដ្ឋ៩៨៧ គ្រួសារ គឺជាករណីមួយផ្សេងទៀត ដែលទាក់ទងនឹងករណីជម្លោះដីសម្បទានសេដ្ឋកិច្ចរបស់លោកឧកញា លី យ៉ុងផាត ដែលលក់ឲ្យក្រុមហ៊ុនថៃមួយ បន្តអនុវត្តការងារបច្ចុប្បន្នប៉ុណ្ណោះ។ រីឯករណីពលរដ្ឋ ១៩៧គ្រួសារ ដែលមានទំនាស់ដីធ្លីជាមួយ ឧកញ៉ា ហេង ហ៊ុយ ជាករណីផ្សេងមួយទៀត។
ថ្លែងប្រាប់សារព័ត៌មានថ្មីៗ មន្ត្រីអង្គការលីកាដូប្រចាំខេត្តកោះកុង ដែលតាមដានលើករណីដីធ្លីនេះ បាននិយាយថា៖«ខ្ញុំបានអានលិខិតរបស់ក្រសួងដែរ គាត់បានអះអាងថាបានដោះស្រាយចប់លើករណីដីធ្លី ៩៨៧ គ្រួសារ។ ការដោះស្រាយចប់នេះ គឺជាប្រជាពលរដ្ឋដែលរងផលប៉ះពាល់ជាមួយក្រុមហ៊ុនស្ករអំពៅ (ក្រុមហ៊ុនថៃ) វាជាករណីពីរផ្សេងទៀត ។ ហើយវាមិនមែនជាដំណោះស្រាយលើករណីប្រជាពលរដ្ឋដែលរងផលប៉ះពាល់ជាមួយនឹងលោក ឧកញ៉ា ហេង ហ៊ុយ នោះទេ»។
ជាមួយគ្នានេះលោក ហួរ អ៊ីន ស្នើឲ្យរដ្ឋាភិបាលចុះស៊ើបអង្កេតបន្តែមលើករណីនេះឲ្យបានច្បាស់លាស់ជាមុនសិន មុននឹងច្រានចោលលើបណ្ដឹងរបស់ពលរដ្ឋរងគ្រោះ។
នៅព្រឹកថ្ងៃទី១ ខែកក្កដានេះ មានប្រជាពលរដ្ឋចំនួន ១៩៧ គ្រួសារមកពីឃុំជីខ ស្រុកស្រែអំបិល ខេត្ត កោះកុង ដែលអះអាងថា ខ្លួនមានជម្លោះដីធ្លីជាមួយក្រុមហ៊ុន ហេង ហ៊ុយ បានមកដាក់ញត្តិនៅក្រសួងដែនដី ដើម្បីឲ្យក្រសួងជួយរកដំណោះស្រាយដល់ពួកគេ។ ប្រជាពលរដ្ឋទាំងនោះ បានដាក់ញាតិនៅក្រសួងដែនដី ដោយទាមទារសំណងដីចំនួន ២ ហិចតា និងប្រាក់សំណង ៧ពាន់ដុល្លារ។
គួរបញ្ជាក់ថា ករណីជម្លោះដីធ្លីរបស់ពលរដ្ឋជិត២០០គ្រួសារខាងលើ ដែលស្ថិតនៅឃុំជីខ ស្រុកស្រែអំបិល ខេត្តកោះកុងនេះ បានកើតឡើងតាំងពីឆ្នាំ២០០៩ មកម្ល៉េះ។ នេះបើតាមមន្ត្រីអង្គការលីកាដូ៕