ជាតិ
សេដ្ឋកិច្ច
បន្ទាប់ពីកម្ពុជាចូលបណ្ដាញអន្តរជាតិឫស្សីផ្ដៅ ក្រុមហ៊ុនក្នុងស្រុកមួយគ្រោងដាំឫស្សី១ម៉ឺនហិកតា
រូបពីក្រសួងកសិកម្ម
×![]()
ភ្នំពេញ៖ ក្រុមហ៊ុនក្នុងស្រុកកំពុងសំឡឹងមើលឱកាសក្នុងវិស័យផ្ដៅឫស្សីជាបណ្ដើរៗ ខណៈកម្ពុជាបានចូលជាសមាជិកអង្គការបណ្ដាញអន្តរជាតិផ្ដៅនិងឫស្សីនាពេលថ្មីៗនេះ។
ក្រុមហ៊ុនអានម៉ាឌីគ្រុប ដែលជាក្រុមហ៊ុនក្នុងស្រុក ក្នុងពេលថ្មីៗនេះ បានគ្រោងវិនិយោគក្នុងការដាំឫស្សីជាលក្ខណៈផលិតកម្មលើទំហំដី ១ម៉ឺនហិកតា និងបង្កើតរោងចក្រកែច្នៃទៅជាផលិតផលប្រើប្រាស់។ លោក អាន ម៉ាឌី ត្រូវបានស្រង់សំដីនៅលើហ្វេសប៊ុកក្រសួងកសិកម្មថា៖«ដោយយល់ឃើញពីសក្ដានុពលនៃផលិតកម្មឫស្សី និងដើម្បីចូលរួមអភិវឌ្ឍន៍ផលិតកម្មឫស្សី ស្របតាមខ្លឹមសារនៃច្បាប់ថ្មីនេះ ក្រុមហ៊ុននឹងដាំជាលក្ខណៈផលិតកម្មលើផ្ទៃដីចំនួន១ម៉ឺនហិកតា និងបង្កើតរោងចក្រកែច្នៃជាសម្ភារ និងគ្រឿងសង្ហារិមច្រើនប្រភេទសម្រាប់ផ្គត់ផ្គង់ឲ្យតម្រូវការក្នុងស្រុក និងនាំចេញ»។ សព្វថ្ងៃនេះ ក្រុមហ៊ុនមួយនេះកំពុងដាំឫស្សីលើផ្ទៃដី២៥ហិកតាសម្រាប់ធ្វើជាពូជ។
រដ្ឋមន្ត្រីក្រសួងកសិកម្ម លោក វេង សាខុន នៅថ្ងៃទី៣០ខែមិថុនាបានទៅចូលរួមដាំឫស្សីជានិមិត្តរូបជាមួយក្រុមហ៊ុនខាងលើនេះ នៅស្រុកអូររាំងឳ ខេត្តត្បូងឃ្មុំ។ ក្រសួងកសិកម្មបានអះអាងថា សកម្មភាពដាំឫស្សីជានិមិត្តរូបនេះ គឺចង់បញ្ជាក់ថាក្រសួងកសិកម្ម រុក្ខាប្រមាញ់ និងនេសាទចាប់ផ្ដើមអនុវត្តច្បាប់ស្ដីពីការបង្កើតអង្គការបណ្ដាញអន្តរជាតិសម្រាប់ឫស្សី និងផ្ដៅ ដែលច្បាប់នេះទើបត្រូវបានព្រឹទ្ធសភាអនុម័តនៅថ្ងៃទី២៥ខែមិថុនាឆ្នាំនេះ។
ក្រសួងគូសបញ្ជាក់ដូចនេះទៀតថា៖«ច្បាប់នេះមានគោលបំណងលើកកម្ពស់ជីវភាពប្រជាពលរដ្ឋ សហគមន៍ ក្រុមហ៊ុន ដោយជំរុញនិងលើកទឹកចិត្តពួកគេតាមរយៈយន្តការនៃការដាំដុះ ថែរក្សា កែច្នៃ និងប្រើប្រាស់ដើម្បីលើកតម្កើងគុណតម្លៃវត្ថុធាតុដើមដែលមានតម្លៃសេដ្ឋកិច្ចនិងសង្គមមួយនេះ»។
លោក វេង សាខុន បានឲ្យដឹងថា គម្រោងវិនិយោគរបស់ក្រុមហ៊ុនអានម៉ាឌីនេះនឹងចូលរួមអភិវឌ្ឍន៍ធនធានឫស្សីប្រកបដោយនិរន្តរភាព និងទាញយកប្រយោជន៍សម្រាប់សង្គម សេដ្ឋកិច្ច បរិស្ថាន និងបង្កើតគម្របព្រៃឈើ។ ជាមួយគ្នានេះរដ្ឋមន្ត្រីកសិកម្មរូបនេះបានស្នើឲ្យក្រុមហ៊ុនសហការជាមួយរដ្ឋបាលព្រៃឈើ បង្កាត់ពូជឫស្សីឲ្យបានច្រើនដើម្បីផ្សព្វផ្សាយជូនក្រុមហ៊ុនផ្សេងៗដែលមានបំណងចង់ដាំឫស្សី និងប្រជាសហគមន៍ ដើម្បីដាំ ប្រមូលផលប្រើប្រាស់តាមតម្រូវការ កាត់បន្ថយការប្រើប្រាស់ឈើ និងលើកតម្កើងកម្រិតជីវភាព»៕
Tag:
ផ្ដៅ
ឫស្សី
© រក្សាសិទ្ធិដោយ thmeythmey.com
