កីឡាជាតិ
ជាតិ
កីឡាករ Dzarma Bata (ឆ្វេង) និង Booysen Shane ចូលរួមជាមួយភ្នំពេញក្រោន, រូបពីក្លិបភ្នំពេញក្រោន
×![]()
កីឡាករអាហ្វ្រិកខាងត្បូង Booysen Shane បានត្រឡប់ទៅរួមរស់ជាមួយទ្រនំចាស់ភ្នំពេញក្រោន ក្រោយចែកផ្លូវគ្នាជាមួយអគ្គស្នងការដ្ឋាននគរបាលជាតិ។ ខ្សែប្រយុទ្ធនីហ្សេរីយ៉ា Dzarma Bata ដែលទើបចែកផ្លូវជាមួយក្រសួងការពារជាតិ ក៏ចូលរួមជាមួយក្លិបជើងឯកសម័យកាលនេះដែរ។ ភ្នំពេញក្រោនរំពឹងវត្តមានកីឡាករទាំងពីរ ចូលរួមចំណែកជួយបំពេញចំណុចខ្វះខាតរបស់ក្លិបឲ្យកាន់តែប្រសើរនៅជើងទី២។
ខ្សែប្រយុទ្ធ Booysen Shane ដែលធ្លាប់ចំណាយពេលរួមរស់ជាមួយភ្នំពេញក្រោនពីឆ្នាំ២០១៥-២០១៧ បានត្រឡប់មកចូលរួមជាមួយក្លិបនេះវិញហើយ នៅជើងទី២ពានរង្វាន់ក្របខណ្ឌមិត្តហ្វូនខេមបូឌានលីគរដូវកាលនេះ។ ការត្រឡប់មករកទ្រនំចាស់របស់កីឡាកររូបនេះ បន្ទាប់ពីរូបគេចែកផ្លូវគ្នាជាមួយអគ្គស្នងការដ្ឋាននគរបាលជាតិ ក្រោយរួមរស់បានពាក់កណ្តាលរដូវកាល។ មុនផ្ទេរមកក្លិបប៉ូលិសនៅរដូវកាលឆ្នាំ២០១៩ រូបគេធ្លាប់លេងឲ្យក្លិបព្រះខ័នរាជស្វាយរៀងនៅរដូវកាលឆ្នាំ២០១៨។
ជាមួយគ្នានេះ កីឡាករពោរពេញដោយបទពិសោធ Dzarma Bata ដែលទើបចែកផ្លូវជាមួយក្រសួងការពារជាតិ ក៏បានចូលរួមជាមួយភ្នំពេញក្រោននៅជើងទី២រដូវកាលនេះដែរ។ សម្រាប់ការរួមរស់ពាក់កណ្តាលរដូវកាល ខ្សែប្រយុទ្ធនីហ្សេរីយ៉ារូបនេះ បានក្លាយជាក្លាយជាកីឡាកររកគ្រាប់បានច្រើនជាងគេប្រចាំក្លិប បន្ទាប់ពីរូបគេសម្រេចបាន១៣គ្រាប់ម្នាក់ឯងក្នុងជើងទី១។
Bata បានមកប្រកបអាជីពបាល់ទាត់លើទឹកដីកម្ពុជាដំបូងក្នុងអំឡុងឆ្នាំ២០១៤ ជាមួយក្លិបព្រះខ័នរាជស្វាយរៀង ហើយរូបគេបានក្រសោបយកស្បែកជើងមាសពានរង្វាន់ក្របខណ្ឌមិត្តហ្វូនខេមបូឌានលីគនៅរដូវកាលនោះតែម្តង។ កីឡាកររូបនេះ ក៏ធ្លាប់លេងឲ្យក្លិបបឹងកេត អង្គរថាយហ្គឺរ អាស៊ីអឺរ៉ុប និងសូលទីឡូអង្គរផងដែរ៕
Tag:
ភ្នំពេញក្រោន
Booysen Shane
Dzarma Bata
© រក្សាសិទ្ធិដោយ thmeythmey.com
