ជាតិ
លោក គួច ចំរើន ចុះផ្អាកការដ្ឋានសំណង់បីកន្លែងរបស់ចិន ដើម្បីពិនិត្យបច្ចេកទេស រូបភាពពីក្រសួងព័ត៌មាន អគារដែលត្រូវផ្អាកការសាងសង់
× លោក គួច ចំរើន ដែលទើបនឹងត្រូវផ្លាស់ឲ្យទៅធ្វើជាអភិបាលខេត្តព្រះសីហនុ បានដឹកនាំមន្រី្តជំនាញ ចុះទៅពិនិត្យការដ្ឋានសំណង់គ្រោងដែក៣កន្លែងរបស់វិនិយោគិនចិន នៅភូមិ២ សង្កាត់លេខ៤ ក្រុងព្រះសីហនុ ហើយបានសម្រេចបញ្ឈប់សកម្មភាពសាងសង់ ដើម្បីឲ្យក្រុមបច្ចេកទេសពិនិត្យបច្ចេកទេស។ នេះបើតាមការផ្សាយលើទំព័រហ្វេសប៊ុករបស់រដ្ឋបាលខេត្តព្រះសីហនុ។
ការចុះពិនិត្យនេះ ធ្វើឡើងកាលនៅថ្ងៃទី២ ខែកក្កដា ឆ្នាំ២០១៩ ដោយសម្រេចឲ្យបញ្ឈប់ការសាងសង់ បន្ទាប់ពីក្រុមជំនាញត្រួតពិនិត្យហើយ ទើបឲ្យដំណើរការសាងសង់បន្ត។ លោក គួច ចំរើន ក៏ឆ្លៀតទៅពិនិត្យអាហារដ្ឋានជនជាតិជប៉ុន ដែលរងការខូចខាតទាំងស្រុង ពីការបាក់អគារ៧ជាន់ កាលពីថ្ងៃទី២២មិថុនាផងដែរ។
បន្ទាប់ពីពិនិត្យរួច លោកអភិបាលខេត្ត បានឲ្យមន្ត្រីជំនាញ ជួយសម្រួលនិងពន្លឿនការធ្វើលិខិតអនុញ្ញាតក្នុងការសាងសង់ ជូនជនជាតិជប៉ុននោះ ដើម្បីបានបើកអាជីវកម្មឡើងវិញ៕
រូបភាពពីក្រសួងព័ត៌មាន អគារដែលត្រូវផ្អាកការសាងសង់
© រក្សាសិទ្ធិដោយ thmeythmey.com