ពីនេះ ពីនោះ
«ដែល» ជាពាក្យប្រាប់ពីដំណើរនៃអំពើ ចំណែក «ដែរ»បង្ហាញពីដំណើរដូចគ្នា
×![]()
ដោយ: ថ្មីៗ
«ដែល» និង«ដែរ» ជាពាក្យដែលបញ្ចេញសូរសៀងដូចគ្នា ហើយក៏ជាពាក្យដែលមហាជនខ្លះបង្កើតជាកំហុសក្នុងការប្រើប្រាស់នៃពាក្យទាំងពីរនេះផងដែរ។ វចនានុក្រមខ្មែររបស់សម្តេច ជួន ណាត ពន្យល់ពាក្យ«ដែល» ចង់ប្រាប់បីដំណើរនៃអំពើអ្វីមួយ សម្រាប់និយាយភ្ជាប់នាំមុខនាមសព្ទ ចំណែក«ដែរ»ជានិបាតសព្ទ ចង់បង្ហាញពីដំណើរអ្វីមួយដូចគ្នា។ 
ចំពោះពាក្យ«ដែល»មានន័យពីរបែប មួយជាអាយតនិបាត ជាពាក្យប្រាប់ដំណើរនៃអំពើ សម្រាប់និយាយភ្ជាប់នាំមុខនាមសព្ទ ដូចជា ការដែលខ្ញុំធ្វើ,ពាក្យដែលគេនិយាយ,ដំណឺងដែលខ្ញុំឮ,សាលារៀនដែលរាជការចំណាយប្រាក់ឲ្យសង់។
ចំណែក «ដែល»ជានាមសព្ទវិញមានន័យថា សំណល់,របស់ដែលសល់ ឬដែលគេប្រើប្រាស់ហើយ។ ឧទាហរណ៍៖ ស៊ីបាយដែលគេ,ស្លៀកសំពត់ដែលគេ។ ថ្វីដ្បិតពាក្យនេះ មានន័យពីរបែបយ៉ាងណាក្តី ក៏គេមិនអាចច្រឡំគ្នាជាមួយនឹងពាក្យ «ដែរ»ផងដែរ ប្រសិនគេ និយាយទៅដល់អ្វីដែលសល់ពីគេ ឬដំណើរអ្វីមួយដែលបង្ហាញពីទង្វើនោះ។
ដោយឡែក ពាក្យ«ដែរ» មានន័យថា ដូចគ្នា បានដូចគ្នា,ផង។ ឧទាហរណ៍៖ ខ្ញុំសុំទៅដែរ, អ្នកចង់ទៅផ្សារជាមួយខ្ញុំដែរទេ? សម្រេចដូច្នេះក៏បានដែរ, ល្អគ្រាន់បើដែរ, ធ្វើអ៊ីចឹងក៏ល្អម្យ៉ាងដែរ។ល៕
Tag:
ពន្យល់ពាក្យ
© រក្សាសិទ្ធិដោយ thmeythmey.com
