កីឡាអន្តរជាតិ
អន្តរជាតិ
Copa America៖ អ្នកចម្រៀងដ៏ល្បីម្នាក់ សន្យាឲ្យកីឡាករប៉េរូថើបម្នាក់១ខ្សឺត បើឈ្នះស៊ីលីឡើងវគ្គផ្តាច់ព្រ័ត្រ
× តារាសម្តែង និងជាអ្នកចម្រៀងដ៏ល្បីល្បាញម្នាក់របស់ប៉េរូនាង Stephanie Cayo នឹងផ្តល់ឲ្យកីឡាករបាល់ទាត់ប៉េរូទាំងអស់ថើបម្នាក់មួយខ្សឺត ដើម្បីជាការលើកទឹកចិត្ត ប្រសិនបើពួកគេអាចជួយក្រុមជម្រើសជាតិយកឈ្នះស៊ីលី ឡើងដល់វគ្គផ្តាច់ព្រ័ត្រពានរង្វាន់ Copa America ឆ្នាំ២០១៩។
ក្រុមកីឡាបាល់ទាត់ជម្រើសជាតិប៉េរូ នឹងត្រូវតទល់ជាមួយម្ចាស់ការពារតំណែងជើងឯកស៊ីលី ដើម្បីប្រជែងគ្នាឡើងទៅជួបម្ចាស់ផ្ទះប្រេស៊ីលនៅវគ្គផ្តាច់ព្រ័ត្រ។ សម្រាប់ជំនួបវគ្គពាក់កណ្តាលផ្តាច់ព្រ័ត្រដែលនឹងធ្វើឡើងនៅ ព្រឹកថ្ងៃទី៤ ខែកក្កដា វេលាម៉ោង ៧:៣០នាទី [ម៉ោងនៅកម្ពុជា] នោះត្រូវបានគេរំពឹងថា ប៉េរូមានភាគរយតិចណាស់ក្នុងការយកឈ្នះស៊ីលី។
ប៉ុន្តែរឿងដ៏គួរឲ្យភ្ញាក់ផ្អើលមួយបានកើតឡើងនៅមុនជំនួបរវាងក្រុមទាំងពីនេះ។ តារាសម្តែងដ៏មានប្រជាប្រិយភាព Stephanie Cayo បានប្រកាសនៅថ្ងៃទី៣ ខែកក្កដា ដោយសន្យាថានឹងឲ្យកីឡាករប៉េរូថើបថ្ពាល់ម្នាក់ម្តង ដើម្បីផ្តល់ការលើកទឹកចិត្តសម្រាប់ក្រុមជម្រើសជាតិរបស់នាងយកឈ្នះស៊ីលីឡើងទៅជួបប្រេស៊ីល។ នាងបញ្ជាក់ថា នេះជាការរួមចំណែកជួយប្រទេសរបស់នាង។
Stephanie វ័យ៣១ឆ្នាំ ដែលជាតារាសម្តែងផង អ្នកចម្រៀង អ្នកនិពន្ធបទចម្រៀង និងជាតារាម៉ូឌែលផងនោះ បានសរសេរនៅលើបណ្តាញសង្គម Twitter របស់នាងថា៖«ខ្ញុំចង់ផ្តល់ការថើបទៅក្រុមកីឡាករជម្រើសជាតិប៉េរូ។ ខ្ញុំនិយាយមែន ហើយសន្យាផ្តល់ការថើបឲ្យពួកគេ ប្រសិនបើប៉េរូអាចយកឈ្នះស៊ីលីបាន»។ សារដ៏រំភើបនេះមានអ្នកចុច Like ៨ពាន់នាក់ និងមានអ្នកចូលរួមផ្តល់មតិយោបល់ចំនួន៧ពាន់នាក់។
ប៉េរូធ្លាប់លើកពានរង្វាន់ប្រចាំតំបន់អាមេរិកឡាទីននេះ ពីរលើករួចមកហើយ ក្នុងឆ្នាំ១៩៣៩ និង១៩៧៥ ហើយនេះក៏ជាលើកទី៣ផងដែរ ដែលពួកគេឈានដល់វគ្គពាក់កណ្តាលផ្តាច់ព្រ័ត្រសម្រាប់ព្រឹត្តិការណ៍៤លើកចុងក្រោយ។
សម្រាប់គូប្រជែងស៊ីលីវិញ ពួកគេជាក្រុមដែលត្រូវការពារតំណែងជើងឯកនេះ និងជាម្ចាស់ពាន Copa America ចំនួនពីរលើកដូចប៉េរូដែរ៕
Tag:
Copa America
Stephanie Cayo
ប៉េរូ
© រក្សាសិទ្ធិដោយ thmeythmey.com