ជាតិ
សង្គមជាតិ
រូបពីក្រសួងព័ត៌មាន
×![]()
ភ្នំពេញ៖ ក្រសួងអប់រំ យុវជន និងកីឡា បានសម្រេចបង្កើតអនុវិទ្យាល័យថ្មីមួយខ្នង មាន៥បន្ទាប់ នៅតំបន់អភិវឌ្ឍដីសម្បទានសង្គមកិច្ច ក្នុងឃុំទីពោ ស្រុកសន្ទុក ខេត្តកំពង់ធំ។ ការបង្កើតអនុវិទ្យាល័យថ្មីនេះ គឺជាគម្រោងបែងចែកដីសង្គមកិច្ច និងការអភិវឌ្ឍសេដ្ឋកិច្ចជំហានទី២ ដែលហៅកាត់ថា ឡាហ្សិតជំហាន២ ដើម្បីជួយសម្រាលការលំបាកដល់សិស្សនៅក្នុងសហគមន៍។ 
លោក ដោក ដូម៉ា អគ្គនាយករងនៃអគ្គនាយកដ្ឋានលំនៅដ្ឋាននៃក្រសួងរៀបចំដែនដី និងជានាយកគម្រោងឡាហ្សិតជំហាន២ បានលើកឡើងថា អនុវិទ្យាល័យនេះ នឹងដើរតួនាទីយ៉ាងសំខាន់ក្នុងការកាត់បន្ថយអត្រាបោះបង់ចោលការសិក្សារបស់សិស្សានុសិស្សនៅក្នុងតំបន់នេះ។ កន្លងមកអត្រានៃការបោះបង់ការសិក្សាបន្ទាប់ពីបញ្ចប់ថ្នាក់បឋមសិក្សា (បឋមសិក្សាអូរធំ)នៃសិស្សទាំងនោះ គឺដោយសារតែអនុវិទ្យាល័យដែលពួកគេត្រូវទៅរៀន មានចម្ងាយឆ្ងាយសពីសហគមន៍។ នេះបើតាមការចុះផ្សាយរបស់ក្រសួងព័ត៌មាន។
លោក រស់ សុវាចា អ្នកនាំពាក្យក្រសួងអប់រំ ប្រាប់សារព័ត៌មានThmeyThmey ថា ក្រសួង នឹងរៀបចំចេញប្រកាស សម្រាប់ឆ្នាំសិក្សាថ្មីខាងមុខនេះ ស្តីពីការផ្តល់អគារសិក្សាកម្រិតអនុវិទ្យាល័យនេះ ដែលនឹងចាប់ផ្តើមសាងសង់នៅក្នុងខែកក្កដា ឆ្នាំ២០១៩ ហើយនឹងត្រូវបញ្ចប់នៅក្នុងរយៈពេល៧ខែបន្ទាប់ ក្រោមកិច្ចសហការជាមួយធនាគារពិភពលោក(World Bank) និងគ្រប់ភាគីពាក់ព័ន្ធ។ បើតាមអ្នកនាំពាក្យ អគារសិក្សានេះ នឹងចំណាយទឹកប្រាក់ប្រមាណ៧,៨ម៉ឺនដុល្លារ។
សូមជំរាបថា សាលាបឋមសិក្សាអូរធំ ស្ថិតក្នុងតំបន់អភិវឌ្ឍគម្រោងបែងចែកដីសង្គមកិច្ច និងការអភិវឌ្ឍសេដ្ឋកិច្ចជំហាន២ ដែលមានសិស្សប្រហែល១៥០នាក់។ អនុវិទ្យាល័យថ្មី នឹងត្រូវសាងសង់ក្នុងបរិវេណសាលាបឋមសិក្សាអូរធំតែម្តង៕
Tag:
អប់រំ
អនុវិទ្យាល័យ
© រក្សាសិទ្ធិដោយ thmeythmey.com
