ធ្លាយវិញ្ញាសាគណិតនៅបារាំង គ្រូកូដកម្មតវ៉ា រីឯសិស្សមួយចំនួនត្រូវបានចាប់ខ្លួន

អន្តរជាតិ

ធ្លាយវិញ្ញាសាគណិតនៅបារាំង គ្រូកូដកម្មតវ៉ា រីឯសិស្សមួយចំនួនត្រូវបានចាប់ខ្លួន

04, Jul 2019 , 8:19 pm

រូបភាព

ដោយ: ធីតា

ការប្រឡងសញ្ញាបត្រថ្នាក់មធ្យមសិក្សានៅបារាំង បង្កឲ្យមានបញ្ហាច្របូកច្របល់យ៉ាងខ្លាំង ខណៈគ្រូបង្រៀនជាច្រើនធ្វើកូដកម្មតវ៉ា មិនកែសំណៅវិញ្ញាសា ដោយសារតែការបែកធ្លាយវិញ្ញាសាគណិតវិទ្យានៅពេលប្រឡង ហើយ សិស្សប្រមាណ២០ត្រូវបានចាប់ខ្លួន។

ប៉ូលិសបានចាប់ខ្លួនសិស្សចំនួន១៩នាក់ កាលពីថ្ងៃអង្គារ និងថ្ងៃពុធ កន្លងមក នៅក្រុង Marseille និងក្រុងប៉ារីស បន្ទាប់ពីការស៊ើបអង្កេតបានរកឃើញថា សិស្សរាប់ពាន់នាក់ដឹងពីវិញ្ញាសាមុខវិជ្ជាគណិតវិទ្យា នាពេលប្រឡងកាលពីខែមិថុនា កន្លងមក។ សិស្សទាំងនោះ បានចែករំលែកតៗគ្នាតាមបណ្តាញសង្គម WhatsApp។

គ្រូបង្រៀនទាមទារឲ្យរដ្ឋមន្ត្រីអប់រំជាតិ លោក Jean-Michel Blanquer មានការកែទម្រង់ប្រព័ន្ធអប់រំនៅកម្រិតវិទ្យាល័យ។ សំណៅវិញ្ញាសាជាង១២២ ០០០ នឹងមិនត្រូវបានកែនោះឡើយ។ នេះបើយោងតាមការផ្សាយរបស់ BFMTV កាលពីថ្ងៃទី៣ ខែកក្កដា។

ប៉ូលិសបានដោះលែងយុវជន៧នាក់ក្នុងចំណោម១៩នាក់ដែលត្រូវបានចាប់ខ្លួន។ ការិយាល័យរដ្ឋអាជ្ញាក្រុងប៉ារីស បានអះអាងថា អ្នកទាំងនោះ ប្រឈមនឹងបទចោទប្រកាន់ពីបទក្លែងបន្លំការប្រឡង បទរំលោភសេចក្តីទុកចិត្ត ក៏ដូចជាការឃុបឃិតក្នុងអំពើទាំងនោះ។

បច្ចុប្បន្នអាជ្ញាធរអប់រំបារាំង មិនទាន់មានសេចក្តីសម្រេចផ្លូវការទាក់ទងនឹងការប្រឡងនេះឡើយ ជាពិសេសការសម្រេចលើចំនួនសិស្សដែលត្រូវប្រឡងឡើងវិញ សិស្សដែលត្រូវពិន័យ ឬលុបចោលការប្រឡងទាំងមូល។

មិនមែនតែគ្រូគណិតវិទ្យានោះឡើយដែលនាំគ្នាកូដកម្មតវ៉ាជាក្រុម ក្រុមគ្រូមុខវិជ្ជាទស្សនវិទ្យា ភូមិវិទ្យា ប្រវតិ្តវិទ្យា និងមុខវិជ្ជាផ្សេងទៀត ក៏បានចូលក្នុងចលនាកូដកម្មនេះដែរ។

បញ្ហានេះ ជាបន្ទុកដ៏ធ្ងន់ធ្ងរមួយបន្ថែមទៀតរបស់លោកប្រធានាធិបតី Emmanuel Macron ដែលកាលពីអំឡុងយុទ្ធនាការបោះឆ្នោតឆ្នាំ២០១៧ លោកបានសន្យាកែទម្រង់ប្រព័ន្ធអប់រំ ដើម្បីឲ្យសិស្សមានសមត្ថភាពគ្រប់គ្រាន់មុនចូលមហាវិទ្យាល័យ និងទីផ្សារការងារក្នុងសម័យទំនើប៕