ក្រសួងកសិកម្ម កំពុងសិក្សាគម្រោងធ្វើផ្លូវចរាចរណ៍ត្រីនៅទន្លេមេគង្គក្រោម

ជាតិ

ក្រសួងកសិកម្ម កំពុងសិក្សាគម្រោងធ្វើផ្លូវចរាចរណ៍ត្រីនៅទន្លេមេគង្គក្រោម

05, Jul 2019 , 8:29 am

រូបភាព

ដោយ: ភួង វ៉ាន់ថា

រដ្ឋមន្ត្រីក្រសួងកសិកម្ម លោក វេង សាខុន បានជួពពិភាក្សាលើគម្រោងគំនិតផ្តួចផ្តើមធ្វើផ្លូវចរាចរណ៍ត្រីតំបន់មេគង្គក្រោម (Lower Mekong Fish Passage Initiative - Cambodia) ជាមួយលោក Michael Roy តំណាងនាយកដ្ឋានមហាផ្ទៃនៃសហរដ្ឋអាមេរិក និងសហការី កាលពីថ្ងៃទី៣ ខែកក្កដា ឆ្នាំ២០១៩។

លោក វេង សាខុន លើកឡើងថា គោលបំណងសំខាន់នៃគម្រោងនេះ គឺដើម្បីថែរក្សា និងអភិរក្សពូជត្រីធម្មជាតិ ក្នុងប្រទេសកម្ពុជា។ លោក អះអាងថា ក្រោយបញ្ចប់ការសាងសង់ផ្លូវជណ្តើរត្រីនៅស្ទឹងពោធិ៍សាត់ ខេត្តពោធិ៍សាត់ មានពូជត្រីប្រមាណជាង៦០ប្រភេទ បានហែលឆ្លងកាត់។

រដ្ឋមន្ត្រីកសិកម្មរូបនេះ បានឲ្យដឹងថា ការងារសំខាន់ៗនៃគម្រោងនេះរួមមាន ទី១ ការពង្រឹងសមត្ថភាព វិទ្យាស្ថានស្រាវជ្រាវ និងអភិវឌ្ឍជលផលទឹកសាប ការងារបច្ចេកទេសសាងសង់ និងស្រាវជ្រាវស្តីពីជណ្តើរត្រី រួមជាមួយការតាមដានសកម្មភាពបំលាស់ទីរបស់ត្រី, ទី២ ការសាងសង់ជណ្តើរត្រី, និងទី៣ ការគាំទ្របង្កើតគោលនយោបាយជណ្តើរត្រីថ្នាក់ជាតិ។

លោក វេង សាខុន បានស្នើដល់រដ្ឋាភិបាលអាមេរិក តាមរយៈអង្គការ USAID ពិនិត្យលទ្ធភាពក្នុងការផ្តល់ការគាំទ្របន្ថែម ជាពិសេសនៅតំបន់ទន្លេសាប ធ្វើយ៉ាងណាបង្កលក្ខណៈងាយស្រួល ដល់ការធ្វើចរាចរណ៍របស់ត្រីក្នុងតំបន់នោះ។ លោកក៏បានថ្លែងអំណរគុណចំពោះរដ្ឋាភិបាលអាមេរិក ដែលបានជួយគាំទ្រដល់ការអភិវឌ្ឍលើគ្រប់វិស័យ ជាពិសេសវិស័យកសិកម្មនៅកម្ពុជា។

លោក Michael Roy បានលើកឡើងថា គម្រោងនេះទទួលបានលទ្ធផលជាផ្លែផ្កា ក៏ដោយសារកិច្ចសហការយ៉ាងល្អប្រសើរ ជាមួយគ្រប់ភាគីពាក់ព័ន្ធ ជាពិសេសមន្ត្រីជំនាញនៃក្រសួងកសិកម្ម។ ទន្ទឹមនឹងនេះ លោក ក៏បានឯកភាព និងគាំទ្រចំពោះសំណើរបស់លោករដ្ឋមន្ត្រី ក្នុងការបង្កើនកិច្ចសហប្រតិបត្តិការ ដោយលោកសង្ឃឹមថា អង្គការ USAID នឹងពិនិត្យលទ្ធភាពផ្ដល់ការគាំទ្រ ហើយក្រុមការងាររបស់លោក រង់ចាំផ្តល់កិច្ចសហការគ្រប់បែបយ៉ាង ធ្វើយ៉ាងណាអភិវឌ្ឍវិស័យជលផលកម្ពុជាប្រកបដោយចីរភាព៕