ជាតិ
រកឃើញឈើខុសច្បាប់ជាង២០០ម៉ែត្រគីប ក្នុងសណ្ឋាគារអង្គរអេរ៉ាខេត្តសៀមរាប
រូបភាព៖ មន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាប
×![]()
សៀមរាប៖ ប្រតិបត្តិការចុះឆែកឃ្លាំងស្ដុកឈើមួយកន្លែងក្នុងសណ្ឋាគារដ៏ធំនៅខេត្តសៀមរាប បានរកឃើញឈើប្រមាណជាង២០០ម៉ែត្រគីប ជាឈើខុសច្បាប់។ អាជ្ញាធរបានរឹបអូសឈើទាំងនោះទៅរក្សាទុក និងរង់ចាំការដោះស្រាយតាមផ្លូវច្បាប់។
បន្ទាប់ពីបិទបញ្ចប់ប្រតិបត្តិការឆែក និងដល់ដំណាក់កាលរឹបអូសឈើខុសច្បាប់ ពីសណ្ឋាគារអង្គរអេរ៉ារួចមក ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប បានធ្វើសន្និសីទសារព័ត៌មាន ដើម្បីរៀបរាប់ពីលទ្ធផលដែលទទួលបាន។ លោក ទា គឹមសុទ្ធ បានឱ្យដឹង នៅល្ងាចថ្ងៃទី៤ កក្កដា ដោយថាការងារនេះ គឺមានការបញ្ជាផ្ទាល់ពីអភិបាលខេត្ត និងបានចុះឆែកទីតាំងនោះ ពិតជាមានឈើច្រើនមែន។ «កម្លាំងបានទៅដល់ទីតាំងនោះស្ដុកឈើ នៅយប់ថ្ងៃទី២ កក្កដា តែដោយសារយប់ហួសម៉ោងការងារ ក៏សម្រេចចិត្តយាម រហូតដល់ព្រឹកថ្ងៃទី៣ ទើបកម្លាំងចម្រុះបានធ្វើការរួមគ្នា ហើយការងារនេះមានការចូលរួមពីព្រះរាជអាជ្ញារងសាលាដំបូងខេត្តសៀមរាប លោក សំរិទ្ធ សុខុម»។ នេះជាការរៀបរាប់របស់លោក ទា គឹមសុទ្ធទៅកាន់អ្នកសារព័ត៌មាន។
រូបភាព៖ មន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាប
ប្រធានមន្ទីរកសិកម្មបន្ថែមថា ប្រតិបត្តិការពេញមួយថ្ងៃ នៅថ្ងៃទី៣នោះ កម្លាំងបានពិនិត្យ និងវាស់វែងឃើញមានឈើសរុប ៥២៦ ម៉ែត្រគីប ក្នុងនោះមានលិខិតអនុញ្ញាតដឹកជញ្ជូនតែ ២៧៤ ម៉ែត្រគីបប៉ុណ្ណោះ ដែលល្មើសលើសលិខិតចំនួន ២៥១ ម៉ែត្រគីប។ បច្ចុប្បន្ន កម្លាំងបានដឹកជញ្ជូនឈើទាំងនោះ ទៅរក្សាទុកនៅឃ្លាំងមានសុវត្ថិភាព ដោយរង់ចាំម្ចាស់ទៅបង់ការពិន័យតាមផ្លូវច្បាប់។ លោក ទា គឹមសុទ្ធបញ្ជាក់៖«យើងអនុវត្តន៍តាមច្បាប់ព្រៃឈើតាមមាត្រា ៩៦ អ្វីដែលល្មើសលើសពីការសន្ដិធិ យើងធ្វើការរឹបអូស និងធ្វើការបង់ពិន័យជាប្រាក់ យើងសម្រេចគុណនឹង៣នៃតម្លៃវត្ថុតាង។ សំណុំរឿងបង់ពិន័យជាប្រាក់ បង់ហើយរួចការចោទប្រកាន់ បើមិនបង់ទេយើងនឹងបញ្ជូនទៅតុលាការ»។
តាមការបញ្ជាក់ពីមន្ត្រីខាងលើ លោកបានដឹកសកម្មភាពដឹកជញ្ជូនរបស់សណ្ឋាគារអង្គរអេរ៉ានេះយូរឆ្នាំមកហើយ គឺមុនអំឡុងឆ្នាំ២០០៤មក ហើយកន្លងមកអាជ្ញាធរធ្លាប់បានចុះឆែកនិងពិន័យម្ដងរួចមកដែរ។ លោក ទា គឹមសុទ្ធ បញ្ជាក់ថា រាល់សណ្ឋាគារទាំងអស់ សុទ្ធតែងមានកន្លែងកែច្នៃឈើ ហើយម្ចាស់សណ្ឋាគារទាំងនោះ មិនមែនជាឈ្មួញឈើទេ គ្រាន់តែទិញមកប្រើប្រាស់ ក្នុងការសាងសង់សណ្ឋាគារតែប៉ុណ្ណោះ៕
Tag:
ឈើខុសច្បាប់
សណ្ឋាគារអង្គរអេរ៉ា
© រក្សាសិទ្ធិដោយ thmeythmey.com
