ជាតិ
រូបត្លុក
កាហ្វេថ្មីៗ៖ ចង់ឲ្យពលរដ្ឋស្រឡាញ់រដ្ឋាភិបាល ត្រូវធ្វើឲ្យពលរដ្ឋស្រឡាញ់មន្ត្រីសិន
× សំណាង ជាមន្ត្រីរាជការថ្នាក់ខ្ពស់ម្នាក់នៅក្នុងក្រសួងមួយ។ សំណាងតាំងសំណួរមួយទាំងព្រលឹមទៅក្លើសុធីរ នៅហាងកាហ្វេថ្មីៗ។
សំណាង៖ អញឆ្ងល់! ហេតុអ្វីប្រជាជនមួយចំនួនគិតតែបន្ទោសរដ្ឋាភិបាល។ រដ្ឋាភិបាលធ្វើអ្វីក៏មិនចេះត្រូវ។
សុធីរ៖ អញថា បើឯងគិតឲ្យមែនទែន ប្រជាជនមិនមែនបន្ទោសរដ្ឋាភិបាលដោយផ្ទាល់នោះទេ។ ពួកគេសំដៅលើមន្ត្រី។ ព្រោះមន្ត្រីជាសេនាធិការជំនាញនីមួយៗ ដែលតំណាងឲ្យរដ្ឋាភិបាលក្នុងកិច្ចការបម្រើរាស្ត្រ។ អ្ហែងក៏ឃើញដែរ! ពេលមានមន្ត្រីពូកែ ធ្វើការដើម្បីប្រយោជន៍សាធារណៈ ប្រជាជននិយាយសរសើរបន្តគ្នាថា រដ្ឋាភិបាលប្រើមនុស្សត្រូវ។ ផ្ទុយទៅវិញ នៅពេលគេស្គាល់មន្ត្រីអាក្រក់ ប្រជាជនក៏រិះគន់ទាំងមន្ត្រីនោះ និងស្តីបន្ទោសរដ្ឋាភិបាលជារួមតែម្តងទៅ។
សំណាង៖ ដូចនេះ បញ្ហានៅលើមន្ត្រី?
សុធីរ៖ អញចង់និយាយថា បើប្រជាជនស្រឡាញ់អ្ហែង ប្រជាជននឹងស្រឡាញ់ចៅក្រសួងរបស់ឯង ហើយប្រជាជនក៏នឹងស្រឡាញ់រដ្ឋាភិបាលបន្តទៀត។ ចង់ឲ្យប្រជាជនស្រឡាញ់រដ្ឋាភិបាល គឺត្រូវពឹងលើតួនាទីរបស់មន្ត្រីហើយ។ តើអ្ហែងជាមន្ត្រីស្មោះត្រង់ដែលចង់ប្រជាជនស្រឡាញ់រដ្ឋាភិបាលដែរឬទេ?
© រក្សាសិទ្ធិដោយ thmeythmey.com