រថយន្ត
សេដ្ឋកិច្ច
អន្តរជាតិ
ឧស្សាហកម្មយានយន្ត៖ អាល្លឺម៉ង់ បារាំង និងប៉ូឡូញ ផ្តល់ការងារច្រើនជាងគេនៅអឺរ៉ុប
×![]()
ដោយ: ធីតា
សមាគមក្រុមហ៊ុនផលិតយានយន្តអឺរ៉ុប (ACEA) បានបង្ហាញតួលេខឲ្យឃើញថា ឧស្សាហកម្មយានយន្ត បានផ្តល់ការងារដល់ទៅ ១៣.៨លានកន្លែងនៅអឺរ៉ុប។ យោងតាមការផ្សាយរបស់ motor1.com ទិន្នន័យទាំងនេះ ត្រូវរកឃើញកាលពីឆ្នាំ២០១៧ ប៉ុន្តែនៅតែជាបច្ចុប្បន្នភាព សម្រាប់វិស័យយានយន្តនៅតំបន់ធឺរ៉ុបទាំងមូល។
អត្រាអ្នកមានការងារធ្វើដោយសារវិស័យយានយន្តដែលមានជិត១៤លាននាក់នោះ គឺស្មើនឹង៦ភាគរយនៃទីផ្សារការងារប្រចាំទ្វីបអឺរ៉ុបទាំងមូល។ បើតាម ACEA តួលេខនេះ មានចំនួនកើនឡើងជាង១០ភាគរយផងដែរ បើប្រៀបធៀបកាលពីឆ្នាំ២០១៣។
ក្នុងចំណោមការងារសរុប១៣.៨លានកន្លែង មាន ៣.៤៩លាន ធ្វើការផ្នែកជំនាញផ្ទាល់ ពោលគឺមានជាង១១ភាគរយ។ អ្នកជំនាញទាំងនេះ ទទួលបន្ទុកលើការផលិតរថយន្តប្រមាណ១៩.២លានគ្រឿងកាលពីឆ្នាំមុន ដោយមានរោងចក្រប្រមាណ២២៩កន្លែងដែលស្ថិតនៅក្នុងសហភាពអឺរ៉ុប។
អាល្លឺម៉ង់ជាប្រទេសដែលផ្តល់ការងារច្រើនជាងគេក្នុងវិស័យយានយន្ត ដោយមានប្រមាណ៨៧០ ០០០កន្លែង បារាំងឈរលំដាប់លេខ២ មាន២២៣ ០០០កន្លែង ខណៈប៉ូឡូញ ស្ថិតនៅលំដាប់លេខ៣ ដោយមាន ២០៣ ០០០កន្លែង។
របាយការណ៍ ACEA ក៏បានបង្ហាញផងដែរថា អង់គ្លេស (១៨៦ ០០០កន្លែង) និង រូម៉ានី (១៨៥ ០០០កន្លែង) ស្ថិតក្នុងចំណោមរដ្ឋចំនួន១៩នៅសហភាពអឺរ៉ុប ដែលមានសក្តានុពលខ្ពស់ក្នុងឧស្សហកម្មយានយន្ត តាមរយៈការផលិតរថយន្តធុនធំ ធុនតូច និងម៉ូទ័រគ្រប់ប្រភេទ។
motor1.com បានគូសបញ្ជាក់ថា បច្ចុប្បន្នរថយន្តប្រមាណ៣០៨លានគ្រឿងកំពុងចរាចរនៅលើផ្លូវក្នុងសហគមន៍អឺរ៉ុប ដោយមានចំនួនកើនឡើង៤៦លានគ្រឿង បើប្រៀបធៀបទៅនឹងឆ្នាំ២០០៥៕
© រក្សាសិទ្ធិដោយ thmeythmey.com
