អន្តរជាតិ
រូបភាព AFP
×![]()
ដោយ: តន ចាន់រិទ្ធារ៉ា
សហរដ្ឋអាមេរិក កំពុងប្រមែប្រមូលប្រទេសនានាឲ្យចូលរួមក្នុងសម្ព័ន្ធភាពយោធាមួយដើម្បីការពារការដឹកជញ្ជូនតាមច្រកសមុទ្រ Hormuz ដែលសព្វថ្ងៃត្រូវបានកាងជាប់ដោយអ៊ីរ៉ង់ និងផ្លូវសមុទ្រក្បែរយេម៉ែន។ នេះបើតាមការលើកឡើងរបស់ប្រមុខកងទ័ពអាមេរិកនៅថ្ងៃទី៩ ខែកក្កដា។ ក្រោមគំនិតផ្ដួចផ្ដើមថ្មីនេះ អាមេរិកទទួលបន្ទុកផ្ដល់ព័ត៌មានការស៊ើបការណ៍ ឯប្រទេសដែលចូលរួម ត្រូវការពារកប៉ាល់ដែលពាក់ទង់ជាតិប្រទេសនោះ។ 
អាមេរិក ទំនងជាបោះបង់អម្រែកសន្តិសុខដ៏ធ្ងន់នៅតំបន់ឈូងសមុទ្រហើយ និងចង់ឲ្យប្រទេសដែលទទួលប្រយោជន៍ពីច្រកសមុទ្រសំខាន់នេះ ចេញមុខលីអម្រែកនេះទៅតាមប្រយោជន៍ដែលពួកគេទទួលបាន។ នាយសេនាធិការចម្រុះកងទ័ពអាមេរិក ឧត្តមសេនីយ៍ ចូសេហ្វ ដាន់ហ្វត និយាយថ្ងៃទី៩ ខែកក្កដា ថា អាមេរិករំពឹងថា នឹងមានសម្ព័ន្ធមិត្តចូលរួមក្នុង «សម្ព័ន្ធភាពយោធា» មួយដើម្បីការពារដែនទឹកនៅក្បែរអ៊ីរ៉ង់ និងយេម៉ែន ជាទីដែលអាមេរិក និងអ៊ីរ៉ង់កំពុងទាស់គ្នា។
ក្រោមគម្រោងថ្មីដែលទើបបញ្ចប់ថ្មីៗនេះ អាមេរិក នឹងផ្ដល់កប៉ាល់បញ្ជា និងដឹកនាំផ្នែកស៊ើបយកព័ត៌មានឲ្យសម្ព័ន្ធភាពចម្រុះ។ កប៉ាល់របស់ប្រទេសសមាជិក នឹងធ្វើដំណើរអមកប៉ាល់បញ្ជារបស់អាមេរិក ហើយការពារកប៉ាល់ដឹកទំនិញដែលមានទង់ជាតិរបស់ខ្លួន។ លោកឧត្តមសេនីយ៍ ដាន់ហ្វត បញ្ចេញព័ត៌មាននេះ ក្រោយជំនួបជាមួយរដ្ឋមន្ត្រីការបរទេស ម៉ៃ ប៉ុមប៉េអូ និងរដ្ឋមន្ត្រីស្ដីទីក្រសួងការពារជាតិ Mark Esper ។
បើតាមទីភ្នាក់ងារព័ត៌មាន Reuters លោក ដាន់ហ្វត បញ្ជាក់ថា អាមេរិកកំពុងទាក់ទងប្រទេសមួយចំនួនដើម្បីពិនិត្យមើលលទ្ធភាពចូលរួមបង្កើតសម្ព័ន្ធភាពមួយសំដៅការពារសេរីភាពនាវាចរណ៍ទាំងនៅ Hormuz និងច្រក Bab al-Mandab ក្បែរយេម៉ែន។ លោកបន្តថា ពីរបីសប្ដាហ៍ខាងមុខ អាចរកឃើញប្រទេសដែលមានឆន្ទៈក្នុងការគាំទ្រគំនិតផ្ដួចផ្ដើមនេះ ហើយបន្ទាប់មក នឹងចាប់ផ្ដើមធ្វើការជាមួយក្នុងចំណោមកងទ័ពតែម្ដង។
តាមពិតទៅ នេះជាមិនមែនជារឿងថ្មីឡើយដែលអាមេរិកបបួលប្រទេសផ្សេងឲ្យចូលរួមក្នុងការប្រតិបត្តិការនៅតំបន់ដ៏សំខាន់មួយនេះ។ លោកប្រធានាធិបតីអាមេរិក ដូណាល់ ត្រាំ ថែមទាំងប្រកាសទារថ្លៃការពារពីប្រទេសដែលឲ្យអាមេរិកការពារកប៉ាល់ដឹកទំនិញរបស់ខ្លួនទៀតផង។
គំនិតរបស់អាមេរិកខាងលើនេះ ទទួលសញ្ញាវិជ្ជមានបន្ទាប់ពីការវាយប្រហារបន្តបន្ទាប់លើកប៉ាល់ដឹកទំនិញនៅតំបន់នោះ ហើយស្របគ្នានឹងភាពតានតឹងរវាងអាមេរិក និងអ៊ីរ៉ង់ផងនោះ។ ជម្លោះនៅតំបន់នោះ ពិតជាប៉ះពាល់ដល់ការផ្គត់ផ្គង់ប្រេងលើពិភពលោកមិនខាន ដូចនេះប្រទេសធំៗដែលពឹងផ្អែកលើប្រេងមជ្ឈិមបូព៌ា ប្រាកដជាពិចារណាគំនិតផ្ដួចផ្ដើមរបស់អាមេរិក។ ជុំវិញរឿងនេះ ជប៉ុនដែលត្រូវការប្រេងពីតំបន់នោះ ប្រកាសថា នឹងទាក់ទងជាមួយអាមេរិកដើម្បីស្ថិរភាពនៅមជ្ឈិមបូព៌ា៕
Tag:
អាមេរិក
អ៊ីរ៉ង់
Hormuz
© រក្សាសិទ្ធិដោយ thmeythmey.com
