អន្តរជាតិ
កូរ៉េខាងត្បូងប្រាប់អាមេរិក៖ ការរឹតត្បិតរបស់ជប៉ុន នឹងមិនល្អសម្រាប់ទំនាក់ទំនងត្រីភាគីឡើយ
នាយករដ្ឋមន្រ្តីជប៉ុន និងប្រធានាធិបតីកូរ៉េខាងត្បូងអំឡុងជំនួប G20 នៅអូសាកា។ រូបភាព Wall Street Journal
×![]()
ដោយ: តន ចាន់រិទ្ធារ៉ា
ការរឹតត្បិតរបស់ជប៉ុនលើការនាំចេញវត្ថុធាតុដើមទៅកាន់កូរ៉េខាងត្បូង កំពុងក្លាយជាបញ្ហាប្រឈមក្នុងទំនាក់ទំនងត្រីភាគីអាមេរិក-ជប៉ុន-កូរ៉េខាងត្បូង។ រដ្ឋមន្ត្រីការបរទេសកូរ៉េខាងត្បូង កាង ឃ្យុងវ៉ា ប្រាប់សមភាគីអាមេរិក ម៉ៃ ប៉ុមប៉េអូ នៅថ្ងៃទី១០ ខែកក្កដា ថា សកម្មភាពរបស់ជប៉ុន មិនមែនជារឿងល្អឡើយសម្រាប់ទំនាក់ទំនងត្រីភាគី ហើយវាប៉ះពាល់មិនតិចឡើយដល់សង្វាក់ផលិតកម្មពិភពលោក និងក្រុមហ៊ុនអាមេរិកផងដែរ។
ប្រមុខការទូតកូរ៉េខាងត្បូង កាង ឃ្យុងវ៉ា បានជជែកតាមទូរសព្ទជាមួយប្រមុខការទូតអាមេរិក ម៉ៃ ប៉ុមប៉េអូ ជុំវិញបញ្ហាពាណិជ្ជកម្មជាមួយជប៉ុន។ កាលពីដើមខែកក្កដានេះ ក្រុងតូក្យូ បានប្រកាសចាត់វិធានការរឹតត្បិតការនាំចេញរូបធាតុដើមសំខាន់ៗមួយចំនួនដែលចាំបាច់ប្រើប្រាស់ក្នុងការផលិតបន្ទះឈីប និងទូរសព្ទឆា្លតវៃ។ ក្រោមវិធានការថ្មី ការនាំចេញរូបធាតុទាំងនោះទៅកាន់កូរ៉េខាងត្បូង ត្រូវតែឆ្លងកាត់នីតិវិធីដល់ទៅ៩០ថ្ងៃឯណោះ។
នាកិច្ចសន្ទនាប្រមាណ១៥នាទីនៅថ្ងៃទី១០ ខែកក្កដា លោកស្រី កាង បានបង្ហាញការក្ដីបារម្ភរបស់កូរ៉េខាងត្បូងជុំវិញការររឹតត្បិតរបស់ជប៉ុនលើរូបធាតុដែលត្រូវប្រើក្នុងការផលិតកម្មសម្ភារទំនើប។ បើតាមសេចក្ដីប្រកាសព័ត៌មានក្រសួងការបរទេសកូរ៉េខាងត្បូង លោកស្រី កាង ប្រាប់លោក ប៉ុមប៉េអូ ពីផលប៉ះពាល់លើក្រុមហ៊ុនកូរ៉េខាងត្បូង និងពាណិជ្ជកម្មអន្តរជាតិ ក៏ដូចជាក្រុមហ៊ុនអាមេរិក ព្រោះសង្វាក់ផលិតកម្មត្រូវបានកាត់ផ្ដាច់។
នេះក៏ព្រោះតែក្រុមហ៊ុនកូរ៉េខាងត្បូង ត្រូវបានវត្ថុធាតុដើមពីជប៉ុនក្នុងការផលិតសម្ភារៈបច្ចេកវិទ្យាមានបន្ទះឈីបជាដើម។ បន្ទះឈីបនេះ ជាគ្រឿងចាំបាច់សម្រាប់ការផលិតគ្រឿងបរិក្ខារទំនើបៗរបស់ក្រុមហ៊ុនអាមេរិកដូចជាទូរសព្ទ និងកុំព្យូទ័រផង។ ដូចនេះ បើមានបញ្ហានៅរោងចក្រកូរ៉េខាងត្បូង ក្រុមហ៊ុនអាមេរិកក៏វីវរដូចគ្នា។
«ការរឹតត្បិតរបស់ជប៉ុន មិនមែនជារឿងល្អក្នុងទំនាក់ទំនងកូរ៉េខាងត្បូង និងជប៉ុន ក៏ដូចជាកិច្ចសហប្រតិបត្តិការត្រីភាគីកូរ៉េខាងត្បូង-ជប៉ុន-អាមេរិក។» នេះជាការសង្កត់ធ្ងន់របស់លោកស្រី កាង ទៅកាន់សមភាគីអាមេរិក។ តបនឹងការលើកឡើងរបស់ប្រមុខការទូតកូរ៉េខាងត្បូង លោក ប៉ុមប៉េអូ ថា លោកយល់ពីជំហររបស់ក្រុងសេអ៊ូល។ បើតាមទីភ្នាក់ងារព័ត៌មាន Yonhap ប្រមុខការទូតអាមេរិក និងកូរ៉េខាងត្បូង បានឯកភាពគ្នាបន្តកិច្ចសហប្រតិបត្តិការទ្វេភាគីផង និងត្រីភាគីផង។
ក្រោយការប្រកាសវិធានការពីសំណាក់ក្រុងតូក្យូ ក្រុងសេអ៊ូល មិនទាន់មានវិធានការតបអ្វីនៅឡើយទេ ដោយគ្រាន់តែបន្តទទូចឲ្យតូក្យូបញ្ឈប់នូវការសម្រេចចិត្តមិនសមរម្យរបស់ខ្លួនវិញ។ នៅថ្ងៃទី១០ ខែកក្កដា លោកប្រធានាធិបតី មូន ចេអ៊ីន បានកោះប្រជុំបន្ទាន់មួយជាមួយក្រុមហ៊ុនធំៗនៅកូរ៉េខាងត្បូងដែលអាចរងផលប៉ះពាល់ដោយសារការរឹតត្បិតរបស់ជប៉ុន។ លោក មូន បានស្នើឲ្យជប៉ុនគិតគូររឿងនេះម្ដងទៀត មុនដើរដល់ចំណុចបកក្រោយលែងបាន។
តាមពិតទៅ ចំណាត់ការរបស់ជប៉ុន ត្រូវគេជឿថា ជាការឆ្លើយតបនឹងសាលក្រមជាបន្តបន្ទាប់របស់តុលាការកូរ៉េខាងត្បូង ដែលបានបញ្ជាឲ្យក្រុមហ៊ុនជប៉ុនដែលបានប្រើប្រាស់កម្លាំងពលកម្មប្រជាជនកូរ៉េដោយបង្ខំក្នុងអំឡុងសម័យសង្គ្រាម បង់ថ្លៃសំណងដល់ជនរងគ្រោះ។ ម្យ៉ាងទៀត លោក មូន ផ្ទាល់ហៅការរឹតត្បិតនេះជារឿងនយោបាយ ព្រោះនៅជប៉ុនកំពុងរៀបចំការបោះឆ្នោតព្រឹទ្ធសភា ដូចនេះបក្សកាន់អំណាចនៅជប៉ុន ត្រូវការមូលហេតុដើម្បីទាក់ទាញការគាំទ្រ៕
Tag:
កូរ៉េខាងត្បូង
អាមេរិក
ជប៉ុន
© រក្សាសិទ្ធិដោយ thmeythmey.com
