កីឡាអន្តរជាតិ
អន្តរជាតិ
Rapinoe ឌឺទៅលោកត្រាំថា «ខ្ញុំមិនឈរឈ្មោះធ្វើប្រធានាធិបតីទេ ព្រោះខ្ញុំរវល់ពេក!»
× ក្រុមកីឡាបាល់ទាត់ជម្រើសជាតិស្ត្រីអាមេរិកបានត្រឡប់ដល់មាតុប្រទេសនិងអបអរពានរង្វាន់ FIFA Women's World Cup ដែលពួកគេឈ្នះពីប្រទេសបារាំងនៅលើដងផ្លូវក្នុងក្រុង New York ដោយមានអ្នកគាំទ្ររាប់ម៉ឺននាក់។ អំឡុងពេលហែពាននោះ ប្រធានក្រុម Megan Rapinoe បានលើកសរសើរមិត្តរួមក្រុមអាមេរិកទាំងមូល និងនិយាយបែបកំប្លែងចំពោះមុខអ្នកគាំទ្រថានាងនឹងមិនឈរឈ្មោះជាប្រធានាធិបតីឡើយដោយហេតុផល«រវល់ពេក»។
នាឱកាសអបអរជ័យជំនះជាលើកទី៤ ក្នុងក្រុងញូវយ៉ក នៅថ្ងៃទី១០ ខែកក្កដា ខ្សែបម្រើវ័យ៣៤ឆ្នាំបានឌឺដងផ្លែផ្កាបែបនេះទៅកាន់លោកប្រធានាធិបតី ដូណាល់ ត្រាំ ស្របពេលដែលអ្នកទាំងពីរទាស់សម្តីគ្នាតាំពីអំឡុងការប្រកួតកីឡាបាល់ទាត់ពិភពលោកនៅបារាំងម្លេះ។
កាលនោះ Rapinoe ធ្លាប់បានប្រាប់ក្រុមសារព័ត៌មានថា នាងនឹងមិនទៅជាន់សេតវិមានទេបើសិនអាមេរិកឈ្នះពាន World Cup ឆ្នាំ២០១៩នេះ។
ចំណែកលោកប្រធានាធិបតីអាមេរិក ក្រោយពីលឺបែបនេះ ក៏បានឆ្លើយតបតាមរយៈបណ្តាញសង្គម Twitter ដោយប្រាប់ទៅកីឡាការិនីរូបនេះថាឲ្យចេះគោរព «ប្រទេសជាតិផង» និងថែមទាំងថា «ចាំឈ្នះពានជាមុនសិនទៅ សឹមនិយាយបែបនេះ»។ យ៉ាងណាក៏ដោយ អាមេរិកពិតជារក្សាតំណែងជើងឯកបានពិតមែន ហើយលោក ត្រាំក៏បានចូលរួមអបអរសារទផងដែរ។
ក្រោយជួយអាមរិកការពារតំណែងពីរលើកជាប់គ្នា Rapinoe នៅតែលើកឡើងពីគោលជំហររបស់នាងក្នុងការមិនទៅចូលរួមទស្សនកិច្ចនៅសេតវិមាន ប្រសិនបើមានការអញ្ជើញពីសំណាក់ប្រធានាធិបតីអាមេរិកក៏ដោយ។
ម្ចាស់ស្បែកជើងមាស (Golden Boot) ប្រចាំព្រឹត្តិការណ៍ World Cup នារីដែលបារាំងធ្វើម្ចាស់ផ្ទះ បានបន្ថែមបែបបញ្ឆេះកំហឹងទៅកាន់លោកត្រាំទៀតថា៖ «ខ្ញុំមិនអាចមានមោទកភាពជាងនេះក្នុងនាមជាសហប្រធានក្រុមអាមេរិកជាមួយ Carli Lloyd និង Alex Morgan នោះទេ។ វាជាកិត្តិយសណាស់ទៅហើយ ដែលបានដឹកនាំក្រុមទៅលើទីលាន។ មិនមានកន្លែងណាល្អជាងនេះទៀតទេ សូម្បីតែឈរឈ្មោះប្រណាំងប្រជែងធ្វើប្រធានាធិបតីអាមេរិកក៏ដោយ ព្រោះខ្ញុំរវល់ណាស់ សុំទោស!»។
Rapinoe ពិតជាទទួលស្គាល់ខ្លួនឯងថាមួយរយៈចុងក្រោយនេះនាងមានជម្លោះច្រើនណាស់ ប៉ុន្តែនាងថា នាងជាជនរងគ្រោះ ផ្ទុយទៅវិញមានអ្នកគិតថានាងជាជនល្មើសក្នុងរឿងដែលកើតឡើងទាំងអស់នោះ៕
© រក្សាសិទ្ធិដោយ thmeythmey.com