អចលនទ្រព្យ
អត្ថបទពាណិជ្ជកម្ម
×![]()
ដោយ: ថ្មីៗ
សម្តេចនាយករដ្ឋមន្ត្រី ហ៊ុន សែន កាលពីថ្មីៗនេះ បានជំរុញឲ្យមានការបង្កើតទីចំណតយានយន្តសាធារណៈក្រោមដី ឲ្យកាន់តែច្រើន ដើម្បីដោះស្រាយបញ្ហាកកស្ទះនៅទីក្រុងភ្នំពេញ។
ថ្លែងក្នុងឱកាសជួបសំណេះសំណាល ពលរដ្ឋខ្មែរនៅប្រទេសស្វីស កាលពីថ្ងៃទី៤ ខែកក្កដា សម្តេច នាយករដ្ឋមន្ត្រី ហ៊ុន សែន បានថ្លែងថាកង្វះចំណតរថយន្ត បានក្លាយជាបញ្ហាចម្បងមួយក្នុងចំណោមបញ្ហាផ្សេងៗទៀតនាពេលបច្ចុប្បន្ន ដែលត្រូវពន្លឿនការដោះស្រាយ។លោកនាយករដ្ឋមន្ត្រី បានណែនាំឲ្យរដ្ឋមន្ត្រីក្រសួងរៀបចំដែនដី និងអភិបាលរាជធានីភ្នំពេញ ពិនិត្យបង្កើតចំណតរថយន្តបន្ថែម ជាពិសេសចំណតក្រោមដី ដើម្បីបញ្ចៀសការប្រើចិញ្ចើមផ្លូវ សម្រាប់ចំណតយានតយន្ត។
សម្តេចនាយករដ្ឋមន្ត្រីថ្លែងថា៖«សួនច្បារមួយចំនួន [យើងអាច] ប្រើប្រាស់ផ្នែកខាងក្រោម ពីរបីជាន់ខាងក្រោមដើម្បីធ្វើចំណតរថយន្តបើមិនអ៊ីចឹងទេ ចិញ្ចឹមផ្លូវរបស់យើងចតដោយរថយន្ត។ សម្តេចហ៊ុន សែនបន្តថា៖«ភ្នំពេញ បើសិនជារថយន្តចេញតែ ៥០ភាគរយ មធ្យោបាយធ្វើដំណើរកកទាំងអស់។ គាំងភ្នំពេញ»។
ស្ថានភាពជីវភាពរបស់ប្រជាជននៅភ្នំពេញ មានភាពប្រសើរជាងមុន ហើយដោយសារការប្រើប្រាស់មធ្យោបានផ្ទាល់ខ្លួននៅតែមានប្រជាប្រិយខ្លាំងក្នុងចំណោមប្រជាជនកម្ពុជា ដែលធ្វើឲ្យចំនួនរថយន្តបានកើនឡើងយ៉ាងខ្លាំង។ កំណើននេះ ស្របពេលដែលរាជធានីភ្នំពេញមានកន្លែងចតយានយន្តតិចតួចណាស់ ទាំងសាធារណៈ និងចំណតឯកជន។
ការកើនឡើង នៃចំនួនយានយន្ត
យោងតាមតួលេខដែលទទួលបានពីក្រសួងសាធារណការ និងដឹកជញ្ជូន គិតត្រឹមដំណាច់ឆ្នាំ២០១៦ មានយានយន្តចំនួន ៤៤ម៉ឺនគ្រឿង និងម៉ូតូចំនួន ១.៦លានគ្រឿង គ្រឿងដែលបានចុះបញ្ជីនៅក្នុងប្រទេសកម្ពុជា។
មន្ត្រីក្រសួងសាធារណការបានបញ្ជាក់ថា ចំនួនរថយន្តចុះបញ្ជី បានកើនឡើងជាប្រចាំឆ្នាំដែលមានការចុះបញ្ជីថ្មីចន្លោះពី ៣០ ម៉ឺនគ្រឿង ទៅ ៤០ ម៉ឺនគ្រឿងក្នុងមួយឆ្នាំៗ។
លោក មេត មាសភក្តី អ្នកនាំពាក្យសាលារាជធានីភ្នំពេញ បានឲ្យដឹងថា ភ្នំពេញ កំពុងប្រឈមនឹងកង្វះកន្លែងចតយានយន្តសាធារណៈ ដោយសារតែចំនួនរថយន្តបានកើនឡើងលឿនរហ័ស។
លោក ភក្តី បានឲ្យដឹងថា រាជធានីភ្នំពេញនាពេលនេះ មានចំណតរថយន្តក្រោមដី ចំនួនពីរកន្លែង ដែលកំពុងដំណើរការ និងមានបី ទៅ បួនកន្លែងទៀត កំពុងសាងសង់។ តែលោក សុំមិនទាន់ផ្តល់ព័ត៌មានលម្អិត ពីគម្រោងដែលកំពុងសាងសង់ឡើយ។ លោកបន្តថា៖«ចំណតយានយន្តក្រោមដី គឺជាការវិនិយោគ ដែលត្រូវការលុយច្រើន។ យើងតែងតែលើកទឹកចិត្ត ដល់ការវិនិយោគិនឯកជន សម្រាប់គម្រោងប្រភេទនេះ ដើម្បីពន្លឿនការអភិវឌ្ឍ និងជួយដោះស្រាយបញ្ហាកកស្ទះ»។
ចំណតឯកជន
យោងតាមលោក ភក្តី ក្រុមហ៊ុន Overseas Cambodia Investment Corporation (OCIC) បានសាងសង់ចំណតរថយន្តក្រោមដី ដំបូងគេនៅភ្នំពេញ ដែលមានទីតាំងក្រោមសួនចន្លោះអគារវឌ្ឍនៈ និងអគារកាណាឌីយ៉ា។ ចំណតរថយន្តក្រោមដីនេះ មានទំហំ ៨,៧០៤ ម៉ែត្រការ៉េ មានពីរជាន់ និងអាចផ្ទុករថយន្តជាង ៣០០គ្រឿង។
លោក ទូច សំណាង នាយកប្រតិបត្តិរបស់ក្រុមហ៊ុន OCIC បាននិយាយថា ចំណតយានយន្តក្រោមដីនេះ បានបើកដំណើរការតាំងពីដើមឆ្នាំ ២០១៨។ លោកបានអះអាងថា រចនាសម្ព័ន្ធក្រោមដី បានជួយកាត់បន្ថយការកកស្ទះនៅក្នុងតំបន់នេះ ហើយបានរក្សាទុកចរាចរណ៍តាមដងផ្លូវ។ លោកបន្តថា៖«បើគ្មានកន្លែងចតរថយន្តសមស្របទេ អ្នកបើកបរចតយានយន្តពួកគេ នៅតាមផ្លូវសាធារណៈ ហើយបង្កឱ្យមានការកកស្ទះចរាចរណ៍ធ្ងន់ធ្ងរ»។ លោកបញ្ជាក់ថា៖«វាតែងតែជាដំណោះស្រាយដ៏ល្អ ក្នុងការសាងសង់ចំណតក្រោមដីពីព្រោះឥលូវ នៅលើដីលែងមានកន្លែងទំនេរច្រើនទៀតហើយ»។
ចំណតក្រោមដីមួយផ្សេងទៀត ដែលកំពុងដំណើរការគឺចំណតរបស់ណាហ្គាវើល។ ចំណែកឯក្រុមហ៊ុនវឌ្ឍនៈ ក៏ធ្លាប់ត្រូវបានរាយការណ៍ថា បានដាក់ផែនការសាងសង់ចំណតក្រោមដី ដែលមានទំហំ ៥,០០០ ម៉ែត្រការ៉េដែរ។ ក្រៅពីនេះ ក៏មានសេចក្តីរាយការណ៍ផ្សេងដែរថា ចំណតនៅក្រោមសួន ដែលនៅទល់មុខសណ្ឋាគារសាន់វ៉េភ្នំពេញ កំពុងដំណើរការសាងសង់៕
(ប្រភព៖ https://www.realestate.com.kh/km/news/underground-car-lots-grab-focus-amid-rising-congestion/)
(អត្ថបទពាណិជ្ចកម្ម)
© រក្សាសិទ្ធិដោយ thmeythmey.com
