កីឡាជាតិ
ជាតិ
Hun Sen Cup៖ សរុបទាំងពីរជើង ភ្នំពេញក្រោនឈ្នះកំពង់ចាម ២៤-០ ព្រះខ័នរាជឈ្នះត្បូងឃ្មុំ ៧-១ ជំនួបរវាងភ្នំពេញក្រោន និងកំពង់ចាម (ឆ្វេង) និង ព្រះខ័នរាជស្វាយរៀង និងត្បូងឃ្មុំ។ ប្រភពរូបថត ភ្នំពេញក្រោន និង CNCC
× ភ្នំពេញក្រោន និងព្រះខ័នរាជស្វាយរៀងជាក្រុមបន្ទាប់ពីបឹងកេតនិងអង្គរថាយហ្គឺរ ដែលបានឈ្នះកៅអីឡើងទៅវគ្គបន្តពានរង្វាន់សម្តេច ហ៊ុន សែន ថ្នាក់ជាតិ បន្ទាប់ពីពួកគេបានយកឈ្នះគូប្រកួតរៀងៗខ្លួននៅវគ្គ១៨ក្រុមចុងក្រោយ។ ក្នុងនោះភ្នំពេញក្រោនបានលត់កំពង់ចាមក្នុងលទ្ធផលសរុបទាំងពីរជើង ២៤-0 ខណៈក្រុមព្រះខ័នរាជស្វាយរៀងបានយកឈ្នះត្បូងឃ្មុំទាំងពីរជើងក្នុងលទ្ធផល ៧-១។
នាជំនួបជើងទី២នៅកីឡដ្ឋានស្តាតចាស់ គ្រាប់បាល់១០គ្រាប់បានកើតឡើងសម្រាប់ភ្នំពេញក្រោន បន្ទាប់ពីកីឡាករ វ៉ា សុខថន សម្រេចបាន៤គ្រាប់, ម៉ៅ ពិសិដ្ឋ ២គ្រាប់ និងរួមចំណែកម្នាក់មួយគ្រាប់ពី ប្រាក់ ធីវ៉ា, សុខ បញ្ញា, យ៉ើ មូស្លីម និង យ៉ើ សាហ្វី។ លទ្ធផល ១០-០ នៅតង់ទី១មិនទាន់គ្រប់គ្រាន់សម្រាប់ភ្នំពេញក្រោននោះទេ ដោយកីឡាករ សេត រ៉ហ្សាក់ និង លឹម វិសុទ្ធ សម្រេចបានម្នាក់១គ្រាប់ និង វ៉ា សុខថន បន្ថែមពីរគ្រាប់ ដើម្បីនាំជ័យជម្នះសរុបទាំងពីរជើង ២៤-០។
សម្រាប់ការប្រកួតជើងទី២ កីឡាករ វ៉ា សុខថន សម្រេចបាន៥គ្រាប់ម្នាក់ឯង ដែលអាចជួយឲ្យរូបគេមានរំពឹងខ្ពស់ក្នុងការប្រជែងដណ្តើមស្បែកជើងមាសនៅរដូវកាលនេះ។
ចំណែកការប្រកួតនៅកីឡដ្ឋាន AEU Sport Park ជ័យជម្នះ ៣-១ នៅជើងទី២ វាគ្រប់គ្រាន់ក្នុងការជួយឲ្យព្រះខ័នរាជស្វាយរៀងឡើងទៅវគ្គ១/៤ពានរង្វាន់សម្តេច ហ៊ុន សែន ថ្នាក់ជាតិ ជាមួយជ័យជម្នះទាំងពីរជើង ៧-១ លើខេត្តត្បូងឃ្មុំ៕
© រក្សាសិទ្ធិដោយ thmeythmey.com