ភ្នំពេញ៖ គិតត្រឹមថ្ងៃទី១១ កក្កដានេះ មានជ្រូកជាង២០០០ក្បាលហើយ ដែលត្រូវបានសម្លាប់ និងងាប់ដោយសារជំងឺប៉េស្តជ្រូកអាហ្វ្រិក។ រដ្ឋាភិបាល កំពុងព្យាយាមដោះស្រាយ និងទប់ស្កាត់បញ្ហានេះ ប៉ុន្តែគ្មានគម្រោងជួយរំលែកការបង់ខាតរបស់ពលរដ្ឋឡើយ។
លោក តាន់ ផាន់ណារ៉ា អគ្គនាយកដ្ឋានសុខភាពសត្វ និងផលិតកម្មសត្វ បាននិយាយថា ក្នុងចំណោមជ្រូកជាង២០០០ក្បាលនោះ គឺមានជ្រូក៧៩៨ក្បាលត្រូវបានសម្លាប់ចោល ហើយមានជ្រូកជាង ១ពាន់ក្បាលផ្សេងទៀតងាប់ដោយសារជំងឺប៉េស្តជ្រូកអាហ្វ្រិកនេះ។ ដ្បិតមិនទាន់ហ៊ានអះអាងថា ជាបញ្ហាធ្ងន់ធ្ងរក្តី ប៉ុន្តែលោក តាន់ ផាន់ណារ៉ា បាននិយាយថា ករណីផ្ទុះជំងឺប៉េស្តជ្រូកនេះ មិនមែនជារឿងធូរស្រាលសម្រាប់កម្ពុជានោះទេ។
សូមស្ដាប់សំឡេងលោក តាន់ ផាន់ណារ៉ា៖
ឆ្លើយនឹងសំនួរអ្នកកាសែត ជុំវិញបញ្ហាប៉េស្តជ្រូកអាហ្វ្រិកនេះ អគ្គនាយកដ្ឋានសុខភាពសត្វនិងផលិតកម្មសត្វ នៃក្រសួងកសិកម្មរូបនេះ បាននិយាយថា៖«នៅក្នុងប្រទេសយើង ដែលផ្ទុះជំងឺ(ប៉េស្តជ្រូកអាហ្វ្រិក)នេះ គឺវាបង្កដោយវីរុសប្រភេទទី២ ដែលមានលក្ខណៈស្រួចស្រាវធ្វើឲ្យសត្វស្លាប់លឿន១០០ភាគរយ»។
បើតាមលោក តាន់ ផាន់ណារ៉ា ក្រសួងកសិកម្ម ក៏ចង់ចេញវិធានការបិទការនាំចូលជ្រូកទាំងស្រុងពីប្រទេសជិតខាងដែរ ប៉ុន្តែមិនទាន់អាចធ្វើបាននោះទេ ដោយសារតែកសិដ្ឋានចិញ្ចឹមជ្រូកនៅកម្ពុជា មិនអាចមានលទ្ធភាពគ្រប់គ្រាន់ ក្នុងការផ្គត់ផ្គង់តម្រូវការក្នុងស្រុក។ បច្ចុប្បន្នកម្ពុជា បិទការនាំចូលជ្រូកពីវៀតណាម ដែលកំពុងផ្ទុះជំងឺប៉េស្តជ្រូកនេះ ពោលគឺនាំចូលជ្រូកពីថៃចន្លោះពី១៥០០ក្បាល ទៅ២០០០ក្បាល ដើម្បីផ្គត់ផ្គង់តម្រូវការពលរដ្ឋ ។ នេះបើតាមអ្នកនាំពាក្យក្រសួងកសិកម្ម។
នៅពេលអ្នកកាសែតសួរថា តើរដ្ឋាភិបាលនឹងមានការដោះស្រាយយ៉ាងម៉េច ចំពោះបញ្ហាខាតបង់របស់ពលរដ្ឋដែលរកស៊ីចិញ្ចឹមជ្រូក ហើយជួបបញ្ហាជំងឺប៉េស្តជ្រូកអាហ្វ្រិកនេះ។ លោក ផៃ ស៊ីផាន អ្នកនាំពាក្យរដ្ឋាភិបាល ចូលខ្លួនបកស្រាយថា រដ្ឋាភិបាលគ្មានគោលនយោបាយចំណាយថវិកាដោះស្រាយជំងឺប៉េស្តជ្រូកអាហ្វ្រិកទេ ពោលគឺវាអាស្រ័យលើការសម្រេចចិត្តសម្ដេចនាយករដ្ឋមន្ត្រី ហ៊ុន សែន ប៉ុណ្ណោះ។
ប៉ុន្តែអ្វីដែលរដ្ឋាភិបាល អាចធ្វើបាននៅពេលនេះ គឺអំពាវនាវដល់ឈ្មួញ កុំឆ្លៀតឱកាសដំឡើងថ្លៃជ្រូក ក្រៅពីវិធានការរឹតបន្តឹងការនាំចូលជ្រូក ដើម្បីទប់ស្កាត់បញ្ហាជំងឺប៉េស្តជ្រូកនេះ។
សូមស្ដាប់សំឡេងលោក ផៃ ស៊ីផាន៖
«ដំណាក់កាលយើង មិនទាន់មានគម្រោងនូវការជួយចែករំលែកការបង់ខាតរបស់អ្នកចិញ្ចឹញនៅក្នុងគ្រួសារនោះទេ។ ប៉ុន្តែមិនមែនបានសេចក្តីថា ដាច់ណាត់យើងមិនធ្វើនោះទេ ព្រោះវាជាការសម្រេចចិត្តនៅក្នុងនយោបាយទៅវិញ។ ខ្ញុំមិនដឹងទេ ពីការសម្រេចចិត្តផ្នែកនយោបាយ ប៉ុន្តែបើតាមច្បាប់ តាមគោលការណ៍យើងអត់មានចែករំលែក នៅក្នុងការខូចខាតនេះទេ»។ នេះជាការបញ្ជាក់របស់លោក ផៃ ស៊ីផាន ដែលបានបន្ថែមថា ករណីកម្ទេចសត្វជ្រូកដែលជំងឺប៉េស្តជ្រូកអាហ្វ្រិកនេះ គឺជាការព្រមព្រៀងរវាងពលរដ្ឋអ្នកជំងឺជ្រូក ជាមួយខាងអាជ្ញាធរជំនាញរបស់រដ្ឋាភិបាល ដើម្បីចូលរួមទប់ស្កាត់ជំងឺនេះប៉ុណ្ណោះ។
គួរបញ្ជាក់ថា មកដល់ពេលនេះ ករណីផ្ទុះរីករាលដាលជំងឺប៉េស្តជ្រូកនេះ បានកើតឡើងនៅក្នុងខេត្តចំនួន៥ហើយ ដោយក្នុងនោះរួមមាន ខេត្តរតនគិរី ត្បូងឃ្មុំ ស្វាយរៀង តាកែវ និងកណ្ដាល៕