អន្តរជាតិ
រដ្ឋាភិបាលលីប៊ី ទាមទារឲ្យបារាំងបកស្រាយពីវត្តមានមីស៊ីលរបស់ខ្លួនក្នុងដៃក្រុមឧទ្ទាម មីស៊ីលប្រឆាំងរថក្រោះរបស់បារាំងដែលរកឃើញនៅក្នុងបន្ទាយទ័ពលោក ខាលីហ្វា ហាហ្វតា កាលពីខែមិថុនា។ រូបភាព AFP
× រដ្ឋាភិបាលលីប៊ីដែលទទួលស្គាល់ដោយអង្គការសហប្រជាជាតិ នៅថ្ងៃទី១១ ខែកក្កដា បានទាមទាររកការពន្យល់ពីសំណាក់បារាំងជុំវិញវត្តមានមីស៊ីលរបស់មហាអំណាចមួយនេះក្នុងដៃរបស់កម្លាំងទ័ពរបស់សេនាប្រមុខ ខាលីហ្វា ហាហ្វតា នាពេលថ្មីៗនេះ។ ការរកឃើញមីស៊ីលនេះ ជារឿងស្រងាកចិត្តមួយសម្រាប់រដ្ឋាភិបាលប្រចាំទីក្រុងទ្រីប៉ូលី ដែលប្រយុទ្ធតតាំងជាមួយកងកម្លាំងស្មោះស្ម័គ្រនឹងលោក ហាហ្វតា តាំងពីខែមេសាមកនោះ។
តើមីស៊ីលបារាំងធ្លាក់ដល់ដៃក្រុមយោធាឧត្តមសេនីយ៍ ខាលីហ្វា ហាហ្វតា ដោយតាមផ្លូវណា ដោយវិធីណា និងនៅពេលណា? នេះជាសំណួររបស់រដ្ឋមន្ត្រីការពារជាតិលីប៊ី Taher Siala ទៅកាន់សមភាគីបារាំង Jean-Yves Le Drian បន្ទាប់ពីកម្លាំងយោធារបស់រដ្ឋាភិបាលលីប៊ីដែលទទួលស្គាល់ដោយអង្គការសហប្រជាជាតិ រកឃើញមីស៊ីល Javelin ដែលមានអក្សរកូដជាភាសាបារាំងនៅខាងលើនោះ នៅមូលដ្ឋានដែលប្រើប្រាស់ដោយកម្លាំងទ័ពគាំទ្រលោក ហាហ្វតា ។
ការរកឃើញមីស៊ីលនេះ កើតឡើងខណៈដែលយោធានៃរដ្ឋាភិបាលរួបរួមជាតិប្រចាំទីក្រុងទ្រីប៉ូលី ប្រយុទ្ធគ្នាជាមួយកងកម្លាំងជាតិលីប៊ីដែលស្មោះត្រង់នឹងលោក ហាហ្វតា ។ មានប្រភពពីភាគខាងកើតលីប៊ី យោធាដែលស្មោះនឹងឧត្តមសេនីយ៍ចូលនិវត្តន៍នេះ កាលពីខែមេសា បានបើកប្រតិបត្តិការរុលទៅភាគខាងលិចដើម្បីរំដោះទីក្រុងទ្រីប៉ូលី និងលីប៊ីទាំងមូល។ ការវាយប្រយុទ្ធគ្នានេះ ធ្វើឲ្យមនុស្សជាច្រើនស្លាប់ និងរាប់ម៉ឺននាក់ភៀសខ្លួន។
បើតាមសេចក្ដីប្រកាសរបស់ក្រសួងការពារជាតិនៅថ្ងៃទី១១ ខែកក្កដា លោក Siala ក៏ទាមទារឲ្យបារាំងផ្ដល់ព័ត៌មានពាក់ព័ន្ធបរិមាណមីស៊ីលដែលវត្តមានរបស់វាផ្ទុយពីការប្រកាសរបស់រដ្ឋាភិបាលដែលគាំទ្ររដ្ឋាភិបាលរួបរួមជាតិនៅទ្រីប៉ូលី។ តាមពិតទៅ បារាំងក៏បានទទួលស្គាល់ពីវត្តមានមីស៊ីលរបស់ខ្លួនក្នុងបន្ទាយទ័ពរបស់លោក ហាហ្វតា ដែរ ប៉ុន្តែបដិសេធថា ខ្លួនមិនបានឲ្យមីស៊ីលនេះទៅកម្លាំងលោក ហាហ្វតា ឡើយ និងថា យោធាបារាំងនៅលីប៊ីបាត់ដានមីស៊ីលនេះ។
ជាប្រភេទមីស៊ីលប្រឆាំងរថក្រោះ មីស៊ីល Javelin នេះ ផលិតនៅអាមេរិកមានតម្លៃមួយគ្រាប់១៧ម៉ឺនដុល្លារ ។ មីស៊ីលនេះ ត្រូវបានរឹបអូសបាននៅមូលដ្ឋានទ័ពនៅភាគខាងត្បូងទីក្រុងទ្រីប៉ូលីដោយយោធារដ្ឋាភិបាលលីប៊ី។ ក្រៅពីមីស៊ីលនេះ កងទ័ពរដ្ឋាភិបាលក៏រកឃើញខែលការពារផលិតនៅចិន ហើយមានសញ្ញាសម្គាល់របស់អេមីរ៉ាតអារ៉ាប់រួមផងដែរ។ វត្តមាននេះ បង្កជាការសង្ស័យថា ក្រុងប៉ារីសលួចគាំទ្រលោក ហាហ្វតា ពីក្រោយខ្នង។
ការប្រទាញប្រទង់រវាងកម្លាំងទ័ពភាគខាងកើតមានអង្គការសហប្រជាជាតិទទួលស្គាល់ និងទ័ពឧទ្ទាមភាគខាងលិច ធ្វើឲ្យវិបត្តិនៅលីប៊ីផុងកាន់ជ្រៅ រកច្រកចេញមិនឃើញ ទោះអង្គការសហប្រជាជាតិប្រឹងសម្របសម្រួលយ៉ាងណាក្ដី។ ការដួលរំលំរបបលោកដឹកនាំ មូអាម៉ា កាដាហ្វី ក្នុងឆ្នាំ២០១១ ដែលគេរំពឹងថា នឹងធ្វើឲ្យលីប៊ីល្អប្រសើរជាងមុននោះ បែរជាធ្វើឲ្យប្រទេសសម្បូរធនធានមួយញាំញីដោយវិបត្តិមិនចេះចប់ទៅវិញ៕
© រក្សាសិទ្ធិដោយ thmeythmey.com