ជាតិ
សេដ្ឋកិច្ច
ហេតុអ្វី៦ខែដើមឆ្នាំនេះ ទេសចរនៅសៀមរាបធ្លាក់ចុះ? ស្តាប់លោករដ្ឋមន្ត្រីបកស្រាយ!
× សៀមរាប៖ យោងតាមរបាយការណ៍របស់គ្រឹះស្ថានអង្គរ នារយៈពេល៦ខែដើមឆ្នាំ២០១៩នេះ ភ្ញៀវទេសចរដែលទិញសំបុត្រចូលទស្សនារមណីយដ្ឋានអង្គរធ្លាក់ចុះជាង ៨ភាគរយបើធៀបនឹងឆ្នាំ២០១៨។ រដ្ឋមន្ត្រីក្រសួងទេសចរណ៍ក៏ទទួលស្គាល់ពីការធ្លាក់ចុះនេះដែរ ហើយបានប្រាប់ពីមូលហេតុខ្លះដែលធ្វើឱ្យធ្លាក់បែបនេះ។
សូមស្ដាប់សំឡេងលោករដ្ឋមន្ត្រីក្រសួងទេសចរណ៍
នៅចំពោះមុខអ្នកចូលរួមប្រមាណ៤០០នាក់ ក្នុងពិធីបិទសិក្ខាសាលាស្ដីពីការរៀបចំផែនការមេអភិវឌ្ឍវិស័យទេសចរណ៍ខេត្តសៀមរាបកាលពីថ្ងៃទី១១ កក្កដា លោក ថោង ខុន បានបង្ហាញកង្វល់ដែលស្ថានភាពទេសចរណ៍ក្នុងខេត្តសៀមរាបនៅឆ្នាំនេះអាក្រក់ជាងឆ្នាំទៅ។ លោករដ្ឋមន្ត្រីបានចោទជាសំណួរទៅកាន់តែអ្នកចូលរួម ដោយលើកថា ហេតុអ្វី៦ខែដើមឆ្នាំ២០១៩នេះ ភ្ញៀវនៅខេត្តសៀមរាបធ្លាក់ចុះ? សួរខ្លួនឯង ឆ្លើយខ្លួនឯង លោក ថោង ខុន ថាមានកត្តាជាច្រើននៅក្នុងរឿងនេះ តែបានលើកហេតុផលសំខាន់មួយដែលក្រសួងបានរកឃើញ នោះគឺការរកស៊ីកញ្ចប់ទេសចរណ៍ចំណេញរឺខាតដើម ឬ Zero Cost tour។ តាមលោករដ្ឋមន្ត្រី ការលក់កញ្ចប់បែបនេះ គឺស្មើនឹងសម្លាប់ខ្លួនឯងយ៉ាងដូច្នោះដែរ។
លោករដ្ឋមន្ត្រីពន្យល់ ក្រុមហ៊ុនដែលលក់កញ្ចប់ Zero Cost tour គឺជាអ្នកបំផ្លាញគោលដៅទេសចរណ៍ ព្រោះថាបណ្ដាក្រុមហ៊ុនទាំងនោះយកភ្ញៀវមកក្នុងតម្លៃទាបឬមិនចំណេញតែម្ដង តែពួកគេរកស៊ីនៅតាមហាងវត្ថុអនុស្សាវរីយ៍ អាហារដ្ឋាន ឬសណ្ឋាគារជាដើមដែលលក់ក្នុងតម្លៃខ្ពស់។ លោក ថោង ខុន បញ្ជាក់ថា ការធ្លាក់ចុះចំនួនទេសចរណ៍នេះ មានអ្នកខ្លះបន្ទោសថាតម្លៃសំបុត្រឡើងថ្លៃ តែតាមពិតមិនដូច្នោះទេ គឺជាមួយកញ្ចប់ Zero Cost tour នេះទេ ដែលធ្វើឱ្យទេសចរមានបទពិសោធន៍ ហើយលែងចង់មកម្ដងទៀត។
ក្រៅពីករណី Zero Cost tour នេះ លោក ថោង ខុន ក៏ចាប់លើកឡើងពីការប្ដូរទិសដៅរបស់ទេសចរជនជាតិកូរ៉េផងដែរ។ លោករដ្ឋមន្ត្រីពន្យល់ថា ភ្ញៀវទេសចរកូរ៉េដែលធ្លាប់ឈរនៅកំពូលនៃចំនួនទេសចរមកកម្សាន្តកម្ពុជា បានប្ដូរទៅប្រទេសវៀតណាមវិញ ដ្បិតប្រទេសនេះមានគោលនយោបាយទេសចរណ៍ថ្មី ដោយជនជាតិណាក៏ដោយក៏អាចធ្វើមគ្គុទ្ទេសក៍សម្រាប់ភ្ញៀវបរទេសបានដែរ មិនចាំបាច់ជនជាតិខ្លួនឡើយ។ គោលការណ៍នេះខុសពីច្បាប់កម្ពុជាដោយចែងថា មគ្គុទ្ទេសក៍ឬអ្នកបកប្រែគឺជាជនជាតិកម្ពុជា៕
Tag:
ថោង ខុន
ទេសចរណ៍សៀមរាប
អង្គរវត្ត
គ្រឹះស្ថានអង្គរ
Zero Cost tour
© រក្សាសិទ្ធិដោយ thmeythmey.com