ប្រធានាធិបតីបារាំង លោក អេម៉ានុយអែល ម៉ាក្រុង (Emmanuel Macron) បានប្រកាសនៅថ្ងៃទី១៣ ខែកក្កដា ថា លោកបានអនុម័តការបង្កើតបញ្ជាការអវកាស ដោយស្ថិតក្នុងកងកម្លាំងជើងអាកាសបារាំង។ ការបង្កើតកងកម្លាំងអវកាសនេះ មានគោលដៅពង្រឹងសមត្ថភាពការពារជាតិរបស់ប្រទេសនេះ។
ថ្លែងនៅមុខកងយោធាបារាំង ដែលប្រមូលផ្តុំគ្នានៅមុនទិវាបុណ្យជាតិបារាំង ថ្ងៃទី១៤ ខែកក្កដា លោកប្រធានាធិបតី ម៉ាក្រុង បានបញ្ជាក់ថា៖ «ដើម្បីធានានូវការអភិវឌ្ឍ និងការពង្រឹងសមត្ថភាពរបស់យើងក្នុងដែនអវកាស បញ្ជាការកម្រិតខ្ពស់សម្រាប់អវកាស នឹងត្រូវបង្កើតឡើង នាខែកញ្ញាខាងមុខ»។
តាមការចុះផ្សាយរបស់ទីភ្នាក់ងារព័ត៌មាន AFP មេដឹកនាំបារាំងវ័យ ៤១ឆ្នាំរូបនេះ បានហៅកងកម្លាំងទទួលបន្ទុកកិច្ចការអវកាសនេះថាជា «បញ្ហាសន្តិសុខជាតិពិតប្រាកដ»។ ត្រង់ចំណុចនេះ លោក បន្ថែមថា កាលពីឆ្នាំនេះ លោក ធ្លាប់បានលើកឡើងពីតម្រូវការយ៉ាងចាំបាច់សម្រាប់យុទ្ធសាស្ត្រដើម្បីការពារអវកាស ហើយការបង្កើតកម្លាំងអវកាសនេះ គឺជាលទ្ធផល។
«យើង នឹងពង្រឹងចំណេះដឹងអំពីស្ថានការណ៍ក្នុងដែនអវកាស ហើយយើង នឹងមានសមត្ថភាពកាន់តែប្រសើរជាងមុន ដើម្បីការពារផ្កាយរណបរបស់យើងយ៉ាងសកម្មបំផុត»។ នេះជាការសង្កត់ធ្ងន់របស់លោកប្រធានាធិបតី ម៉ាក្រុង ដោយបន្ថែមថា រដ្ឋមន្ត្រីការពារបារាំង លោកស្រី Florence Parly នឹងស្រាយបំភ្លឺលម្អិតអំពីគម្រោងនេះ នាពេលក្រោយទៀត។
ចំណាប់អារម្មណ៍របស់បារាំងក្នុងការបង្កើនសមត្ថភាពយោធារបស់ខ្លួនក្នុងដែនអាកាស ត្រូវបានប្រកាសឡើង ក្រោយពីគំនិតផ្តួចផ្តើមដូចគ្នា ត្រូវបានដាក់ចេញដោយសហរដ្ឋអាមេរិក ចិន និងរុស្ស៊ីបន្តបន្ទាប់គ្នា។
អ្នកតាមដានអន្តរជាតិជាច្រើន សម្លឹងឃើញថា សកម្មភាពយោធានានា រួមមាន ផ្កាយរណបចារកម្ម សម្ភាររំខាន និងតាមចាប់ទីតាំង ព្រមទាំងការវាយប្រហារតាមប្រព័ន្ធអ៊ីនធឺណិត កំពុងត្រូវបានប្រទេសមហាអំណាចបង្កើតឡើងយ៉ាងច្រើនក្នុងគន្លងជុំវិញផែនដី។
ខណៈខ្លួន មានភ្នាក់ងារអវកាសចំណាស់បំផុតលំដាប់ទី៣លើពិភពលោក បារាំង បានចាប់ផ្តើមយកចិត្តទុកដាក់លើកិច្ចការអវកាសក្នុងរយៈពេលប៉ុន្មានឆ្នាំចុងក្រោយនេះ។ តាម AFP ក្រុងប៉ារីស មានគម្រោងចាយលុយ ៤ពាន់លានដុល្លារចន្លោះពីឆ្នាំ ២០១៩ ដល់ឆ្នាំ២០១៥ សម្រាប់កិច្ចការពារក្នុងដែនអវកាស។ ហើយក្នុងខែធ្នូ ឆ្នាំ ២០១៨ ខ្លួន បានដាក់ដំណើរការផ្កាយរណបតាមដានយោធាថ្មីមួយ ឈ្មោះថា CSO-1 ។
តាមពិតទៅ ផែនការបង្កើតបញ្ជាការអវកាសថ្មីរបស់បារាំងនេះ មើលទៅស្រដៀងនឹង បញ្ជាការអវកាសសហរដ្ឋអាមេរិក ដែលជាផ្នែកមួយរបស់យោធាអាមេរិក បង្កើតឡើងដំបូង ក្នុងឆ្នាំ១៩៨៥ ដើម្បីតាមដាន និងសម្របសម្រួលប្រតិបត្តិការរបស់ផ្កាយរណប។ យ៉ាងណាមិញ បញ្ជាការអវកាសនេះ ត្រូវបានបិទចោល និងបញ្ចូលទៅក្នុងបញ្ជាការយុទ្ធសាស្ត្រអាមេរិក ក្រោយពីការវាយប្រហារថ្ងៃទី ១១ ខែកញ្ញា ឆ្នាំ ២០១១។
ទោះជាបែបនេះក្តី កាលពីឆ្នាំ២០១៨កន្លងទៅ ប្រធានាធិបតីអាមេរិក លោក ដូណាល់ ត្រាំ បានចេញបញ្ជាឲ្យក្រសួងការពារអាមេរិក បង្កើតបញ្ជាការអវកាសថ្មីមួយដាច់ដោយឡែក ហើយពេញលេញ ដែលស្គាល់ថា «កងកម្លាំងអវកាស»៕