កីឡាជាតិ
ជាតិ
លោក សៅ សុខា៖ មានមន្ត្រីមួយចំនួនធ្វើប្រធានសហព័ន្ធ ដើម្បីបង្កើតមុខរបររកស៊ី លោក សៅ សុខា ថ្លែងក្នុងអង្គប្រជុំបូកសរុបការងារប្រចាំត្រីមាសរបស់ CAMSOC នៅទីស្តីការគណៈរដ្ឋមន្ត្រី, រូបភាពពីហ្វេសប៊ុក SEA Games 2023
× អនុប្រធានទី១នៃគណៈកម្មាធិការជាតិអូឡាំពិកកម្ពុជាលោក សៅ សុខា កត់សម្គាល់ឃើញថា មានមន្ត្រីមួយចំនួនបានប្រើប្រាស់វិស័យកីឡាក្រោមរូបភាពឈរឈ្មោះជាប្រធាន ឬអគ្គលេខាធិការសហព័ន្ធ ដើម្បីបង្កើតមុខរបររកផលចំណេញ។ សម្រាប់លោក កត្តានេះ ជាមូលហេតុ ដែលធ្វើឲ្យសហព័ន្ធកីឡាជាតិមួយចំនួនគ្មានភាពរីកចម្រើន។ ជាមួយគ្នានេះ លោក បានផ្តល់ដំបូន្មានដល់សហព័ន្ធទាំងនោះ ដោយជំរុញឲ្យមានការផ្លាស់ប្តូរថ្នាក់ដឹកនាំ និងសមាជិកអសកម្ម។
នាកិច្ចប្រជុំបូកសរុបការងារប្រចាំត្រីមាស និងដាក់ទិសដៅអនុវត្តបន្តរបស់គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍(CAMSOC)កាលពីព្រឹកថ្ងៃទី១៥ កក្កដា លោក សៅ សុខា សមាជិកប្រតិបត្តិ CAMSOC បានកត់សម្គាល់ឃើញថា មានសហព័ន្ធមួយចំនួនមានការរីកចម្រើន ហើយក៏មានសហព័ន្ធខ្លះគ្មានការរីកចម្រើនផងដែរ។ គ្មានរីកចម្រើន ក៏ដោយសារសហព័ន្ធទាំងនោះមានថ្នាក់ដឹកនាំ និងសមាជិកប្រតិបត្តិគ្មានស្មារតីជួយចូលរួមចំណែកក្នុងការអភិវឌ្ឍ។
ទន្ទឹមនឹងលើកពីអត្ថប្រយោជន៍របស់ប្រធាន និងអគ្គលេខាធិការ មានតួនាទីសំខាន់ក្នុងការអភិវឌ្ឍសហព័ន្ធ លោក សៅ សុខា ដែលជាអនុប្រធានទី១នៃគណៈកម្មាធិការជាតិអូឡាំពិកកម្ពុជាបានលើកឡើងថា៖«ខ្ញុំគិតថា សហព័ន្ធមួយចំនួន ដែលគិតថាខ្លួនមិនអាចទៅរួចគួរមានការផ្លាស់ប្តូរ ព្រោះយើងមិនមែនធ្វើលេងៗនោះទេ គឺធ្វើមែនទែន។ បើសហព័ន្ធធ្វើលេងៗគ្រាន់តែចង់ពាក់អាវធំនិងក្រវាត់ក ដើម្បីថតរូបបង្ហោះបង្អួតគេ គឺមិនបាច់ធ្វើទេ។ មានបងៗមួយចំនួនគាត់ធ្វើប្រធានសហព័ន្ធ គ្រាន់តែដើម្បីបង្កើតមុខរបររកស៊ី និងឲ្យស្គាល់គេនោះទេ ព្រោះមកគាត់ប្តឹងខ្ញុំ ទើបខ្ញុំដឹង»។
ប្រធានសហព័ន្ធកីឡាបាល់ទាត់រូបនេះបានបញ្ជាក់ថា ការលើកឡើងរបស់ លោក មិនចង់សំដៅទៅលើសហព័ន្ធណាមួយ ហើយក៏មិនមែនដើម្បីបន្ទុចបង្អាក់ការខិតខំអភិវឌ្ឍផងដែរ។ ពោលគឺការលើកឡើងនេះ គឺក្នុងន័យចូលរួមចំណែកអភិវឌ្ឍន៍វិស័យកីឡាឲ្យកាន់តែរីកចម្រើន ដើម្បីត្រៀមការប្រកួតកីឡាស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះតែប៉ុណ្ណោះ។
សម្រាប់លោក សៅ សុខា ការរៀបចំផែនការអនុវត្ត និងកំណត់យុទ្ធសាស្ត្រច្បាស់លាស់ និងជ្រើសរើសកីឡាករឲ្យបានត្រឹមត្រូវដើម្បីប្រមូលផ្តុំហ្វឹកហាត់នៅក្នុងស្រុក ឬបញ្ជូនទៅក្រៅប្រទេស នឹងជួយឲ្យសហព័ន្ធ ក៏ដូចជាវិស័យកីឡាកម្ពុជាទាំងមូលកាន់តែមានការរីកចម្រើន។ ការរៀបចំហេដ្ឋារចនាសម្ព័ន្ធបម្រើឲ្យការហ្វឹកហាត់ឲ្យគ្រប់គ្រាន់ និងរៀបចំការប្រកួតឲ្យបានច្រើន ក៏ជាកត្តារួមចំណែកក្នុងការអភិវឌ្ឍន៍ផងដែរ។ លោកជឿជាក់ថា បើគ្រាន់តែហ្វឹកហាត់គ្មានការប្រកួតប្រជែង គឺសមត្ថភាពកីឡាករមិនអាចរីកចម្រើនបានឡើយ៕
© រក្សាសិទ្ធិដោយ thmeythmey.com