កីឡាអន្តរជាតិ
អន្តរជាតិ
បារាំងចាប់ខ្លួនមនុស្ស ២៨២នាក់ ក្រោយអាល់ហ្សេរីឡើងវគ្គផ្តាច់ព្រ័ត្រ Africa Cup
× មនុស្សចំនួន ២៨២ នាក់ត្រូវបានចាប់ខ្លួននៅប្រទេសបារាំងដោយសារពួកគេបង្កចលាចល នៅក្រោយក្រុមកីឡាបាល់ទាត់ជម្រើសជាតិអាល់ហ្សេរីបានឡើងទៅកាន់វគ្គផ្តាច់ព្រ័ត្រនៃពានរង្វាន់ Africa Cup of Nations។ នេះបើតាមការបញ្ជាក់របស់ក្រសួងមហាផ្ទៃបារាំង នៅថ្ងៃទី១៥ ខែកក្កដានេះ។
ការអបអរបែបកុប្បកម្មរបស់ប្រជាជនអាល់ហ្សេរីបែបនេះ បានផ្ទុះឡើងនៅទូទាំងប្រទេសបារាំងតែម្តង បន្ទាប់ពីក្រុមជម្រើសជាតិរបស់ពួកគេបានយកឈ្នះនីហ្សេរីយ៉ា ២-១ នាជំនួបវគ្គពាក់កណ្តាលផ្តាច់ព្រ័ត្រ។ ហេតុការណ៍ខាងលើក៏ ត្រូវបានក្រសួងមហាផ្ទៃអះអាងថាបានចាប់ខ្លួនជនបង្កនៅទូទាំងប្រទេសដូចគ្នា នាល្ងាចថ្ងៃអាទិត្យទី១៤ ខែកក្កដា។
ការចាប់ខ្លួនមនុស្សមួយចំនួនក្នុងចំណោមនោះ ក៏មានជាប់ពាក់ព័ន្ធទៅនឹងការតវ៉ានាការប្រារព្ធបុណ្យជាតិបារាំង (France's national) ក្នុងថ្ងៃដដែលនោះដែរ។
ភាពចលាចល និងភាពច្របូកច្របល់បានផ្ទុះឡើងខ្លាំងនៅក្រុងប៉ារីស Marseille និង Lyon ដែលសម្បូរប្រជាជនអាល់ហ្សេរីរស់នៅច្រើន។ ក្នុងចំណោមក្រុងទាំងបី ប៉ារីសធ្ងន់ធ្ងរជាងគេដ្បិតក្រុមអ្នកគាំទ្របាល់ទាត់បានប៉ះទង្គិចគ្នាជាមួយប៉ូលិសនៅលើដងផ្លូវ Champs-Elysees។ ដោយឡែករថយន្តរាប់សិបគ្រឿងត្រូវដុតកម្ទេចនៅក្រុង Lyon។
នៅថ្ងៃដដែលនោះ នាទីក្រុង Montpellier មានអ្នកគាំទ្រអាល់ហ្សេរីបានអបអរជ័យជម្នះរបស់ក្រុមពួកគេរហូតបាត់បង់ការគ្រប់គ្រងខ្លួនឯង ដោយបើកបររថយន្ក្នុងល្បឿនលឿនទៅមុខមនុស្សមួយគ្រួសារដែលសម្លាប់ស្ត្រីម្នាក់ និងធ្វើឲ្យកូនរបស់ស្ត្រីនោះរបួសធ្ងន់ធ្ងរផងដែរ។
សូមបញ្ជាក់ថា បានឈានទៅកាន់វគ្គផ្តាច់ព្រ័ត្រពានរង្វាន់ប្រចាំតំបន់អាហ្វ្រិក Africa Cup of Nations ឆ្នាំ២០១៩ ដែលអេហ្ស៊ីបធ្វើម្ចាស់ផ្ទះដោយត្រូវជួបសេណេហ្គាល់៕
Tag:
Africa Cup
អាល់ហ្សេរី
© រក្សាសិទ្ធិដោយ thmeythmey.com