សួនច្នៃសំរាម និងហាងកាហ្វេ ដែលមហាជនឧបត្ថម្ភ នឹងបើកដំណើរការនាពេលខាងមុខ

ជាតិ

សួនច្នៃសំរាម និងហាងកាហ្វេ ដែលមហាជនឧបត្ថម្ភ នឹងបើកដំណើរការនាពេលខាងមុខ

16, Jul 2019 , 8:29 am

រូបភាព

ដោយ: ឡាយ សុភាវតី

សួនច្នៃសំរាម និងកាហ្វេបរិស្ថាន ដែលផ្តួចផ្ដើមកសាងពីយុវជនជិត១ខែមកហើយ ជាមួយនឹងការចូលរួមឧបត្ថម្ភពីប្រជាពលរដ្ឋ នឹងបើកដំណើរការនៅដើមខែក្រោយ។ នេះបើតាមលោក សាន ដារ៉ាវីត ប្រធានក្រុមយុវជនសំរាម ដែលបានបញ្ជាក់ប្រាប់សារព័ត៌មានថ្មីៗ តាមទូរសព្ទ។ បើតាមលោក ដារ៉ាវីត សួនច្នៃសំរាម សម្រាប់ពលរដ្ឋ អាចចូលច្នៃសំរាម ទៅជារបស់ប្រើប្រាស់ផ្សេៗ។ រីឯកាហ្វេបរិស្ថាន សម្រាប់ការជួបជុំទទួលទានកាហ្វេឥតគិតថ្លៃ ដើម្បីបង្កើនមិត្តភាពរវាងយុវជន និងអ្នកចូលរួម។

ការកសាងហាងកាហ្វេសំរាម និងសួនច្នៃសំរាម មានការចូលរួមឧបត្ថមពីពលរដ្ឋជាច្រើន ក្រោយការអំពាវនាវពី លោក សាន ដារ៉ាវីត ប្រធានក្រុមយុវជនសំរាម ដែលខ្វះខាតថវិកា។ យ៉ាងណាក៏ដោយ ថវិកាទទួលបានពីការឧបត្ថម្ភរបស់ប្រជាពលរដ្ឋ លោក ដារ៉ាវីត សុំមិនបង្ហាញតួលេខឡើយ។

រូបភាពពីទំព័រហ្វេសប៊ុក លោក សាន ដារ៉ាវីត

យុវជនរូបនេះ បានលើកឡើងពីគម្រោងសួនច្នៃសំរាម និងហាងកាហ្វេសំរាមថា៖«សួនសំរាម គឺសម្រាប់កែច្នៃសំរាមទៅជារបស់ប្រើប្រាស់ ដែលមានប្រយោជន៍ផ្សេង ដែលយកសំរាមពីគ្រប់កន្លែង ជាពិសេសម្ដុំប្រឡាយបឹងត្របែក។ ហាងកាហ្វេ អាចនឹងផឹកដោយមិនគិតលុយ។ ខ្ញុំកំពុងរៀបចំរកវិធីដោះដូរយ៉ាងណា ដើម្បីឲ្យពលរដ្ឋបានផឹកកាហ្វេដោយមិនគិតលុយ ហើយហាងកាហ្វេ អាចនឹងបើកបាននៅថ្ងៃទី១ ខែក្រោយ។ ទីតាំងកន្លែងហាងកាហ្វេនេះ ស្ថិតនៅប្រឡាយបឹងត្របែក សង្កាត់បឹងត្របែក ខណ្ឌចំការមន ក្បែរទីតាំងក្រុមយុវជនសំរាម បានរើសសំរាមកាលពីមុន ហើយទីតាំងនេះ ត្រូវជួលក្នុងមួយខែ៥០០ដុល្លារ»។

ប្រធានក្រុមយុវជនសំរាម បញ្ជាក់ឲ្យដឹងថា ក្រុមយុវជនសំរាម មិនបានឈប់រើសសំរាមទេ ដោយសាររវល់រៀបចំសួនច្នៃសំរាម និងហាងកាហ្វេ ហើយឥឡូវអាជ្ញាធរ បានកំពុងប្រមូលដោយប្រើអេស្កាវ៉ាទ័រ កាយនៅប្រឡាយបឹងត្របែក។ បន្ទាប់ពីរៀបចំទាំងពីខាងលើរួច ក្រុមលោក ដារ៉ាវីត នឹងប្រមូលសំរាមមកសម្រាប់កែច្នៃនៅសួនច្នៃសំរាម៕