ជាតិ
សេដ្ឋកិច្ច
ឆមាសទី១ ការវិនិយោគក្នុងវិស័យសំណង់មានទុនជាង ៣ពាន់លានដុល្លារ កើនពាក់កណ្ដាល
រូបផ្តល់ដោយ លោក ហុង វ៉ាន់ឌី
×![]()
ភ្នំពេញ៖ ឆមាសទីមួយ ឆ្នាំ២០១៩ សំណង់កម្ពុជាមានចំនួន២០៤៧គម្រោង ក្នុងទំហំផ្ទៃក្រឡា ៧លានម៉ែត្រក្រឡា ដែលមានតម្លៃវិនិយោគប៉ាន់ស្មាន ៣៣៩២ លានដុល្លារ។ តម្លៃវិនិយោគនៃវិស័យសំណង់នេះ បានកើនឡើងជិត៥៧,៧៥ភាគរយ បើធៀបឆមាសទីមួយ ឆ្នាំ២០១៨ ដែលមានជាង ២១៥៣ លានដុល្លារ។ នេះបើយោងតាមរបាយការណ៍បូកសរុបលទ្ធផលការងារ របស់ក្រសួងរៀបចំដែនដី នគរូបនីយកម្ម និងសំណង់។ 
របាយការណ៍នេះដដែលបានបង្ហាញថា ក្នុងចំណោមជាង២ពាន់គម្រោងខាងលើ មាន១៥៤គម្រោង ដែលមានតម្លៃជិត៣,០៧ពាន់លានដុល្លារ គឺស្ថិតនៅក្រោមសមត្ថកិច្ចរបស់ក្រសួងដែនដីផ្ទាល់់ និង១,៨៩៣គម្រោងទៀត មានផ្ទៃក្រឡាជាង១លានម៉ែត្រការ៉េ ដែលមានតម្លៃជាង៣១៨លានដុល្លារ ស្ថិតនៅក្រោមសមមត្ថកិច្ចរដ្ឋបាលរាជធានី-ខេត្ត។
លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានមើលឃើញថាការវិនិយោគក្នុងវិស័យសំណង់របស់កម្ពុជានៅតែទាក់ទាញអ្នកវិនិយោគ។ លោកបានថ្លែងប្រាប់សារព័ត៌មានថ្មីៗថា៖«កំណើននៃវិស័យសំណង់នេះ គឺជាសញ្ញណវិជ្ជមានមួយដែលបង្ហាញពីសក្កានុពលនៃសេដ្ឋកិច្ចកម្ពុជា ដែលក្រុមហ៊ុនអន្តរជាតិនានាទុកចិត្ត និងហ៊ានបោះទុនវិនិយោគលើវិស័យនេះ»។
រូបភាព ផ្តល់ដោយ លោក សៀង សុផល
តែយ៉ាងណាលោក ច្រឹក សុខនីម បញ្ជាក់ថាគម្រោងទាំងនេះ គឺជាគម្រោងចុះបញ្ជី តែការសាងសង់ ឬវិនិយោគជាក់ស្ដែង អាចមានការប្រែប្រួល។ លោក សុខនីម លើកឡើងដូចនេះថា៖«ចំនួនវិស័យសំណង់ដែលបានចុះបញ្ជីក្នុងក្រសួងរៀបចំដែនដីនឹងមានការកើនច្រើនឡើងៗ។ ប៉ុន្តែចំនួននៃការចុះបញ្ជីនេះ បើធៀបនឹងការសាងសង់ជាក់ស្តែង មានគម្រោងខ្លះ កំពុងសាងសង់ គម្រោងខ្លះមិនទាន់សាងសង់ ដែលយើងត្រូវពិនិត្យនិងតាមដានជាក់ស្តែង។ ជាទូទៅគម្រោងវិនិយោគលើវិស័យសំណង់ដែលបានចុះបញ្ជី មិនប្រាកដនឹងសាងសង់នោះទេ គ្រាន់តែសុំច្បាប់សាងសង់សិនប៉ុណ្ណោះ»។
ចាប់ពីឆ្នាំ២០០០ ដល់ត្រឹមឆមាសទីមួយ ឆ្នាំ២០១៩ ក្រសួងរៀបចំដែនដី បានចេញលិខិតអនុញ្ញាតសាងសង់ចំនួន ៤៥ ៦០៥គម្រោង ដែលមានផ្ទៃសាងសង់ជាង១២០លានម៉ែត្រក្រឡា ជាមួយនឹងតម្លៃវិនិយោគប៉ាន់ស្មាន ជាង៤៥ពាន់លានដុល្លារ។ ដោយឡែកក្នុងឆ្នាំ ២០១៨ កម្ពុជាបានផ្តល់ការអនុញ្ញាតលើគម្រោងសាងសង់សរុប ២ ៨៦៧ គម្រោង មានតម្លៃប្រមាណ ៥ ២២៨ លានដុល្លារ ធ្លាក់ចុះ ១៨,៦៦ ភាគរយ បើធៀបនឹងឆ្នាំ ២០១៧ ដែលមាន ៦ ៤២៨ លានដុល្លារ៕
Tag:
សំណង់
អចលនទ្រព្យ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
