អុីស្រាអែល រិះគន់អឺរ៉ុបដែលប្រឹងស្រោចស្រង់កិច្ចព្រមព្រៀងនុយក្លេអ៊ែរជាមួយអុីរ៉ង់

អន្តរជាតិ

អុីស្រាអែល រិះគន់អឺរ៉ុបដែលប្រឹងស្រោចស្រង់កិច្ចព្រមព្រៀងនុយក្លេអ៊ែរជាមួយអុីរ៉ង់

16, Jul 2019 , 7:39 pm

រូបភាព

នាយករដ្ឋមន្រ្តីអ៊ីស្រាអែល បេនចាមីន ណេតាន់យ៉ាហ៊ូ ។ រូបភាព AFP

ដោយ: តន ចាន់រិទ្ធារ៉ា

នាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ នៅថ្ងៃទី១៥ ខែកក្កដា រិះគន់ការប្រឹងប្រែងរបស់សហភាពអឺរ៉ុបក្នុងការស្រោចស្រង់កិច្ចព្រមព្រៀងនុយក្លេអ៊ែរជាមួយអ៊ីរ៉ង់។ ពាក្យរិះគន់នេះ កើតឡើងស្របពេលដែលប្រទេសអឺរ៉ុបកោះប្រជុំបន្ទាន់មួយដើម្បីជជែកពីការបំពានកិច្ចព្រមព្រៀងឆ្នាំ២០១៥ ដោយអ៊ីរ៉ង់។ អ៊ីស្រាអែល មិនដែលពេញចិត្តនឹងកិច្ចព្រមព្រៀងនេះឡើយ ដោយអះអាងថា ត្រូវបានអ៊ីរ៉ង់ប្រើដើម្បីលាក់បាំងមហិច្ឆតានុយក្លេអ៊ែររបស់ខ្លួនប៉ុណ្ណោះ។

តាមរយៈវីដេអូដែលបង្ហោះលើបណ្ដាញសង្គម Twitter របស់ខ្លួន នាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ (Benjamin Netanyahu) បានបង្ហាញការមិនពេញចិត្តរបស់ខ្លួនជុំវិញការចរចារបស់រដ្ឋមន្ត្រីការបរទេសអឺរ៉ុបលើសំណុំរឿងកិច្ចព្រមព្រៀងនុយក្លេអ៊ែរជាមួយអ៊ីរ៉ង់។ រដ្ឋមន្ត្រីការបរទេសអឺរ៉ុបដែលពាក់ព័ន្ធសំណុំរឿងនេះ បានបើកកិច្ចប្រជុំមួយនៅថ្ងៃទី១៥ ខែកក្កដាក្រោយអ៊ីរ៉ង់ប្រកាសថា ខ្លួនបានចម្រាញ់សារធាតុគីមីលើសការហាមប្រាមក្នុងការកិច្ចព្រមព្រៀងឆ្នាំ២០១៥ ។

អឺរ៉ុប ដែលតួនាទីជាអ្នកសម្របសម្រួលការគោរពកិច្ចព្រមព្រៀងឆ្នាំ២០១៥ បានប្រឹងប្រែងយ៉ាងខ្លាំងក្នុងការរក្សាដង្ហើមឲ្យកិច្ចព្រមព្រៀងដែលសម្រេចបានដោយលំបាកនេះ។ កិច្ចព្រមព្រៀងនេះ កំពុងស្ថិតក្នុងដំណើរទៅរកអវសានរបស់ខ្លួន ខណៈអ៊ីរ៉ង់ប្រកាន់ជំហរលែងគោរព ហើយអាមេរិកដែលដើរចេញនោះ ប្រឹងដាក់សម្ពាធមិនដកដៃលើអ៊ីរ៉ង់ទៅទៀត។ ទាំងអាមេរិក ទាំងអ៊ីរ៉ង់ ក៏សុទ្ធតែគ្មានជំហរត្រូវគ្នាក្នុងការចរចា សំដៅការពារកិច្ចព្រមព្រៀងនេះផងដែរ។

អ៊ីស្រាអែលវិញ រីករាយនឹងស្ថានការណ៍បច្ចុប្បន្ន ពិសេសសម្ពាធរបស់រដ្ឋបាលប្រធានាធិបតីអាមេរិក ដូណាល់ ត្រាំ លើអ៊ីរ៉ង់ ប៉ុន្តែការព្យាយាមរបស់អឺរ៉ុបពិតជាធ្វើឲ្យអ៊ីស្រាអែលរង្កៀសចិត្តខ្លាំង។ លោក ណេតាន់យ៉ាហ៊ូ និយាយបែបដាស់តឿនពីគ្រោះថ្នាក់បង្កដោយអ៊ីរ៉ង់ថា៖ «វាហាក់ដូចជាអឺរ៉ុបនឹងមិនភ្ញាក់ខ្លួនសោះ បើមីស៊ីលបំពាក់នុយក្លេអ៊ែររបស់អ៊ីរ៉ង់ មិនទាន់ធ្លាក់លើដីអឺរ៉ុបទេនោះ។ បើដល់ពេលនោះ អ្វីៗហួសពេលអស់ហើយ។»

តាមពិតទៅ អ៊ីស្រាអែលពិតជាបារម្ភខ្លាំងនឹងកម្មវិធីនុយក្លេអ៊ែររបស់អ៊ីរ៉ង់ និងគិតថា ខ្លួននឹងជាគោលដៅនៃអាវុធនេះមិនខាន ព្រោះនរណាក៏ដឹងដែរថា អ៊ីស្រាអែល និងអ៊ីរ៉ង់ជាសត្រូវសួពូជទៅហើយ។ ជារឿយៗ បន្ថែមពីគោលនយោបាយការបរទេសបញ្ច្រាសគ្នា ប្រទេសទាំងពីរនេះតែងគំរាមកម្ទេចគ្នាឲ្យក្លាយជាផេះផង់ផងដែរ។ ដោយសារហេតុនេះ លោក ណេតាន់យ៉ាហ៊ូ តែងទទូចឲ្យរដ្ឋបាលោក ត្រាំ ដាក់សម្ពាធធ្ងន់ៗលើទីក្រុងតេហេរ៉ង់។

កាលពីសប្ដាហ៍មុន លោកនាយករដ្ឋមន្ត្រីរូបនេះ បានព្រមានដោយចំហទៅកាន់អ៊ីរ៉ង់ថា យន្តហោះចម្បាំងអ៊ីស្រាអែល អាចហោះដល់គ្រប់ទីកន្លែងនៅមជ្ឈិមបូព៌ា រាប់ទាំងអ៊ីរ៉ង់ផង។ សម្ដីព្រមានរបស់មេដឹកនាំអ៊ីស្រាអែល ធ្វើឡើងក្រោយអ៊ីរ៉ង់គំរាមថា អ៊ីស្រាអែលមិនរួចខ្លួនឡើយ បើជម្លោះរវាងអាមេរិក និងអ៊ីរ៉ង់ផ្ទុះឡើងនៅទីបំផុត៕